ਆਦੇਸ਼ਾਂ ਦੇ ਬਾਵਜੂਦ ਖੁੱਲੇ ਹਨ ਸੁੱਕੇ ਖੂਹ,ਗਰੀਬ ਕਿਸਾਨ ਦੀ ਮੱਝ ਦੀ ਖੂਹ ਚ ਡਿੱਗ ਕੇ ਹੋਈ ਮੌਤ
ਰੋਹਿਤ ਗੁਪਤਾ
ਗੁਰਦਾਸਪੁਰ , 23 ਜੁਲਾਈ 2025 :
ਬੋਰਵੈਲ ਅਤੇ ਡੂੰਘੇ ਟੋਇਆਂ ਵਿੱਚ ਡਿੱਗਣ ਨਾਲ ਕਈ ਇਨਸਾਨੀ ਜਾਨਾਂ ਦਾ ਨੁਕਸਾਨ ਹੋਣ ਤੋਂ ਬਾਅਦ ਸਰਕਾਰ ਵੱਲੋਂ ਹਰ ਤਾਰਾ ਦੇ ਬੋਰਵੈਲ , ਸੁੱਕੇ ਖੂਹ ਅਤੇ ਟੋਏ ਯਾ ਤਾਂ ਮਿੱਟੀ ਪਾ ਕੇ ਪੂਰ ਦੇਣ ਜਾਂ ਫਿਰ ਖੁੱਲੇ ਨਾ ਰੱਖਣ ਦੀਆਂ ਹਿਦਾਇਤਾਂ ਦਿੱਤੀਆਂ ਗਈਆਂ ਸਨ ਜਿਸ ਤੋਂ ਬਾਅਦ ਵੱਖ ਵੱਖ ਜਿਲਿਆਂ ਵਿੱਚ ਪ੍ਰਸ਼ਾਸਨ ਵੱਲੋਂ ਵੀ ਕਿਸੇ ਵੀ ਤਰ੍ਹਾਂ ਦਾ ਟੋਇਆ ਖੁੱਲਾ ਨਾ ਰੱਖਣ ਦੇ ਹੁਕਮ ਜਾਰੀ ਕਰ ਦਿੱਤੇ ਗਏ ਸਨ ਪਰ ਇਹਨਾਂ ਹੁਕਮਾਂ ਤੇ ਅਮਲ ਨਹੀਂ ਹੋਇਆ । ਅਜੇ ਵੀ ਕਈ ਪੁਰਾਣੇ ਖੂਹ ਜਿਨਾਂ ਵਿੱਚੋਂ ਕੁਝ ਸੁੱਕ ਵੀ ਗਏ ਹਨ ਖੁੱਲੇ ਨਜ਼ਰ ਆਉਂਦੇ ਹਨ। ਜਿਲਾ ਗੁਰਦਾਸਪੁਰ ਦੇ ਪੁਲਿਸ ਜਿਲਾ ਬਟਾਲਾ ਦੇ ਤਹਿਤ ਆਉਂਦੇ ਥਾਣਾ ਸੇਖਵਾਂ ਦੇ ਪਿੰਡ ਥੇਹ ਗੁਲਾਮ ਨਬੀ ਦੇ ਰਹਿਣ ਵਾਲੇ ਇੱਕ ਛੋਟੇ ਜਿਹੇ ਕਿਸਾਨ ਦੀ ਸਵਾ ਲੱਖ ਰੁਪਏ ਦੇ ਕਰੀਬ ਮੁੱਲ ਦੀ ਮੱਝ ਦੀ ਅਜਿਹੇ ਹੀ ਇੱਕ ਡੂੰਘੇ ਸੁੱਕੇ ਖੂਹ ਵਿੱਚ ਡਿੱਗਣ ਨਾਲ ਮੌਤ ਹੋ ਗਈ । ਮ੍ਰਿਤ ਮੱਝ ਛੇ ਦਿਨਾਂ ਤੋਂ ਹਜੇ ਵੀ ਖੂਹ ਵਿੱਚ ਹੀ ਪਈ ਹੈ, ਜਦ ਕਿ ਸਿਰਫ ਇੱਕ ਕਿੱਲੇ ਜਮੀਨ ਦਾ ਮਾਲਕ ਅਤੇ ਦੁੱਧ ਦੇ ਕਾਰੋਬਾਰ ਤੋਂ ਪਰਿਵਾਰ ਪਾਲਦਾ ਬਜ਼ੁਰਗ ਕਿਸਾਨ ਗਿਆਨ ਸਿੰਘ ਪੰਜ ਦਿਨਾਂ ਤੋਂ ਥਾਣਾ ਸੇਖਵਾਂ ਦੇ ਚੱਕਰ ਲਗਾਉਂਦੇ ਹੋਏ ਪੁਲਿਸ ਕੋਲੋਂ ਇਨਸਾਫ ਦੀ ਗੁਹਾਰ ਲਗਾ ਰਿਹਾ ਹੈ।
ਕਿਸਾਨ ਗਿਆਨ ਸਿੰਘ ਨੇ ਦੱਸਿਆ ਕਿ ਉਹ ਇੱਕ ਏਕੜ ਜਮੀਨ ਦਾ ਮਾਲਕ ਹੈ ਤੇ ਕੁਝ ਮਹੀਨੇ ਪਹਿਲਾਂ ਉਸਨੇ ਇੱਕ ਮਾਲਵੇ ਦੀ ਮੱਝ ਸਵਾ ਲੱਖ ਰੁਪਏ ਦੀ ਖਰੀਦੀ ਸੀ ਜਿਸ ਦਾ ਦੁੱਧ ਵੇਚ ਕੇ ਉਹ ਪਰਿਵਾਰ ਨੂੰ ਪਾਲ ਰਿਹਾ ਸੀ ਪਰ ਬੀਤੇ ਦਿਨ ਮਾਝੇ ਦੀ ਰੱਸੀ ਅਚਾਨਕ ਖੁੱਲ ਗਈ ਅਤੇ ਉਹ ਨਜ਼ਦੀਕ ਦੇ ਇੱਕ ਕਿਸਾਨ ਦੇ ਖੇਤਾਂ ਵਿੱਚ ਖੁੱਲੇ ਸੁੱਕੇ ਖੂਹ ਵਿੱਚ ਜਾ ਡਿੱਗੀ ਜਿਸ ਕਾਰਨ ਉਸ ਦੀ ਮੌਤ ਹੋ ਗਈ । ਉਸ ਦੀ ਮ੍ਰਿਤ ਮੱਝ ਪੰਜ ਦਿਨਾਂ ਬਾਅਦ ਵੀ ਇਸੇ ਖੂਹ ਵਿੱਚ ਪਈ ਹੈ ਪਰ ਜਿਸ ਦੀ ਜ਼ਮੀਨ ਵਿੱਚ ਖੂਹ ਹੈ ਉਹ ਕਿਸਾਨ ਕਿਸੇ ਤਰ੍ਹਾਂ ਦੀ ਮਦਦ ਨਹੀਂ ਕਰ ਰਿਹਾ , ਜਿਸ ਕਾਰਨ ਉਸਨੇ ਇਸ ਦੀ ਸ਼ਿਕਾਇਤ ਥਾਣਾ ਸੇਖਵਾਂ ਕੀਤੀ ਪਰ ਪਿਛਲੇ ਪੰਜ ਦਿਨਾਂ ਤੋਂ ਪੁਲਿਸ ਵੱਲੋਂ ਰੋਜ਼ ਉਸ ਨੂੰ ਥਾਣੇ ਬੁਲਾਇਆ ਜਾ ਰਿਹਾ ਹੈ ਪਰ ਦੂਸਰੀ ਪਾਰਟੀ ਇੱਕ ਵਾਰ ਵੀ ਥਾਣੇ ਨਹੀਂ ਆਈ ਹੈ। ਉਹ ਗਰੀਬ ਕਿਸਾਨ ਹੈ ਇਸ ਲਈ ਉਸ ਦੀ ਮਦਦ ਕੀਤੀ ਜਾਏ।