ਜਖ਼ਮੀ ਹਾਲਤ 'ਚ ਮਿਲੇ ਬਾਜ਼ ਦੀ ਬਚਾਈ ਜਾਨ
ਲੁਧਿਆਣਾ, 12 ਜੁਲਾਈ 2025 : ਅੱਜ ਦੇ ਦੌਰ ਵਿੱਚ ਜਦੋਂ ਇਨਸਾਨ ਕੋਲ ਇਨਸਾਨ ਦੀ ਦੁੱਖ ਤਕਲੀਫ਼ ਸੁਣਨ ਦਾ ਸਮਾਂ ਨਹੀਂ ਹੈ। ਐਸੇ ਦੌਰ ਵਿੱਚ ਬੇਹੋਸ਼ੀ ਦੀ ਹਾਲਤ ਵਿੱਚ ਧਰਤੀ ‘ਤੇ ਡਿੱਗੇ ਪਏ ਬਾਜ਼ ਦਾ ਇਲਾਜ਼ ਕਰਵਾ ਕੇ ਮੁੜ ਤੋਂ ਉਸ ਨੂੰ ਖੁੱਲ੍ਹੇ ਅਸਮਾਨ ਵਿੱਚ ਛੱਡ ਦਿੱਤਾ ਗਿਆ। ਇਹ ਸਭ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਲੁਧਿਆਣਾ ਸਥਿਤ ਆਲ ਇੰਡੀਆ ਰੇਡੀਓ ਦੇ ਆਕਾਸ਼ਵਾਣੀ ਲੁਧਿਆਣਾ ਕੇਂਦਰ ਦੇ ਕਰਮਚਾਰੀਆਂ ਨੇ ਕਰ ਦਿਖਾਇਆ ਹੈ। ਉਨ੍ਹਾਂ ਨੂੰ ਆਪਣੇ ਦਫ਼ਤਰ ਦੇ ਬਾਹਰ ਇੱਕ ਬਾਜ਼ ਜਖ਼ਮੀ ਹਾਲਤ ਵਿੱਚ ਮਿਲਿਆ ਜੋ ਉੱਡ ਨਹੀਂ ਸੀ ਸਕਦਾ। ਜਿਸ ਦੀ ਸੂਚਨਾ ਆਕਾਸ਼ਵਾਣੀ ਲੁਧਿਆਣਾ ਦੇ ਨਿਰਦੇਸ਼ਕ ਕਰਮਵੀਰ ਕਰਨ ਨੂੰ ਦਿੱਤੀ। ਉਹਨਾਂ ਨੇ ਜਖ਼ਮੀ ਹਾਲਤ ਵਿੱਚ ਮਿਲੇ ਬਾਜ਼ ਨੂੰ ਚੁੱਕ ਲਿਆ ਅਤੇ ਪਾਣੀ ਪਿਲਾਇਆ ਤੇ ਫਿਰ ਪੀਏਯੂ ਦੇ ਵੈਟਨਰੀ ਡਾਕਟਰ ਨੂੰ ਬੁਲਾਇਆ ਗਿਆ।
ਜਾਣਕਾਰੀ ਦਿੰਦੇ ਹੋਏ ਆਕਾਸ਼ਵਾਣੀ ਲੁਧਿਆਣਾ ਦੇ ਨਿਰਦੇਸ਼ਕ ਕਰਮਵੀਰ ਕਰਨ ਨੇ ਦੱਸਿਆ ਕਿ ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਦੇ ਵੈਟਰਨਰੀ ਡਾਕਟਰ ਗੁਰਪ੍ਰੀਤ ਸਿੰਘ ਪ੍ਰੀਤ ਨੇ ਮੌਕੇ ਤੇ ਪਹੁੰਚ ਕੇ ਜਖ਼ਮੀ ਬਾਜ਼ ਦਾ ਚੈੱਕਅਪ ਕੀਤਾ ਅਤੇ ਗੁਰੂ ਅੰਗਦ ਦੇਵ ਵੈਟਨਰੀ ਅਤੇ ਐਨੀਮਲ ਸਾਇੰਸਜ਼ ਯੂਨੀਵਰਸਿਟੀ, ਲੁਧਿਆਣਾ ਵਿਖੇ ਲੈ ਗਏ। ਜਿੱਥੇ ਯੂਨੀਵਰਸਿਟੀ ਦੇ ਐਨੀਮਲ ਵੈਲਫੇਅਰ ਕਲੱਬ ਦੇ ਮੈਂਬਰਾਂ ਨੇ ਇਲਾਜ ਕੀਤਾ। ਜਖ਼ਮੀ ਪੰਛੀ ਦੇ ਸੰਬੰਧ ਵਿੱਚ ਜਾਣਕਾਰੀ ਦਿੰਦਿਆਂ ਡਾਕਟਰ ਗੁਰਪ੍ਰੀਤ ਸਿੰਘ ਪ੍ਰੀਤ ਨੇ ਦੱਸਿਆ ਕਿ ਇਹ ਪੰਛੀਆਂ ਦੀਆਂ ਅਲੋਪ ਹੋ ਰਹੀ ਪਰਜਾਤੀਆਂ ਵਿੱਚੋਂ ਇੱਕ ਹੈ। ਇਸ ਨੂੰ ਆਮ ਲੋਕ ਬਾਜ਼ ਜਾਂ ਇੱਲ ਕਹਿ ਦਿੰਦੇ ਹਨ, ਪਰ ਇਹ ਕਾਈਟ ਜਾਤੀ ਹੈ। ਇਹ ਕਾਈਟ ਜਾਤੀ ਦਾ ਬੱਚਾ ਹੈ ਜੋ ਅਸਮਾਨ ਵਿੱਚ ਉੱਡਦੇ ਸਮੇਂ ਜਖ਼ਮੀ ਹੋ ਗਿਆ ਤੇ ਆਪਣੇ ਪਰਿਵਾਰ ਨਾਲੋਂ ਵਿਛੜ ਗਿਆ। ਉਨ੍ਹਾਂ ਵਲੋਂ ਇਸ ਦਾ ਇਲਾਜ ਕਰਨ ਤੋਂ ਬਾਅਦ ਐਨੀਮਲ ਵੈਲਫੇਅਰ ਕਲੱਬ ਦੇ ਮੈਂਬਰਾਂ ਨੇ ਖੁੱਲ੍ਹੇ ਅਸਮਾਨ ਵਿੱਚ ਛੱਡ ਦਿੱਤਾ ਹੈ।