ਵਿਕਟਰ ਮਿਨੀ ਪੰਜਾਬ ਸਟੇਟ ਰੈਂਕਿੰਗ ਬੈਡਮਿੰਟਨ ਟੂਰਨਾਮੈਂਟ ਜਲੰਧਰ 'ਚ ਸ਼ੁਰੂ
ਬੱਚਿਆਂ ਦੇ ਸਰਬੰਗੀ ਵਿਕਾਸ ਵਿੱਚ ਖੇਡਾਂ ਦੀ ਮਹੱਤਵਪੂਰਨ ਭੂਮਿਕਾ : ਮੇਅਰ ਵਨੀਤ ਧੀਰ
3 ਦਿਨਾਂ 'ਚ 280 ਮੈਚ, 8 ਸ਼੍ਰੇਣੀਆਂ ਵਿੱਚ ਹੋਵੇਗੀ ਮੁਕਾਬਲੇਬਾਜ਼ੀ : ਰਿਤਿਨ ਖੰਨਾ
ਜਲੰਧਰ, 30 ਮਈ: ਵਿਕਟਰ ਮਿਨੀ ਪੰਜਾਬ ਸਟੇਟ ਰੈਂਕਿੰਗ ਬੈਡਮਿੰਟਨ ਟੂਰਨਾਮੈਂਟ ਦੀ ਸ਼ੁਰੂਆਤ ਅੱਜ ਰਾਇਜ਼ਾਦਾ ਹੰਸਰਾਜ ਬੈਡਮਿੰਟਨ ਸਟੇਡਿਅਮ, ਜਲੰਧਰ ਵਿੱਚ ਜੋਸ਼ ਅਤੇ ਉਤਸ਼ਾਹ ਨਾਲ ਹੋਈ। ਟੂਰਨਾਮੈਂਟ ਦਾ ਉਦਘਾਟਨ ਜਲੰਧਰ ਦੇ ਮੇਅਰ ਵਨੀਤ ਧੀਰ ਵੱਲੋਂ ਮੁੱਖ ਮਹਿਮਾਨ ਦੇ ਤੌਰ 'ਤੇ ਕੀਤਾ ਗਿਆ।
ਉਦਘਾਟਨੀ ਸਮਾਰੋਹ ਦੌਰਾਨ ਮੇਅਰ ਵਨੀਤ ਧੀਰ ਨੇ ਆਖਿਆ ਕਿ "ਬੱਚਿਆਂ ਦੇ ਸਰਬੰਗੀ ਵਿਕਾਸ ਵਿੱਚ ਖੇਡਾਂ ਦੀ ਅਹੰਮ ਭੂਮਿਕਾ ਹੁੰਦੀ ਹੈ। ਇਹ ਨਾ ਸਿਰਫ ਸਰੀਰਕ ਤੰਦਰੁਸਤੀ ਅਤੇ ਕੋਆਰਡੀਨੇਸ਼ਨ ਵਧਾਉਂਦੀਆਂ ਹਨ, ਸਗੋਂ ਸਿਹਤਮੰਦ ਜੀਵਨ ਸ਼ੈਲੀ ਨੂੰ ਵੀ ਉਤਸ਼ਾਹਿਤ ਕਰਦੀਆਂ ਹਨ। ਖੇਡਾਂ ਰਾਹੀਂ ਟੀਮ ਭਾਵਨਾ, ਅਨੁਸ਼ਾਸਨ, ਨੇਤ੍ਰਤਵ ਅਤੇ ਆਤਮ ਵਿਸ਼ਵਾਸ ਵਰਗੀਆਂ ਜੀਵਨ ਦੀਆਂ ਮੁੱਲਵਾਨ ਸਿਖਲਾਈਆਂ ਮਿਲਦੀਆਂ ਹਨ।"
ਪੰਜਾਬ ਬੈਡਮਿੰਟਨ ਅਸੋਸੀਏਸ਼ਨ ਦੇ ਸਕੱਤਰ ਰਿਤਿਨ ਖੰਨਾ ਨੇ ਦੱਸਿਆ ਕਿ ਇਹ 3 ਦਿਨਾਂ ਦਾ ਟੂਰਨਾਮੈਂਟ ਅੰਡਰ-11 ਅਤੇ ਅੰਡਰ-13 ਲੜਕਿਆਂ ਅਤੇ ਲੜਕੀਆਂ ਦੀਆਂ 8 ਸ਼੍ਰੇਣੀਆਂ ਵਿੱਚ 280 ਮੈਚਾਂ ਦੇ ਆਯੋਜਨ ਨਾਲ ਹੋਵੇਗਾ। ਪੰਜਾਬ ਦੇ ਵੱਖ-ਵੱਖ ਜ਼ਿਲ੍ਹਿਆਂ ਤੋਂ ਲਗਭਗ 250 ਖਿਡਾਰੀ ਹਿੱਸਾ ਲੈ ਰਹੇ ਹਨ। ਖਿਡਾਰੀਆਂ ਲਈ ਵਿਸ਼ੇਸ਼ ਭੋਜਨ ਅਤੇ ਨਾਸ਼ਤੇ ਦੀ ਵਿਵਸਥਾ ਵੀ ਕੀਤੀ ਗਈ ਹੈ। 1 ਜੂਨ ਨੂੰ ਜੇਤੂ ਖਿਡਾਰੀਆਂ ਨੂੰ ਨਕਦ ਇਨਾਮ ਅਤੇ ਆਕਰਸ਼ਕ ਤੋਹਫੇ ਦਿੱਤੇ ਜਾਣਗੇ।
ਉਹਨੇ ਦੱਸਿਆ ਕਿ ਪਾਰਦਰਸ਼ਿਤਾ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਪਹਿਲੀ ਵਾਰੀ ਟੂਰਨਾਮੈਂਟ ਦੇ ਡਰਾਅ ਦੀ ਵੀਡੀਓ ਰਿਕਾਰਡਿੰਗ ਕੀਤੀ ਗਈ ਅਤੇ ਇਸਨੂੰ ਅਸੋਸੀਏਸ਼ਨ ਦੇ ਅਧਿਕਾਰਿਕ ਫੇਸਬੁੱਕ ਪੇਜ਼ 'ਤੇ ਲਾਈਵ ਦਿਖਾਇਆ ਗਿਆ।
ਟੂਰਨਾਮੈਂਟ ਦਾ ਇੱਕ ਖਾਸ ਆਕਰਸ਼ਣ ਅੰਤਰਰਾਸ਼ਟਰੀ ਖਿਡਾਰੀ ਲਕਸ਼ੇ ਸ਼ਰਮਾ ਦਾ ਸਨਮਾਨ ਰਿਹਾ। ਹਾਲ ਹੀ ਵਿੱਚ ਹੈਦਰਾਬਾਦ ਵਿੱਚ ਹੋਏ ਆਲ ਇੰਡੀਆ ਸੀਨੀਅਰ ਰੈਂਕਿੰਗ ਟੂਰਨਾਮੈਂਟ ਵਿੱਚ ਚਾਂਦੀ ਦਾ ਤਮਗਾ ਜੇਤੂ ਲਕਸ਼ੇ ਨੂੰ ਮੇਅਰ ਵਨੀਤ ਧੀਰ ਵੱਲੋਂ ਨਕਦ ਇਨਾਮ ਦੇ ਕੇ ਸਨਮਾਨਿਤ ਕੀਤਾ ਗਿਆ।
ਬੈਡਮਿੰਟਨ ਅਸੋਸੀਏਸ਼ਨ ਆਫ ਇੰਡੀਆ ਵੱਲੋਂ ਮੰਨਤਾ ਪ੍ਰਾਪਤ ਅੰਪਾਇਰ ਵਿਲਾਸ ਹੰਸ ਅਤੇ ਵਰੁਣ ਕੁਮਾਰ ਟੂਰਨਾਮੈਂਟ ਵਿੱਚ ਰੇਫਰੀ ਵਜੋਂ ਜ਼ਿੰਮੇਵਾਰੀ ਨਿਭਾ ਰਹੇ ਹਨ, ਜਦਕਿ ਧੀਰਜ ਸ਼ਰਮਾ ਨੂੰ ਟੂਰਨਾਮੈਂਟ ਦਾ ਆਯੋਜਨ ਸਕੱਤਰ ਨਿਯੁਕਤ ਕੀਤਾ ਗਿਆ ਹੈ।