ਰਾਵੀ ਦਾ ਕਹਿਰ; ਘਰ ਛੱਡ ਕੇ ਜਾਣ ਨੂੰ ਮਜਬੂਰ ਹੋਏ ਲੋਕ
ਰੋਹਿਤ ਗੁਪਤਾ
ਗੁਰਦਾਸਪੁਰ 28 ਅਗਸਤ 2025- ਰਾਵੀ ਦਰਿਆ ਵਿੱਚ ਜਿੱਥੇ ਬਾਉਪੂਰ ਜੱਟਾਂ ਦਾ ਧੁੱਸੀ ਬੰਨ ਟੁੱਟਣ ਕਾਰਨ ਗਾਹਲੜੀ , ਸੱਦਾ, ਸੇਖਾਂ, ਗੰਜੀ ,ਮਗਰਮੁੱਦਿਆਂ ਤੱਕ ਦੇ ਪਿੰਡ ਇਸਦੀ ਚਪੇਟ ਵਿੱਚ ਆਏ ਉੱਥੇ ਹੀ ਪਾਣੀ ਤੇਜ਼ੀ ਨਾਲ ਕਲਾਨੌਰ ਸਾਈਡ ਤੇ ਵੱਧਦਾ ਹੋਇਆ ਸੈਂਕੜਿਆਂ ਪਿੰਡਾਂ ਨੂੰ ਆਪਣੀ ਚਪੇਟ ਵਿੱਚ ਲੈਂਦਾ ਹੋਇਆ ਕਿਰਨ ਨਾਲੇ ਵਿੱਚ ਜਾ ਮਿਲਿਆ ਹੈ। ਦੱਸ ਦਈਏ ਕਿ ਕਿਰਨ ਨਾਲਾ ਅੱਗੇ ਜਾ ਕੇ ਮੁੜ ਤੋਂ ਰਾਵੀ ਵਿੱਚ ਮਿਲ ਜਾਂਦਾ ਹੈ। ਹਾਲਾਂਕਿ ਉੱਚੇ ਇਲਾਕਿਆਂ ਵਿੱਚ ਇਸ ਪਾਣੀ ਨੇ ਸਿਰਫ ਖੇਤਾਂ ਨੂੰ ਹੀ ਆਪਣੀ ਚਪੇਟ ਵਿੱਚ ਲਿਆ ਪਰ ਕੁਝ ਇੱਕ ਨੀਵੇਂ ਇਲਾਕਿਆਂ ਦੇ ਲੋਕਾਂ ਨੂੰ ਪਾਣੀ ਦੀ ਬਹੁਤ ਮਾਰ ਝੱਲਣੀ ਪਈ ਹੈ। ਕੁਝ ਲੋਕ ਘਰਾਂ ਦੇ ਚੁਬਾਰਿਆਂ ਤੇ ਚੜੇ ਹਨ ਅਤੇ ਕੁਝ ਆਪਣਾ ਸਮਾਨ ਲੈ ਕੇ ਪਿੰਡ ਖਾਲੀ ਕਰ ਰਹੇ ਹਨ। ਪਿੰਡ ਚੱਗੂਵਾਲ, ਸਿੰਘੋਵਾਲ ,ਦਾਖਲਾ, ਬਲੱਗਣ ਸਮੇਤ ਨੇੜੇ ਤੇੜੇ ਦੇ 35 ਪਿੰਡ ਹੜ ਦੇ ਪਾਣੀ ਨਾਲ ਘਿਰੇ ਹਨ ਅਤੇ ਕੁਝ ਲੋਕ ਆਪਣੇ ਘਰ ਖਾਲੀ ਕਰਕੇ ਉੱਚੇ ਇਲਾਕਿਆਂ ਵਿੱਚ ਜਾਣ ਲਈ ਮਜਬੂਰ ਹੋ ਗਏ ਹਨ।