ਲੁਧਿਆਣਾ: ਮੇਅਰ ਅਤੇ ਭਾਜਪਾ ਕੌਂਸਲਰਾਂ ਵਿਚਾਲੇ ਝਗੜਾ, FIR ਦਰਜ
ਰਵੀ ਜੱਖੂ
ਲੁਧਿਆਣਾ, 03 ਅਗਸਤ 2025- ਲੁਧਿਆਣਾ ਮੇਅਰ ਇੰਦਰਜੀਤ ਕੌਰ ਨੂੰ ਮਿਲਣ ਗਏ ਭਾਜਪਾ ਕੌਂਸਲਰਾਂ ਵਿਚਕਾਰ ਵੱਡਾ ਝਗੜਾ ਹੋ ਗਿਆ। ਇਸ ਝਗੜੇ ਤੋਂ ਬਾਅਦ ਪੁਲਿਸ ਨੇ ਥਾਣਾ ਡਿਵੀਜ਼ਨ ਨੰਬਰ 5 ਵਿੱਚ ਭਾਜਪਾ ਕੌਂਸਲਰਾਂ ਸਮੇਤ 20 ਅਣਪਛਾਤੇ ਲੋਕਾਂ ਖ਼ਿਲਾਫ਼ ਐਫਆਈਆਰ ਦਰਜ ਕਰ ਲਈ ਹੈ। ਮੇਅਰ ਦਫ਼ਤਰ ਵਿੱਚ ਡਿਊਟੀ 'ਤੇ ਤਾਇਨਾਤ ਸੁਦਾਗਰ ਸਿੰਘ ਨੇ ਪੁਲਿਸ ਨੂੰ ਦਿੱਤੀ ਸ਼ਿਕਾਇਤ ਵਿੱਚ ਲਿਖਿਆ ਕਿ ਉਹ ਮੇਅਰ ਇੰਦਰਜੀਤ ਕੌਰ ਦੇ ਦਫ਼ਤਰ ਵਿੱਚ ਜ਼ੋਨ-ਡੀ ਵਿੱਚ ਡਿਊਟੀ 'ਤੇ ਤਾਇਨਾਤ ਸੀ। ਫਿਰ ਭਾਜਪਾ ਕੌਂਸਲਰਾਂ ਨੇ ਮੈਡਮ ਨੂੰ ਮਿਲਣ ਲਈ ਸਮਾਂ ਲਿਆ। ਜਦੋਂ ਕੁਲਵੰਤ ਸਿੰਘ, ਵਿਸ਼ਾਲ ਗੁਲਾਟੀ, ਜਤਿੰਦਰ ਗੋਰਾਇਣ, ਮੁਕੇਸ਼ ਖੱਤਰੀ ਅਤੇ 20 ਹੋਰ ਅਣਪਛਾਤੇ ਵਿਅਕਤੀ ਮੇਅਰ ਦੇ ਦਫ਼ਤਰ ਪੁੱਜੇ ਤਾਂ, ਉਨ੍ਹਾਂ ਨੇ ਹੰਗਾਮਾ ਕਰਨਾ ਸ਼ੁਰੂ ਕਰ ਦਿੱਤਾ। ਇਸ ਮਾਮਲੇ ਦੇ ਸਬੰਧ ਵਿੱਚ ਪੁਲਿਸ ਨੇ ਮੁਲਜ਼ਮ ਕੁਲਵੰਤ ਸਿੰਘ ਕਾਂਤੀ, ਵਿਸ਼ਾਲ ਗੁਲਾਟੀ, ਜਤਿੰਦਰ ਗੋਰਾਇਣ, ਮੁਕੇਸ਼ ਖੱਤਰੀ ਅਤੇ ਗੌਰਵਜੀਤ ਗੋਰਾ ਸਮੇਤ 20 ਹੋਰਾਂ ਖ਼ਿਲਾਫ਼ ਧਾਰਾ 221,132,125(4),351(2)BNS ਤਹਿਤ FIR ਦਰਜ ਕਰ ਲਈ ਹੈ।