ਨੈਸ਼ਨਲ ਸੀਨੀਅਰ ਗੇਮਜ਼ 2025: ਫਰਿਜਨੋ ਦੇ ਗੁਰਬਖਸ਼ ਸਿੰਘ ਸਿੱਧੂ ਅਤੇ ਰਣਧੀਰ ਸਿੰਘ ਵਿਰਕ ਨੇ ਜਿੱਤੇ ਸੋਨੇ ਦੇ ਤਮਗੇ
ਗੁਰਿੰਦਰਜੀਤ ਨੀਟਾ ਮਾਛੀਕੇ
ਫਰਿਜਨੋ (ਕੈਲੀਫੋਰਨੀਆ), 06 ਅਗਸਤ 2025- ਫਰਿਜਨੋ ਦੇ ਮਸ਼ਹੂਰ ਐਥਲੀਟ ਗੁਰਬਖਸ਼ ਸਿੰਘ ਸਿੱਧੂ ਅਕਸਰ ਸੀਨੀਅਰ ਖੇਡਾਂ ਵਿੱਚ ਭਾਗ ਲੈਕੇ ਮੱਲਾਂ ਮਾਰਦੇ ਰਹਿੰਦੇ ਨੇ, ਇਸ ਵਾਰ ਨੇ ਆਪਣੇ ਸਾਥੀਆਂ ਸਮੇ 1 ਅਗਸਤ, 2025, ਨੂੰ ਆਈਓਵਾ ਸਟੇਟ ਯੂਨੀਵਰਸਿਟੀ ਦੇ ਸਾਈਕਲੋਨ ਸਪੋਰਟਸ ਕਾਮਪਲੈਕਸ ਵਿਖੇ ਹੋ ਰਹੇ ਨੈਸ਼ਨਲ ਸੀਨੀਅਰ ਗੇਮਜ਼ 2025 ਵਿੱਚ ਭਾਗ ਲੈਕੇ ਪੰਜਾਬੀ ਭਾਈਚਾਰੇ ਦਾ ਨਾਮ ਰੌਸ਼ਨ ਕੀਤਾ। ਦੇ ਮੋਇਨਸ, ਆਈਓਵਾ – ਵਿੱਚ ਫਰਿਜਨੋ ਦੇ ਗੁਰਬਖਸ਼ ਸਿੰਘ ਸਿੱਧੂ ਨੇ ਹੈਮਰ ਥ੍ਰੋ ਮੁਕਾਬਲੇ ਵਿੱਚ ਸੋਨੇ ਦਾ ਤਮਗਾ ਜਿੱਤਿਆ। ਉਨ੍ਹਾਂ ਨੇ 43.03 ਮੀਟਰ ਦੀ ਸ਼ਾਨਦਾਰ ਸੁੱਟ ਮਾਰੀ। ਇਸ ਮੁਕਾਬਲੇ ਵਿੱਚ ਕੁੱਲ 12 ਮੁਕਾਬਲੇਬਾਜ ਸ਼ਾਮਲ ਸਨ। ਡੇਵਿਡ ਬ੍ਰੈਂਡਟ ਨੇ 38.36 ਮੀਟਰ ਨਾਲ ਚਾਂਦੀ ਦਾ ਤਮਗਾ ਤੇ ਰਿਚਾਰਡ ਵਾਟਸਨ ਨੇ 36.02 ਮੀਟਰ ਨਾਲ ਕਾਂਸੀ ਦਾ ਤਮਗਾ ਜਿੱਤਿਆ।
ਇਸੇ ਤਰ੍ਹਾਂ, ਫਰਿਜਨੋ ਦੇ ਰਣਧੀਰ ਸਿੰਘ ਵਿਰਕ ਨੇ ਆਪਣੇ ਉਮਰ ਸਮੂਹ ਵਿੱਚ ਪਾਵਰਲਿਫਟਿੰਗ ਵਿੱਚ ਸੋਨੇ ਦਾ ਤਮਗਾ ਜਿੱਤਿਆ। ਸੁਖਨੈਨ ਸਿੰਘ, ਜੋ ਕਿ ਫਰਿਜਨੋ ਤੋਂ ਹੀ ਹਨ, ਨੇ ਟਰਿਪਲ ਜੰਪ ਵਿੱਚ 13ਵਾਂ ਸਥਾਨ ਹਾਸਿਲ ਕੀਤਾ। ਇਹ ਨੈਸ਼ਨਲ ਸੀਨੀਅਰ ਗੇਮਜ਼ ਹਰ ਦੋ ਸਾਲ ਬਾਅਦ ਕਰਵਾਈਆਂ ਜਾਂਦੀਆਂ ਹਨ। ਕੁੱਲ 12407 ਐਥਲੀਟਸ ਨੇ ਰਜਿਸਟਰ ਕਰਵਾਇਆ ਸੀ, ਜੋ ਕਿ ਅਮਰੀਕਾ ਦੇ ਵੱਖ-ਵੱਖ ਸੂਬਿਆਂ ਤੋਂ ਇਲਾਵਾ ਕੈਨੇਡਾ, ਮੈਕਸੀਕੋ, ਬਰਬਾਡੋਸ, ਟ੍ਰਿਨੀਡਾਡ ਟੋਬਾਗੋ ਆਦਿ ਦੇਸ਼ਾਂ ਤੋਂ ਵੀ ਆਏ ਹੋਏ ਸਨ। ਇਸ ਵਾਰ ਦੀਆਂ ਖੇਡਾਂ ਵਿੱਚ ਬਾਸਕਟਬਾਲ, ਵਾਲੀਬਾਲ, ਗਾਲਫ, ਸਾਈਕਲਿੰਗ, ਪਾਵਰਲਿਫਟਿੰਗ, ਬੈਡਮਿੰਟਨ ਆਦਿ 25 ਖੇਡਾਂ ਸ਼ਾਮਲ ਰਹੀਆਂ। ਅਗਲੀਆਂ ਨੈਸ਼ਨਲ ਸੀਨੀਅਰ ਗੇਮਜ਼ 2027 ਵਿੱਚ ਟੁਲਸਾ, ਓਕਲਾਹੋਮਾ ਵਿਖੇ ਹੋਣਗੀਆਂ।