ਵਿਧਾਇਕ ਕੁਲਵੰਤ ਸਿੰਘ ਨੇ ਈਐਸਆਈ ਹਸਪਤਾਲ, ਫੇਜ਼ 7, ਮੋਹਾਲੀ ਵਿਖੇ ਅਲਟਰਾਸਾਊਂਡ ਸਹੂਲਤ ਦੀ ਸ਼ੁਰੂਆਤ ਕਰਵਾਈ
ਉਦਯੋਗਿਕ ਕਰਮਚਾਰੀਆਂ ਲਈ ਸਿਹਤ ਬੁਨਿਆਦੀ ਢਾਂਚੇ ਨੂੰ ਮਜ਼ਬੂਤ ਕਰਨ ਦਾ ਭਰੋਸਾ ਦਿੱਤਾ
ਸੈਕਟਰ 66 ਵਿਖੇ ਨਵੇਂ ਈ ਐਸ ਆਈ ਜਾਂ ਜਨਰਲ ਹਸਪਤਾਲ ਦੀ ਸਥਾਪਤੀ ਲਈ ਯਤਨਸ਼ੀਲ: ਵਿਧਾਇਕ
Babushahi Bureau
ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ, 1 ਅਕਤੂਬਰ:
ਵਿਧਾਇਕ ਐਸ ਏ ਐਸ ਨਗਰ (ਮੋਹਾਲੀ) ਕੁਲਵੰਤ ਸਿੰਘ ਨੇ ਅੱਜ ਸਰਕਾਰੀ ਈ ਐਸ ਆਈ ਹਸਪਤਾਲ, ਫੇਜ਼ 7, ਮੋਹਾਲੀ ਵਿਖੇ ਨਵੀਂ ਸਥਾਪਿਤ ਹਾਈ-ਡੈਫੀਨੇਸ਼ਨ ਅਲਟਰਾਸਾਊਂਡ ਯੂਨਿਟ ਦੀ ਸ਼ੁਰੂਆਤ ਕੀਤੀ।
ਇਸ ਮੌਕੇ ਬੋਲਦਿਆਂ, ਵਿਧਾਇਕ ਕੁਲਵੰਤ ਸਿੰਘ ਨੇ ਕਿਹਾ ਕਿ ਇਸ ਉੱਨਤ ਯੂਨਿਟ ਦੀ ਸਥਾਪਨਾ ਦੇ ਨਾਲ-ਨਾਲ ਰੇਡੀਓਲੋਜਿਸਟ ਦੀ ਤਾਇਨਾਤੀ ਉਦਯੋਗਿਕ ਖੇਤਰ ਵਿੱਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਲਈ ਸਿਹਤ ਸੰਭਾਲ ਸੇਵਾਵਾਂ ਵਿੱਚ ਕਾਫ਼ੀ ਸੁਧਾਰ ਕਰੇਗੀ। ਉਨ੍ਹਾਂ ਅੱਗੇ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਹੇਠ ਪੰਜਾਬ ਸਰਕਾਰ ਵਸਨੀਕਾਂ ਲਈ ਮਿਆਰੀ ਸਿਹਤ ਸੰਭਾਲ ਯਕੀਨੀ ਬਣਾਉਣ ਲਈ ਵਚਨਬੱਧ ਹੈ। ਉਨ੍ਹਾਂ ਕਿਹਾ, "ਆਮ ਆਦਮੀ ਕਲੀਨਿਕ ਪਹਿਲਾਂ ਹੀ ਲੋਕਾਂ ਦੇ ਘਰਾਂ ਦੇ ਨੇੜੇ 'ਤੇ ਮੁਫ਼ਤ ਦਵਾਈਆਂ ਅਤੇ ਡਾਇਗਨੌਸਟਿਕ ਟੈਸਟਾਂ ਦੇ ਨਾਲ ਮੁੱਢਲੀ ਸਿਹਤ ਸੰਭਾਲ ਪ੍ਰਦਾਨ ਕਰਨ ਲਈ ਇੱਕ ਸਫ਼ਲ ਮਾਡਲ ਹਨ।"
ਹਸਪਤਾਲ ਦੇ ਸਟਾਫ ਅਤੇ ਮੋਹਾਲੀ ਇੰਡਸਟਰੀ ਐਸੋਸੀਏਸ਼ਨ ਦੇ ਹਸਪਤਾਲ ਦੇ ਪ੍ਰਭਾਵਸ਼ਾਲੀ ਪ੍ਰਬੰਧਨ ਲਈ ਯਤਨਾਂ ਦੀ ਸ਼ਲਾਘਾ ਕਰਦੇ ਹੋਏ, ਕੁਲਵੰਤ ਸਿੰਘ ਨੇ ਕਿਹਾ ਕਿ ਉਹ ਸੈਕਟਰ 66 ਵਿਖੇ ਇੱਕ ਹੋਰ ਵੱਡੀ ਸਿਹਤ ਸਹੂਲਤ (ਜਾਂ ਤਾਂ ਈ ਐਸ ਆਈ ਹਸਪਤਾਲ ਜਾਂ ਸਿਵਲ ਹਸਪਤਾਲ-ਕਿਸਮ ਦੀ ਸੰਸਥਾ) ਸਥਾਪਤ ਕਰਵਾਉਣ ਲਈ ਯਤਨਸ਼ੀਲ ਹਨ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਮੌਜੂਦਾ ਜ਼ਿਲ੍ਹਾ ਹਸਪਤਾਲ 'ਤੇ ਬੋਝ ਘਟਾਉਣ ਵਿੱਚ ਮਦਦ ਮਿਲੇਗੀ, ਜੋ ਕਿ ਵਰਤਮਾਨ ਵਿੱਚ ਮੈਡੀਕਲ ਕਾਲਜ ਦੇ ਹਿੱਸੇ ਵਜੋਂ ਕੰਮ ਕਰ ਰਿਹਾ ਹੈ ਅਤੇ ਉਦੋਂ ਤੱਕ ਕਾਲਜ ਦਾ ਹਿੱਸਾ ਰਹੇਗਾ, ਜਦੋਂ ਤੱਕ ਕਾਲਜ ਆਈ ਐਸ ਬੀ ਦੇ ਪਿੱਛੇ ਬਣਨ ਵਾਲੇ ਆਪਣੇ ਕੈਂਪਸ ਵਿੱਚ ਨਹੀਂ ਸ਼ਿਫਟ ਹੋ ਜਾਂਦਾ।
ਉਨ੍ਹਾਂ ਅੱਗੇ ਭਰੋਸਾ ਦਿੱਤਾ ਕਿ ਫੇਜ਼ 7 ਵਿਖੇ ਈ ਐਸ ਆਈ ਹਸਪਤਾਲ ਨੂੰ ਉਦਯੋਗਿਕ ਕਰਮਚਾਰੀਆਂ ਦੀਆਂ ਸਿਹਤ ਸੰਭਾਲ ਜ਼ਰੂਰਤਾਂ ਨੂੰ ਵਧੇਰੇ ਪ੍ਰਭਾਵਸ਼ਾਲੀ ਢੰਗ ਨਾਲ ਪੂਰਾ ਕਰਨ ਲਈ ਬੁਨਿਆਦੀ ਲੋੜਾਂ ਪੱਖੋਂ ਮਜ਼ਬੂਤ ਕੀਤਾ ਜਾਵੇਗਾ।
ਵਿਧਾਇਕ ਦਾ ਧੰਨਵਾਦ ਕਰਦੇ ਹੋਏ, ਈ ਐਸ ਆਈ ਹਸਪਤਾਲ ਦੇ ਐਸ ਐਮ ਓ ਇੰਚਾਰਜ ਡਾ. ਹਰਪ੍ਰੀਤ ਕੌਰ ਨੇ ਕਿਹਾ ਕਿ ਅਲਟਰਾਸਾਊਂਡ ਯੂਨਿਟ ਦੇ ਸੰਚਾਲਨ ਨੇ ਹਸਪਤਾਲ ਦੀ ਇੱਕ ਵੱਡੀ ਜ਼ਰੂਰਤ ਨੂੰ ਪੂਰਾ ਕੀਤਾ ਹੈ। ਉਨ੍ਹਾਂ ਦੱਸਿਆ ਕਿ ਹਸਪਤਾਲ ਵਿੱਚ ਪਹਿਲਾਂ ਹੀ ਵੱਖ ਵੱਖ ਮਾਹਿਰ ਡਾਕਟਰ ਹਨ, ਮਰੀਜ਼ਾਂ ਦੀ ਦੇਖਭਾਲ ਲਈ ਸਮਰਪਿਤ ਇੱਕ ਐਂਬੂਲੈਂਸ ਹੈ, ਅਤੇ ਜਲਦੀ ਹੀ, ਇੱਕ ਖੂਨ ਭੰਡਾਰਨ ਯੂਨਿਟ ਵੀ ਸਥਾਪਤ ਕੀਤਾ ਜਾਵੇਗਾ।
ਇਸ ਮੌਕੇ ਮੌਜੂਦ ਪ੍ਰਮੁੱਖ ਉਦਯੋਗਪਤੀਆਂ ਵਿੱਚ ਜਸਬੀਰ ਸਿੰਘ (ਚੇਅਰਮੈਨ, ਐਮ ਆਈ ਏ ਈ ਐਸ ਆਈ ਕਮੇਟੀ), ਬਲਜੀਤ ਸਿੰਘ (ਪ੍ਰਧਾਨ, ਮੋਹਾਲੀ ਇੰਡਸਟਰੀ ਐਸੋਸੀਏਸ਼ਨ), ਹਰਿੰਦਰਪਾਲ ਸਿੰਘ (ਸਾਬਕਾ ਪ੍ਰਧਾਨ, ਮੋਹਾਲੀ ਐਮ ਸੀ), ਰਾਜੇਸ਼ ਵਿੱਗ, ਕੇ.ਐਸ. ਮਾਹਲ, ਪਰਮਜੀਤ ਸਿੰਘ ਸੈਣੀ, ਅਸ਼ੋਕ ਗੁਪਤਾ, ਏ.ਐਸ. ਆਨੰਦ ਅਤੇ ਮਾਰਕੀਟ ਕਮੇਟੀ ਮੋਹਾਲੀ ਦੇ ਚੇਅਰਮੈਨ ਗੋਵਿੰਦ ਮਿੱਤਲ ਸ਼ਾਮਲ ਸਨ।