ਪੰਜਾਬ 'ਚ ਖੁਦਾਈ ਦੌਰਾਨ ਧਰਤੀ ਹੇਠੋਂ ਨਿਕਲਿਆ ਸ਼ਿਵਲਿੰਗ
ਗੱਲ ਫੈਲਦੇ ਹੀ ਪਹੁੰਚਣ ਲੱਗ ਪਏ ਸ਼ਰਧਾਲੂ
ਰੋਹਿਤ ਗੁਪਤਾ
ਗੁਰਦਾਸਪੁਰ 28 ਜੁਲਾਈ 2025- ਭਾਰਤ ਪਾਕਿਸਤਾਨ ਸਰਹੱਦ ਦੇ ਕਸਬਾ ਦੋਰਾਂਗਲਾ ਵਿੱਚ ਪ੍ਰਾਚੀਨ ਬਾਬਾ ਤੁਰਤ ਨਾਥ ਦੀ ਸਮਾਧੀ ਮੰਦਿਰ ਦੇ ਵਿੱਚ ਖੁਦਾਈ ਦੇ ਦੌਰਾਨ ਧਰਤੀ ਹੇਠੋਂ ਸ਼ਿਵਲਿੰਗ ਨਿਕਲ ਬਾਰੇ ਪਤਾ ਚੱਲਣ ਤੋਂ ਬਾਅਦ ਦੂਰ ਦਰਾਜ ਪਿੰਡਾਂ ਤੋਂ ਲੋਕ ਦਰਸ਼ਨ ਕਰਨ ਦੇ ਲਈ ਮੰਦਿਰ ਦੇ ਵਿੱਚ ਪਹੁੰਚਣ ਲੱਗ ਪਏ ਹਨ। ਜਾਣਕਾਰੀ ਦਿੰਦੇ ਹੋਏ ਮੰਦਿਰ ਪੁਜਾਰੀ ਨੇ ਦੱਸਿਆ ਕਿ ਮੰਦਿਰ ਦੇ ਵਿੱਚ ਨਿਰਮਾਣ ਦੇ ਲਈ ਖੁਦਾਈ ਦਾ ਕੰਮ ਚੱਲ ਰਿਹਾ ਸੀ ਕਿ ਸਾਢੇ ਤਿੰਨ ਫੁੱਟ ਦੀ ਖੁਦਾਈ ਤੋਂ ਬਾਅਦ ਖੁਦਾਈ ਕਰ ਰਹੇ ਨੌਜਵਾਨ ਨੇ ਦੱਸਿਆ ਕਿ ਹੇਠਾਂ ਕੋਈ ਪੱਥਰ ਨੁਮਾ ਚੀਜ਼ ਹੈ ਜਿਸ ਕਾਰਨ ਖੁਦਾਈ ਨਹੀਂ ਹੋ ਪਾ ਰਹੀ। ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਜਦੋਂ ਦੇਖਿਆ ਤਾਂ ਹੇਠਾਂ ਸਾਕਸ਼ਾਤ ਸ਼ਿਵਲਿੰਗ ਦੇ ਦਰਸ਼ਨ ਹੋਏ।
ਇਸ ਬਾਰੇ ਪਤਾ ਲੱਗਣ ਤੇ ਨਗਰ ਦੇ ਲੋਕ ਇਕੱਠਾ ਹੋਣਾ ਸ਼ੁਰੂ ਹੋ ਗਏ ਅਤੇ ਉਹਨਾਂ ਦੀ ਮਦਦ ਦੇ ਨਾਲ ਸ਼ਿਵਲਿੰਗ ਨੂੰ ਹੇਠਾਂ ਤੋਂ ਕੱਢ ਕੇ ਜਦੋਂ ਦੇਖਿਆ ਗਿਆ ਤਾਂ ਸਾਕਸ਼ਾਤ ਸ਼ਿਵ ਭੋਲੇ ਦੇ ਸ਼ਿਵਲਿੰਗ ਦੇ ਦਰਸ਼ਨ ਹੋਏ। ਜਿਸ ਦੇ ਉੱਪਰ ਨੇਤਰ ਦਾ ਆਕਾਰ ਅਤੇ ਜਨੇਊ ਦਾ ਆਕਾਰ ਦੇ ਤਸਵੀਰ ਬਣੀ ਹੋਈ ਨਜ਼ਰ ਆ ਰਹੀ ਹੈ। ਜਿਸ ਤੋਂ ਬਾਅਦ ਅਭਿਸ਼ੇਕ ਕਰਨ ਤੋਂ ਬਾਅਦ ਸ਼ਿਵਲਿੰਗ ਦੇ ਦਰਸ਼ਨ ਕਰਨ ਦੇ ਲਈ ਦੂਰ ਦਰਾਜ ਪਿੰਡਾਂ ਤੋਂ ਲੋਕ ਪਹੁੰਚ ਰਹੇ ਹਨ।
ਉਨਾਂ ਦੱਸਿਆ ਕਿ ਇਸ ਮੰਦਰ ਦਾ ਇਤਿਹਾਸ ਬਹੁਤ ਪੁਰਾਣਾ ਹੈ ਇਸੇ ਤਪ ਸਥਾਨ ਤੇ ਬਾਬਾ ਤੂਰਤ ਨਾਥ ਜੀ ਵੱਲੋਂ ਜਿੰਦਾ ਸਮਾਦੀ ਲਈ ਗਈ ਸੀ। ਉਹਨਾਂ ਨੇ 15 ਦਿਨ ਪਹਿਲਾਂ ਹੀ ਦੱਸ ਦਿੱਤਾ ਸੀ ਕਿ ਮੈਂ ਇਸੇ ਸਥਾਨ ਤੇ ਜਿੰਦਾ ਸਮਾਧੀ ਲਵਾਂਗਾ ਅਤੇ ਜਦੋਂ ਇਹ ਪਿੱਪਲ ਦਾ ਟਹਿਣਾ ਟੁੱਟ ਜਾਵੇਗਾ ਤੁਸੀਂ ਸਮਝ ਲੈਣਾ ਕਿ ਮੈਂ ਸਮਾਧੀ ਦੇ ਵਿੱਚ ਲੀਨ ਹੋ ਗਿਆ ਹਾਂ। ਸ਼ਿਵਲਿੰਗ ਦੇ ਦਰਸ਼ਨ ਹੋਣ ਤੋਂ ਬਾਅਦ ਸ਼ਿਵ ਭੋਲੇ ਦੇ ਭਗਤ ਦੇ ਵਿੱਚ ਖੁਸ਼ੀ ਦੀ ਲਹਿਰ ਪਾਈ ਜਾ ਰਹੀ ਹੈ।