ਵ੍ਹੀਲਚੇਅਰ ਤੋਂ ਵਿਸ਼ਵ ਪੋਡੀਅਮ ਤੱਕ: ਲੁਧਿਆਣਾ ਦੇ ਸ਼ੁਭਮ ਵਧਵਾ ਨੇ ਲਿਖਿਆ ਇਤਿਹਾਸ
---ਸੜਕ ਹਾਦਸੇ ਤੋਂ ਬਾਅਦ ਤਿੰਨ ਸਾਲ ਬਿਸਤਰੇ 'ਤੇ ਰਹਿਣ ਵਾਲਾ ਖਿਡਾਰੀ ਅੱਜ ਭਾਰਤ ਦਾ ਨੰਬਰ-1 ਪੈਰਾ ਟੇਬਲ ਟੈਨਿਸ ਸਿਤਾਰਾ ਹੈ
ਸੁਖਮਿੰਦਰ ਭੰਗੂ
ਲੁਧਿਆਣਾ 24 ਜੁਲਾਈ 2026
ਜ਼ਿੰਦਗੀ ਕਦੇ-ਕਦੇ ਇੱਕ ਪਲ ਵਿੱਚ ਪੂਰੀ ਤਰ੍ਹਾਂ ਬਦਲ ਜਾਂਦੀ ਹੈ। ਲੁਧਿਆਣਾ ਦੇ ਸ਼ਾਮ ਨਗਰ ਇਲਾਕੇ ਦੇ ਰਹਿਣ ਵਾਲੇ ਅੰਤਰਰਾਸ਼ਟਰੀ ਪੈਰਾ ਟੇਬਲ ਟੈਨਿਸ ਖਿਡਾਰੀ ਸ਼ੁਭਮ ਵਧਵਾ ਲਈ ਵੀ ਕੁਝ ਅਜਿਹਾ ਹੀ ਹੋਇਆ — ਪਰ ਉਨ੍ਹਾਂ ਨੇ ਹਾਰ ਮੰਨਣ ਦੀ ਬਜਾਏ ਆਪਣੀ ਕਿਸਮਤ ਨੂੰ ਖੁਦ ਲਿਖਣ ਦਾ ਫੈਸਲਾ ਕੀਤਾ। 2016 ਦੇ ਇੱਕ ਗੰਭੀਰ ਸੜਕ ਹਾਦਸੇ ਵਿੱਚ ਰੀੜ੍ਹ ਦੀ ਹੱਡੀ ਨੂੰ ਲੱਗੀ ਸੱਟ ਨੇ ਉਨ੍ਹਾਂ ਨੂੰ ਤਕਰੀਬਨ ਤਿੰਨ ਸਾਲ ਬਿਸਤਰੇ ਤੱਕ ਸੀਮਤ ਕਰ ਦਿੱਤਾ ਸੀ। ਅੱਜ ਉਹੀ ਸ਼ੁਭਮ ਭਾਰਤ ਦੇ ਸਭ ਤੋਂ ਸਫਲ ਪੈਰਾ ਟੇਬਲ ਟੈਨਿਸ ਖਿਡਾਰੀਆਂ ਵਿੱਚ ਸ਼ੁਮਾਰ ਹਨ, ਅਤੇ ਵਿਸ਼ਵ ਪੱਧਰ 'ਤੇ ਦੇਸ਼ ਦਾ ਝੰਡਾ ਬੁਲੰਦ ਕਰ ਰਹੇ ਹਨ।
2026 ਦਾ ਸ਼ਾਨਦਾਰ ਸਫਰ ਲਗਾਤਾਰ ਤਿੰਨ ਵੱਡੇ ਤਗਮੇ
ਸ਼ੁਭਮ ਦਾ ਸਾਲ 2026 ਕਿਸੇ ਕਿਸੇ ਸੁਪਨੇ ਵਰਗਾ ਰਿਹਾ ਹੈ। ਫਰਵਰੀ ਵਿੱਚ ਗੋਲਡ ਕੋਸਟ (ਆਸਟ੍ਰੇਲੀਆ) ਵਿਖੇ ITTF ਵਿਸ਼ਵ ਪੈਰਾ ਫਿਊਚਰ ਟੂਰਨਾਮੈਂਟ ਵਿੱਚ ਸਿੰਗਲਜ਼ ਸੋਨ ਤਗਮਾ ਜਿੱਤ ਕੇ ਸਾਲ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ। ਮਾਰਚ ਦੇ ਅਖੀਰ ਵਿੱਚ ਸਪੇਨ ਦੇ ਕੋਸਟਾ ਬ੍ਰਾਵਾ ਵਿਖੇ ਹੋਏ ITTF ਵਿਸ਼ਵ ਪੈਰਾ ਫਿਊਚਰ ਟੂਰਨਾਮੈਂਟ ਵਿੱਚ ਉਨ੍ਹਾਂ ਨੇ ਭਾਵੀਨਾ ਪਟੇਲ ਨਾਲ ਮਿਲ ਕੇ ਮਿਕਸਡ ਡਬਲਜ਼ ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ। ਫਿਰ ਮਈ ਵਿੱਚ ਤਾਈਪੇ ਸਿਟੀ (ਤਾਈਵਾਨ) ਵਿਖੇ ITTF ਵਿਸ਼ਵ ਪੈਰਾ ਏਲੀਟ ਟੂਰਨਾਮੈਂਟ ਵਿੱਚ ਮਿਕਸਡ ਡਬਲਜ਼ ਵਿੱਚ ਚਾਂਦੀ ਅਤੇ ਮਰਦ ਸਿੰਗਲਜ਼ (ਕਲਾਸ-3) ਵਿੱਚ ਕਾਂਸੀ ਦਾ ਤਗਮਾ ਜਿੱਤ ਕੇ ਆਪਣੀ ਧਾਕ ਹੋਰ ਮਜ਼ਬੂਤ ਕੀਤੀ। ਇਸ ਤੋਂ ਪਹਿਲਾਂ ਨਵੰਬਰ 2025 ਵਿੱਚ ਮਿਸਰ ਵਿਖੇ ITTF ਵਿਸ਼ਵ ਪੈਰਾ ਚੈਲੰਜਰ ਵਿੱਚ ਵੀ ਉਹ ਚਾਂਦੀ ਦਾ ਤਗਮਾ ਜਿੱਤ ਚੁੱਕੇ ਹਨ।
ਹੁਣ ਜੁਲਾਈ 2026 ਵਿੱਚ ਥਾਈਲੈਂਡ ਦੇ ਨਾਖੋਨ ਰਤਚਾਸੀਮਾ ਵਿਖੇ ਹੋਏ ITTF ਵਿਸ਼ਵ ਪੈਰਾ ਏਲੀਟ ਟੂਰਨਾਮੈਂਟ ਵਿੱਚ ਸ਼ੁਭਮ ਨੇ ਭਾਵੀਨਾ ਪਟੇਲ ਨਾਲ ਮਿਲ ਕੇ ਮਿਕਸਡ ਡਬਲਜ਼ XD-7 ਵਰਗ ਵਿੱਚ ਕਾਂਸੀ ਦਾ ਤਗਮਾ ਜਿੱਤਿਆ, ਜਿਸ ਨਾਲ ਉਹ ਏਲੀਟ ਪੱਧਰ ਦੇ ਵਿਸ਼ਵ ਪੈਰਾ ਟੂਰਨਾਮੈਂਟ ਵਿੱਚ ਤਗਮਾ ਜਿੱਤਣ ਵਾਲੇ ਪਹਿਲੇ ਭਾਰਤੀ ਪੁਰਸ਼ ਖਿਡਾਰੀ ਬਣ ਗਏ।
ਵਿਸ਼ਵ ਰੈਂਕਿੰਗ ਵਿੱਚ ਲਗਾਤਾਰ ਉਭਾਰ
ਸ਼ੁਭਮ ਦੀ ਰੈਂਕਿੰਗ ਸਾਲ ਭਰ ਲਗਾਤਾਰ ਸੁਧਰਦੀ ਰਹੀ ਹੈ:
ਮਾਰਚ 2026 (ਕੋਸਟਾ ਬ੍ਰਾਵਾ ਤੋਂ ਬਾਅਦ): ਮਿਕਸਡ ਡਬਲਜ਼ ਵਿਸ਼ਵ ਰੈਂਕਿੰਗ – ਨੰਬਰ 8, ਏਸ਼ੀਆਈ ਰੈਂਕਿੰਗ – ਨੰਬਰ 2
ਮਈ 2026 (ਤਾਈਪੇ ਤੋਂ ਬਾਅਦ): ਮਿਕਸਡ ਡਬਲਜ਼ ਵਿਸ਼ਵ ਰੈਂਕਿੰਗ – ਨੰਬਰ 11, ਏਸ਼ੀਆਈ ਰੈਂਕਿੰਗ – ਨੰਬਰ 4
ਸਿੰਗਲਜ਼ ਭਾਰਤੀ ਰੈਂਕਿੰਗ ਵਿੱਚ ਸ਼ੁਭਮ ਲਗਾਤਾਰ ਨੰਬਰ 1 ਸਥਾਨ 'ਤੇ ਬਣੇ ਹੋਏ ਹਨ
10 ਵਾਰ ਦੇ ਰਾਸ਼ਟਰੀ ਚੈਂਪੀਅਨ, 18+ ਅੰਤਰਰਾਸ਼ਟਰੀ ਤਗਮੇ
ਸ਼ੁਭਮ ਹੁਣ ਤੱਕ 10 ਵਾਰ ਰਾਸ਼ਟਰੀ ਸੋਨ ਤਗਮਾ ਜਿੱਤ ਚੁੱਕੇ ਹਨ ਅਤੇ ਭਾਰਤ ਲਈ 18 ਤੋਂ ਵੱਧ ਅੰਤਰਰਾਸ਼ਟਰੀ ਤਗਮੇ ਜਿੱਤ ਕੇ ਦੇਸ਼ ਦਾ ਨਾਮ ਰੌਸ਼ਨ ਕਰ ਚੁੱਕੇ ਹਨ। ਉਨ੍ਹਾਂ ਦੇ ਖਾਤੇ ਵਿੱਚ ਮਾਰਚ 2023 ਦੇ UTT ਪੈਰਾ ਟੇਬਲ ਟੈਨਿਸ ਨੈਸ਼ਨਲ ਚੈਂਪੀਅਨਸ਼ਿਪ ਦੇ ਤਿੰਨ ਸੋਨ ਤਗਮੇ, ਨਵੰਬਰ 2023 ਦੀ UTT ਨੈਸ਼ਨਲ ਰੈਂਕਿੰਗ ਚੈਂਪੀਅਨਸ਼ਿਪ ਦਾ ਸੋਨ, ਜੁਲਾਈ 2024 ਵਿੱਚ ITTF Fa40 ਥਾਈਲੈਂਡ ਪੈਰਾ ਓਪਨ ਦਾ ਮਿਕਸਡ ਡਬਲਜ਼ ਸੋਨ ਤਗਮਾ, ਅਤੇ ਖੇਲੋ ਇੰਡੀਆ ਪੈਰਾ ਗੇਮਜ਼ ਦਾ ਸੋਨ ਤਗਮਾ ਵੀ ਸ਼ਾਮਲ ਹੈ। ਇਸ ਤੋਂ ਇਲਾਵਾ ਉਹ ਯੂਗਾਂਡਾ ਪੈਰਾ ਬੈਡਮਿੰਟਨ ਇੰਟਰਨੈਸ਼ਨਲ ਵਿੱਚ ਸਿੰਗਲਜ਼ ਅਤੇ ਡਬਲਜ਼ ਵਿੱਚ ਦੋ ਚਾਂਦੀ ਦੇ ਤਗਮੇ ਵੀ ਜਿੱਤ ਚੁੱਕੇ ਹਨ।
ਹਾਦਸੇ ਨੇ ਸਰੀਰ ਨੂੰ ਹਰਾਇਆ, ਹੌਸਲੇ ਨੂੰ ਨਹੀਂ
2016 ਦਾ ਸੜਕ ਹਾਦਸਾ ਸ਼ੁਭਮ ਦੀ ਜ਼ਿੰਦਗੀ ਦਾ ਸਭ ਤੋਂ ਔਖਾ ਦੌਰ ਸੀ। ਰੀੜ੍ਹ ਦੀ ਹੱਡੀ ਦੀ ਗੰਭੀਰ ਸੱਟ ਅਤੇ ਅਸਥਾਈ ਅਧਰੰਗ ਕਾਰਨ ਉਹ ਲਗਭਗ ਤਿੰਨ ਸਾਲ ਬਿਸਤਰੇ 'ਤੇ ਰਹੇ। ਇਸ ਦੌਰਾਨ ਮਾਨਸਿਕ ਤੌਰ 'ਤੇ ਵੀ ਵੱਡੀਆਂ ਚੁਣੌਤੀਆਂ ਸਾਹਮਣੇ ਆਈਆਂ, ਪਰ ਦੋਸਤਾਂ ਨੇ ਉਨ੍ਹਾਂ ਨੂੰ ਟੇਬਲ ਟੈਨਿਸ ਪ੍ਰਤੀ ਆਪਣੇ ਪੁਰਾਣੇ ਜਨੂੰਨ ਦੀ ਯਾਦ ਦਿਵਾਈ। 2019-20 ਵਿੱਚ ਜਦੋਂ ਉਹ ਟੇਬਲ 'ਤੇ ਵਾਪਸ ਆਏ, ਤਾਂ ਇਸ ਨੇ ਉਨ੍ਹਾਂ ਨੂੰ ਇੱਕ ਬਿਲਕੁਲ ਨਵੀਂ ਜ਼ਿੰਦਗੀ ਦੀ ਸ਼ੁਰੂਆਤ ਦਿੱਤੀ।
ਪੜ੍ਹਾਈ ਅਤੇ ਸਿਖਲਾਈ: ਭਾਵੀਨਾ ਪਟੇਲ ਨਾਲ ਇੱਕੋ ਟੇਬਲ 'ਤੇ ਅਭਿਆਸ
ਸ਼ੁਭਮ ਲਵਲੀ ਪ੍ਰੋਫੈਸ਼ਨਲ ਯੂਨੀਵਰਸਿਟੀ (LPU) ਵਿੱਚ ਕੰਪਿਊਟਰ ਸਾਇੰਸ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰ ਰਹੇ ਹਨ, ਜਿੱਥੇ ਉਨ੍ਹਾਂ ਨੂੰ ਰੀੜ੍ਹ ਦੀ ਹੱਡੀ ਦੀ ਸੱਟ ਵਾਲੇ ਵਿਦਿਆਰਥੀਆਂ ਲਈ 100 ਫੀਸਦੀ ਸਕਾਲਰਸ਼ਿਪ ਦਿੱਤੀ ਗਈ ਸੀ। ਉਹ ਗਾਂਧੀਨਗਰ (ਗੁਜਰਾਤ) ਸਥਿਤ ਖੇਡਾਂ ਅਥਾਰਟੀ ਆਫ ਇੰਡੀਆ (SAI) ਦੇ ਨੈਸ਼ਨਲ ਸੈਂਟਰ ਆਫ ਐਕਸੀਲੈਂਸ ਵਿੱਚ ਸਿਖਲਾਈ ਲੈਂਦੇ ਹਨ, ਜਿੱਥੇ ਉਹ ਅਰਜੁਨ ਅਵਾਰਡੀ ਅਤੇ ਵਿਸ਼ਵ ਦੀ ਸਾਬਕਾ ਨੰਬਰ-1 ਖਿਡਾਰਨ ਭਾਵੀਨਾ ਪਟੇਲ (ਟੋਕੀਓ ਪੈਰਾਲੰਪਿਕਸ ਦੀ ਚਾਂਦੀ ਤਗਮਾ ਜੇਤੂ) ਨਾਲ ਅਭਿਆਸ ਸੈਸ਼ਨ ਸਾਂਝੇ ਕਰਦੇ ਹਨ। ਇਹੀ SAI ਗਾਂਧੀਨਗਰ ਸੈਂਟਰ ਪਿਛਲੇ ਕੁਝ ਸਾਲਾਂ ਵਿੱਚ ਭਾਰਤੀ ਪੈਰਾ-ਸਪੋਰਟਸ ਦੀ ਇੱਕ ਵੱਡੀ ਖੇਪ ਤਿਆਰ ਕਰਨ ਵਾਲੀ ਥਾਂ ਬਣ ਗਿਆ ਹੈ।
ਪਰਿਵਾਰ, ਸਹਿਯੋਗੀ ਅਤੇ ਪ੍ਰਸ਼ਾਸਨ ਦੀ ਹਮਾਇਤ
ਸ਼ੁਭਮ ਦੀ ਕਾਮਯਾਬੀ ਦੇ ਪਿੱਛੇ ਉਨ੍ਹਾਂ ਦੇ ਪਰਿਵਾਰ ਦਾ ਵੱਡਾ ਯੋਗਦਾਨ ਹੈ। ਵੱਡੇ ਭਰਾ ਅੰਕੁਸ਼ ਵਿਦੇਸ਼ੀ ਟੂਰਨਾਮੈਂਟਾਂ ਵਿੱਚ ਸਾਥ ਦਿੰਦੇ ਹਨ ਅਤੇ ਲੌਜਿਸਟਿਕਸ ਸੰਭਾਲਦੇ ਹਨ, ਜਦਕਿ ਮਾਤਾ-ਪਿਤਾ ਘਰ ਵਿੱਚ ਭਾਵਨਾਤਮਕ ਸਹਾਰਾ ਬਣੇ ਰਹਿੰਦੇ ਹਨ। ਹਰ ਵੱਡੇ ਟੂਰਨਾਮੈਂਟ ਤੋਂ ਬਾਅਦ ਸ਼ੁਭਮ ਲੁਧਿਆਣਾ ਦੇ ਡਿਪਟੀ ਕਮਿਸ਼ਨਰ ਹਿਮਾਂਸ਼ੂ ਜੈਨ, ਸਹਾਇਕ ਕਮਿਸ਼ਨਰ (ਜਨਰਲ) ਪਾਇਲ ਗੋਇਲ, ਇੰਡੀਅਨ ਰੈੱਡ ਕਰਾਸ ਸੋਸਾਇਟੀ ਦੇ ਸਕੱਤਰ ਨਵਨੀਤ ਜੋਸ਼ੀ, ਐਕਟ ਹਿਊਮਨ ਫਾਊਂਡੇਸ਼ਨ ਦੀ ਹਰਲੀਨ ਕੌਰ ਅਤੇ ਪ੍ਰਾਈਮ ਸਟੀਲ ਪ੍ਰੋਸੈਸਰ ਦੇ ਦੇਵਾਕਰ ਜੈਨ ਸਮੇਤ ਆਪਣੇ ਸਹਿਯੋਗੀਆਂ ਦਾ ਧੰਨਵਾਦ ਕਰਨਾ ਨਹੀਂ ਭੁੱਲਦੇ, ਜਿਨ੍ਹਾਂ ਦੀ ਸਪਾਂਸਰਸ਼ਿਪ ਉਪਕਰਣਾਂ ਅਤੇ ਯਾਤਰਾ ਦੇ ਖਰਚੇ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦੀ ਹੈ। ਲੁਧਿਆਣਾ ਜ਼ਿਲ੍ਹਾ ਟੇਬਲ ਟੈਨਿਸ ਐਸੋਸੀਏਸ਼ਨ ਦੇ ਪ੍ਰਧਾਨ ਐਚ.ਐਸ. ਛਾਤਵਾਲ ਅਤੇ ਜਨਰਲ ਸਕੱਤਰ ਮਨਮੀਤ ਸਿੰਘ ਵੀ ਸ਼ੁਭਮ ਦੀ ਹਰ ਪ੍ਰਾਪਤੀ 'ਤੇ ਉਨ੍ਹਾਂ ਦਾ ਹੌਸਲਾ ਵਧਾਉਂਦੇ ਰਹੇ ਹਨ।
ਖੇਡ ਤੋਂ ਪਰੇ: ਸਮਾਜ ਸੇਵਾ ਅਤੇ ਸ਼ੌਕ
ਖੇਡਾਂ ਦੇ ਨਾਲ-ਨਾਲ ਸ਼ੁਭਮ ਵਿਕਲਾਂਗ ਵਿਅਕਤੀਆਂ (PWD) ਲਈ ਜ਼ਿਲ੍ਹਾ ਆਈਕਨ ਵਜੋਂ ਵੀ ਸੇਵਾ ਨਿਭਾ ਚੁੱਕੇ ਹਨ ਅਤੇ ਲੋਕ ਸਭਾ ਚੋਣਾਂ ਦੌਰਾਨ PWD ਵੋਟਰਾਂ ਨੂੰ ਆਪਣੇ ਵੋਟਿੰਗ ਅਧਿਕਾਰਾਂ ਦੀ ਵਰਤੋਂ ਲਈ ਪ੍ਰੇਰਿਤ ਕਰ ਚੁੱਕੇ ਹਨ। ਖੇਡ ਦੇ ਮੈਦਾਨ ਤੋਂ ਬਾਹਰ ਉਹ ਫਿਟਨੈੱਸ, ਨਵੇਂ ਖਿਡਾਰੀਆਂ ਨਾਲ ਆਪਣਾ ਤਜਰਬਾ ਸਾਂਝਾ ਕਰਨਾ, ਪ੍ਰੇਰਣਾਦਾਇਕ ਕਿਤਾਬਾਂ ਪੜ੍ਹਨਾ ਅਤੇ ਆਪਣੇ ਖੇਡ ਦੇ ਵੀਡੀਓਜ਼ ਦਾ ਵਿਸ਼ਲੇਸ਼ਣ ਕਰਨਾ ਪਸੰਦ ਕਰਦੇ ਹਨ। ਯੂਨੀਵਰਸਿਟੀ ਦੇ ਦਿਨਾਂ ਦੌਰਾਨ ਉਨ੍ਹਾਂ ਨੇ ਵ੍ਹੀਲਚੇਅਰ ਮਾਡਲਿੰਗ ਵਿੱਚ ਵੀ ਦਿਲਚਸਪੀ ਲਈ ਸੀ।
ਯਾਦਗਾਰੀ ਪਲ – ਇੱਕ ਨਜ਼ਰ ਵਿੱਚ
2019-20: ਹਾਦਸੇ ਤੋਂ ਬਾਅਦ ਖੇਡਾਂ ਵਿੱਚ ਵਾਪਸੀ
2022: ਪਹਿਲਾ ਰਾਸ਼ਟਰੀ ਸੋਨ ਤਗਮਾ
ਮਾਰਚ 2023: UTT ਪੈਰਾ ਟੇਬਲ ਟੈਨਿਸ ਨੈਸ਼ਨਲ ਚੈਂਪੀਅਨਸ਼ਿਪ ਵਿੱਚ ਤਿੰਨ ਸੋਨ ਤਗਮੇ
ਨਵੰਬਰ 2023: UTT ਨੈਸ਼ਨਲ ਰੈਂਕਿੰਗ ਚੈਂਪੀਅਨਸ਼ਿਪ ਸੋਨ ਤਗਮਾ
ਜੁਲਾਈ 2024: ITTF Fa40 ਥਾਈਲੈਂਡ ਪੈਰਾ ਓਪਨ, ਮਿਕਸਡ ਡਬਲਜ਼ ਸੋਨ ਤਗਮਾ
ਨਵੰਬਰ 2025: ITTF ਵਿਸ਼ਵ ਪੈਰਾ ਚੈਲੰਜਰ, ਮਿਸਰ – ਚਾਂਦੀ ਤਗਮਾ
ਫਰਵਰੀ 2026: ITTF ਵਿਸ਼ਵ ਪੈਰਾ ਫਿਊਚਰ, ਗੋਲਡ ਕੋਸਟ – ਸਿੰਗਲਜ਼ ਸੋਨ ਤਗਮਾ
ਮਾਰਚ 2026: ITTF ਵਿਸ਼ਵ ਪੈਰਾ ਫਿਊਚਰ, ਕੋਸਟਾ ਬ੍ਰਾਵਾ (ਸਪੇਨ) – ਮਿਕਸਡ ਡਬਲਜ਼ ਕਾਂਸੀ ਤਗਮਾ
ਮਈ 2026: ITTF ਵਿਸ਼ਵ ਪੈਰਾ ਏਲੀਟ, ਤਾਈਪੇ ਸਿਟੀ – ਮਿਕਸਡ ਡਬਲਜ਼ ਚਾਂਦੀ, ਸਿੰਗਲਜ਼ ਕਾਂਸੀ
ਜੁਲਾਈ 2026: ITTF ਵਿਸ਼ਵ ਪੈਰਾ ਏਲੀਟ, ਨਾਖੋਨ ਰਤਚਾਸੀਮਾ – ਮਿਕਸਡ ਡਬਲਜ਼ ਕਾਂਸੀ (ਏਲੀਟ ਪੱਧਰ 'ਤੇ ਤਗਮਾ ਜਿੱਤਣ ਵਾਲੇ ਪਹਿਲੇ ਭਾਰਤੀ ਪੁਰਸ਼)
ਅਗਲਾ ਟੀਚਾ: ਏਸ਼ੀਆਈ ਖੇਡਾਂ ਤੋਂ ਪੈਰਾਲੰਪਿਕ ਪੋਡੀਅਮ ਤੱਕ
ਸ਼ੁਭਮ ਦਾ ਅਗਲਾ ਨਿਸ਼ਾਨਾ ਜਾਪਾਨ ਵਿਖੇ ਹੋਣ ਵਾਲੀਆਂ 2026 ਏਸ਼ੀਆਈ ਪੈਰਾ ਖੇਡਾਂ ਵਿੱਚ ਤਗਮਾ ਜਿੱਤਣਾ, ਥਾਈਲੈਂਡ ਵਿਖੇ ਹੋਣ ਵਾਲੀ 2026 ਵਿਸ਼ਵ ਚੈਂਪੀਅਨਸ਼ਿਪ ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨਾ, ਅਤੇ 2028 ਦੀਆਂ ਪੈਰਾਲੰਪਿਕ ਖੇਡਾਂ ਵਿੱਚ ਭਾਰਤ ਲਈ ਤਗਮਾ ਜਿੱਤਣਾ ਹੈ। ਇਸ ਮਕਸਦ ਲਈ ਉਹ ਗਾਂਧੀਨਗਰ ਦੇ SAI ਸੈਂਟਰ ਵਿੱਚ ਹਰ ਰੋਜ਼ ਸਖ਼ਤ ਮਿਹਨਤ ਕਰ ਰਹੇ ਹਨ।
2028 ਪੈਰਾਲੰਪਿਕ ਵਿੱਚ ਭਾਰਤ ਲਈ ਤਗਮਾ
ਸ਼ੁਭਮ ਦਾ ਸੰਦੇਸ਼
"ਸਰੀਰ ਦੀ ਅਪਾਹਜਤਾ ਕਦੇ ਵੀ ਸੁਪਨਿਆਂ ਨੂੰ ਅਪਾਹਜ ਨਹੀਂ ਬਣਾ ਸਕਦੀ। ਜੇ ਹੌਸਲਾ ਜ਼ਿੰਦਾ ਹੋਵੇ ਤਾਂ ਵ੍ਹੀਲਚੇਅਰ ਵੀ ਇਨਸਾਨ ਨੂੰ ਦੁਨੀਆ ਦੇ ਸਭ ਤੋਂ ਉੱਚੇ ਮੰਚ ਤੱਕ ਲੈ ਜਾ ਸਕਦੀ ਹੈ।"
- Download Babushahi App
-
-
