ਭਾਰਤੀ ਸਾਹਿੱਤ ਅਕਾਡਮੀ ਦਿੱਲੀ ਵੱਲੋਂ ਸਵਰਗੀ ਕਵੀ ਸੁਰਜੀਤ ਰਾਮਪੁਰੀ ਦੀ ਸ਼ਾਇਰੀ ਤੇ ਜੀਵਨ ਬਾਰੇ ਸਾਹਿਤਕ ਸਮਾਗਮ
ਰਾਮਪੁਰਃ 7ਅਕਤੂਬਰ
ਭਾਰਤੀ ਸਾਹਿਤ ਅਕੈਡਮੀ ਦਿੱਲੀ ਵੱਲੋਂ ਪੰਜਾਬੀ ਲਿਖਾਰੀ ਸਭਾ ਰਾਮਪੁਰ ਦੇ ਸਹਿਯੋਗ ਨਾਲ ਰਾਮਪੁਰ ਦੇ ਜੰਮਪਲ ਤੇ ਪੰਜਾਬੀ ਦੇ ਸਿਰਮੌਰ ਸਰੋਦੀ ਕਵੀ ਸੁਰਜੀਤ ਰਾਮਪੁਰੀ ਦੀ ਕਾਵਿ-ਕਲਾ ਅਤੇ ਜੀਵਨ ਬਾਰੇ ਇਕ ਵਿਸ਼ੇਸ਼ ਸਮਾਗਮ ਗੁਰਚਰਨ ਰਾਮਪੁਰੀ ਲਾਇਬਰੇਰੀ ਹਾਲ ਵਿੱਚ ਕਰਵਾਇਆ ਗਿਆ।ਪ੍ਰਧਾਨਗੀ ਨਾਵਲਕਾਰ ਤੇ ਕਹਾਣੀਕਾਰ ਬਲਜਿੰਦਰ ਨਸਰਾਲੀ ਪ੍ਰੋਫੈਸਰ,ਦਿੱਲੀ ਯੂਨੀਵਰਸਿਟੀ ਦਿੱਲੀ ਨੇ ਕੀਤੀ।
ਸਮਾਗਮ ਦੀ ਸ਼ੁਰੂਆਤ ਪੰਜਾਬੀ ਦੇ ਬਹੁਪੱਖੀ ਲੇਖਕ ਅਤੇ ਭਾਰਤੀ ਸਾਹਿਤ ਅਕੈਡਮੀ ਦਿੱਲੀ ਦੀ ਗਵਰਨਿੰਗ ਕੌਂਸਲ ਦੇ ਮੈਂਬਰ ਬੂਟਾ ਸਿੰਘ ਚੌਹਾਨ ਵੱਲੋਂ ਅਕੈਡਮੀ ਦੇ ਪੰਜਾਬ ਵਿਚ ਹੋਏ ਤੇ ਹੋਣ ਵਾਲ਼ੇ ਸਮਾਗਮਾਂ ਦੀ ਜਾਣਕਾਰੀ ਦੇਣ ਉਪਰੰਤ ਹੋਈ।
ਸਭਾ ਦੇ ਸਰਪ੍ਰਸਤ ਤੇ ਪੰਜਾਬੀ ਕਵੀ ਜਸਵੀਰ ਝੱਜ ਨੇ ਸਭਨਾਂ ਨੂੰ ਜੀ ਆਇਆਂ ਕਿਹਾ।
ਸਮਾਗਮ ਦੀ ਸ਼ੁਰੂਆਤ ਕਰਦਿਆਂ ਪੰਜਾਬੀ ਅਕੈਡਮੀ ਲੁਧਿਆਣਾ ਦੇ ਸਾਬਕਾ ਪ੍ਰਧਾਨ ਅਤੇ ਸ਼ਾਇਰ ਡਾ. ਲਖਵਿੰਦਰ ਸਿੰਘ ਜੌਹਲ ਨੇ ਕਿਹਾ ਕਿ ਮੈਂ ਸੁਰਜੀਤ ਰਾਮਪੁਰੀ ਜੀ ਦਾ ਜਨੂੰਨੀ ਕਦਰਦਾਨ ਸੀ। ਦੂਰਦਰਸ਼ਨ ਜਲੰਧਰ 'ਤੇ ਸੇਵਾ ਨਿਭਾਉਂਦਿਆਂ ਮੈਂ ਸੁਰਜੀਤ ਰਾਮਪੁਰੀ ਦੇ ਚਰਚਿਤ ਗੀਤ ਜਗਜੀਤ ਜੀਰਵੀ ਤੇ ਹੋਰ ਗਾਇਕਾਂ ਦੀ ਆਵਾਜ਼ ਵਿਚ ਰਿਕਾਰਡ ਕਰਵਾਏ ਅਤੇ ਉਨ੍ਹਾਂ ਦੇ ਜੀਵਨ ਅਤੇ ਕਾਵਿ-ਕਲਾ ਦੇ ਆਧਾਰ 'ਤੇ ਇਕ ਦਸਤਾਵੇਜ਼ੀ ਫ਼ਿਲਮ ਵੀ ਬਣਾਈ। ਉਹ ਪੰਜਾਬੀ ਦੇ ਬੜੇ ਨਫੀਸ ਤੇ ਪਰਪੱਕ ਸ਼ਾਇਰ ਸਨ।
ਸਾਬਕਾ ਪ੍ਹਿੰਸੀਪਲ ਡਾ. ਗੁਰਜੰਟ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦੇ ਗੀਤਾਂ ਵਿਚ ਲੋਕ ਗੀਤਾਂ ਵਰਗੀ ਨਫ਼ਾਸਤ ਹੈ ਅਤੇ ਮਨੁੱਖੀ ਜਜ਼ਬਿਆਂ ਦੀ ਮਾਰਮਿਕ ਪੇਸ਼ਕਾਰੀ ਹੈ। ਉਨ੍ਹਾਂ ਦੀ ਸਮੁੱਚੀ ਕਵਿਤਾ ਉਨ੍ਹਾਂ ਦੇ ਵੇਲੇ ਦੇ ਸਮੇਂ ਨੂੰ ਗੰਢਾਂ ਮਾਰਨ ਵਾਲ਼ੀ ਹੈ। ਉਨ੍ਹਾਂ ਨੇ ਲੰਘਦੇ ਸਮੇਂ ਨੂੰ ਆਪਣੀ ਕਾਵਿਕ ਸਮਰੱਥਾ ਨਾਲ ਆਉਣ ਵਾਲੀ ਪੀੜ੍ਹੀ ਲਈ ਮਹਿਫੂਜ਼ ਕਰ ਦਿੱਤਾ ਹੈ। ਮੁਕੰਦਪੁਰ ਕਾਲਿਜ ਦੇ ਸਾਬਕਾ ਪ੍ਰਿੰਸੀਪਲ ਤੇ ਪਿੰਡ ਵਾਸੀ ਡਾ. ਸਮਸ਼ਾਦ ਅਲੀ ਨੇ ਸੁਰਜੀਤ ਰਾਮਪੁਰੀ ਦੇ ਚਾਰ ਚਰਚਿਤ ਗੀਤ ਸਾਜ਼ਾਂ ਨਾਲ਼ ਪੇਸ਼ ਕੀਤੇ। ਪੇਸ਼ ਕੀਤੇ ਗੀਤਾਂ ਨੇ ਬੀਤੇ ਕਾਲ ਨੂੰ ਸਜੀਵ ਕਰਕੇ ਹਾਲ ਵਿਚ ਸੰਜ਼ੀਦਗੀ ਵਰਤਾ ਦਿੱਤੀ। ਉਨ੍ਹਾਂ ਨੇ ਰਾਮਪੁਰੀ ਦਾ ਰੇਖਾ ਚਿੱਤਰ ਵੀ ਪੜ੍ਹਿਆ ਅਤੇ ਉਨ੍ਹਾਂ ਦੀ ਸਮੁੱਚੀ ਸ਼ਾਇਰੀ ਨੂੰ ਮਨੁੱਖੀ ਜਜ਼ਬਿਆਂ ਦਾ ਸ਼ੀਰਾਜ਼ਾ ਵੀ ਕਿਹਾ। ਬੂਟਾ ਸਿੰਘ ਚੌਹਾਨ ਨੇ ਕਿਹਾ ਕਿ ਰਾਮਪੁਰੀ ਦੇ ਗੀਤਾਂ ਵਿਚ ਸੰਗੀਤ ਡੁੱਲ੍ਹ -ਡੁੱਲ੍ਹ ਪੈਂਦਾ ਸੀ, ਤਦੇ ਉਨ੍ਹਾਂ ਹੀ ਉਨ੍ਹਾਂ ਦੇ ਗੀਤ ਨਰਿੰਦਰ ਬੀਬਾ, ਡੌਲੀ ਗੁਲੇਰੀਆ,ਜਗਜੀਤ ਜੀਰਵੀ ਅਤੇ ਹੋਰ ਪ੍ਹਸਿੱਧ ਗਾਇਕਾਂ ਨੇ ਗਾਏ। ਬਲਜਿੰਦਰ ਨਸਰਾਲੀ ਨੇ ਪ੍ਰਧਾਨਗੀ ਭਾਸ਼ਨ ਦਿੰਦਿਆਂ ਅਕੈਡਮੀ ਵੱਲੋਂ ਪ੍ਰਸਿੱਧ ਲੇਖਕਾਂ ਦੇ ਪਿੰਡਾਂ ਵਿਚ ਜਾ ਕੇ ਉਥੇ ਸਮਾਗਮ ਕਰਨ ਦੀ ਸ਼ਲਾਘਾ ਕੀਤੀ, ਉਨ੍ਹਾਂ ਆਪਣੇ ਸਾਹਿਤਕ ਸ਼ੁਰੂਆਤੀ ਦਿਨਾਂ ਨੂੰ ਯਾਦ ਕਰਦਿਆਂ ਕਿਹਾ ਕਿ ਮੈਂ ਰਾਮਪੁਰ ਲਿਖਾਰੀ ਸਭਾ ਦੀਆਂ ਮੀਟਿੰਗਾਂ ਵਿਚ ਆਉਣ ਕਾਰਨ ਹੀ ਵਿਦੇਸ਼ੀ ਸਾਹਿਤ ਦਾ ਅਧਿਐਨ ਕਰਨ ਲੱਗਿਆ ਅਤੇ ਕਲਮ ਨਾਲ਼ ਸਦੀਵੀ ਤੌਰ 'ਤੇ ਪਰਨਾਇਆ ਗਿਆ। ਮੰਚ 'ਤੇ ਸਭਾ ਦੇ ਪ੍ਰਧਾਨ ਗ਼ਜ਼ਲਕਾਰ ਅਮਰਿੰਦਰ ਸਿੰਘ ਸੋਹਲ ਅਤੇ ਪਿੰਡ ਰਾਮਪੁਰ ਦੇ ਸਰਪੰਚ ਜਸਵੰਤ ਸਿੰਘ ਮਾਂਗਟ ਵੀ ਸ਼ਾਮਲ ਹੋਏ ਅਤੇ ਸਭਨਾਂ ਦਾ ਧੰਨਵਾਦ ਵੀ ਕੀਤਾ। ਇਸ ਸਮਾਗਮ ਵਿਚ ਪੰਜਾਬੀ ਕਵੀ ਭਗਵਾਨ ਢਿੱਲੋਂ, ਐਸ ਨਸੀਮ , ਨਿਰੰਜਣ ਸੂਖਮ ਤੋਂ ਇਲਾਵਾ ਹੋਰ ਲੇਖਕਾਂ ਨੇ ਵੀ ਭਾਗ ਲਿਆ।