ਆਕਾਸ਼ੀ ਚੜ੍ਹੀਆਂ ਹਵਾਈ ਸਫ਼ਰ ਟਿਕਟਾਂ!
ਕੀ ਕਰੀਏ? ਕੀ ਕਰੀਏ?? ਹਵਾਈ ਕਿਰਾਇਆਂ ਵਿੱਚ ਹੋਏ ਭਾਰੀ ਵਾਧੇ ਨੇ ਵਧਾਈ ਯਾਤਰੀਆਂ ਦੀ ਚਿੰਤਾ!
-ਜੈੱਟ ਬਾਲਣ (Jet Fuel) ਦੀਆਂ ਕੀਮਤਾਂ 2025 ਦੀ ਔਸਤ ਨਾਲੋਂ ਲਗਭਗ 70% ਤੱਕ ਉੱਪਰ
ਹਰਜਿੰਦਰ ਸਿੰਘ ਬਸਿਆਲਾ-
ਔਕਲੈਂਡ, 17 ਅਕਤੂਬਰ 2026:- ਨਿਊਜ਼ੀਲੈਂਡ ਵਿੱਚ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਭਾਵੇਂ ਹਵਾਈ ਉਡਾਣਾਂ ਅਤੇ ਸੀਟਾਂ ਦੀ ਗਿਣਤੀ ਵਿੱਚ ਵਾਧਾ ਹੋ ਰਿਹਾ ਹੈ, ਪਰ ਹਵਾਈ ਕਿਰਾਇਆਂ ਵਿੱਚ ਲਗਾਤਾਰ ਹੋ ਰਹੇ ਭਾਰੀ ਵਾਧੇ ਨੇ ਮੁਸਾਫ਼ਰਾਂ ਦੀ ਚਿੰਤਾ ਵਧਾ ਦਿੱਤੀ ਹੈ। ਸਟੈਟਸ ਐਨਜ਼ੈਡ (Stats NZ) ਦੇ ਤਾਜ਼ਾ ਅੰਕੜਿਆਂ ਮੁਤਾਬਕ 31 ਅਗਸਤ ਤੱਕ ਦੇ ਇੱਕ ਸਾਲ ਵਿੱਚ ਅੰਤਰਰਾਸ਼ਟਰੀ ਹਵਾਈ ਕਿਰਾਇਆਂ ਵਿੱਚ 21.5% ਦਾ ਵੱਡਾ ਵਾਧਾ ਦਰਜ ਕੀਤਾ ਗਿਆ ਹੈ, ਜੋ ਕਿ ਅਪ੍ਰੈਲ 2023 ਤੋਂ ਬਾਅਦ ਦਾ ਸਭ ਤੋਂ ਵੱਡਾ ਸਾਲਾਨਾ ਉਛਾਲ ਹੈ।
ਭਾਰਤ, ਏਸ਼ੀਆ ਅਤੇ ਹੋਰ ਅੰਤਰਰਾਸ਼ਟਰੀ ਮੰਜ਼ਿਲਾਂ ਲਈ ਟਿਕਟਾਂ ਬੁੱਕ ਕਰਵਾਉਣ ਵਾਲੇ ਯਾਤਰੀਆਂ ਨੂੰ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਕੀਮਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਐਵੀਏਸ਼ਨ ਵਿਸ਼ਲੇਸ਼ਣ ਸੰਸਥਾ ਸਿਰੀਅਮ (Cirium) ਦੀ ਰਿਪੋਰਟ ਦੱਸਦੀ ਹੈ ਕਿ ਜਨਵਰੀ ਤੋਂ ਜੁਲਾਈ 2026 ਦਰਮਿਆਨ ਔਕਲੈਂਡ ਤੋਂ ਸਿੰਗਾਪੁਰ ਜਾਣ ਵਾਲੇ ਔਸਤ ਇੱਕ ਪਾਸੇ ਦੇ ਕਿਰਾਏ ਵਿੱਚ 14%, ਲਾਸ ਏਂਜਲਸ ਵਿੱਚ 10.1% ਅਤੇ ਦੁਬਈ ਦੇ ਕਿਰਾਏ ਵਿੱਚ 8.1% ਦਾ ਵਾਧਾ ਦੇਖਿਆ ਗਿਆ ਹੈ। ਜਨਵਰੀ ਮਹੀਨੇ ਵਿੱਚ ਸਿੰਗਾਪੁਰ ਦਾ ਕਿਰਾਇਆ ਵਧ ਕੇ NZ$2425 (US$1363) ਅਤੇ ਅਪ੍ਰੈਲ ਵਿੱਚ ਲਾਸ ਏਂਜਲਸ ਦਾ ਕਿਰਾਇਆ NZ$1961 (US$1100) ਤੱਕ ਪਹੁੰਚ ਗਿਆ ਸੀ।
ਏਅਰਲਾਈਨਜ਼ ਅਤੇ ਟਰੈਵਲ ਮਾਹਰਾਂ ਦਾ ਮੰਨਣਾ ਹੈ ਕਿ ਉਡਾਣਾਂ ਵਧਣ ਦੇ ਬਾਵਜੂਦ ਕਿਰਾਏ ਘੱਟ ਹੋਣ ਦੀ ਕੋਈ ਉਮੀਦ ਨਹੀਂ ਹੈ ਕਿਉਂਕਿ ਕੰਪਨੀਆਂ ਦੇ ਸੰਚਾਲਨ ਖ਼ਰਚੇ ਅਸਮਾਨ ਨੂੰ ਛੂਹ ਰਹੇ ਹਨ। ਹਾਊਸ ਆਫ਼ ਟਰੈਵਲ ਦੇ ਮੁੱਖ ਕਾਰਜਕਾਰੀ ਡੇਵਿਡ ਕੂਮਬਸ ਨੇ ਦੱਸਿਆ ਕਿ ਜਹਾਜ਼ਾਂ ਵਿੱਚ ਵਰਤੇ ਜਾਣ ਵਾਲੇ ਜੈੱਟ ਬਾਲਣ (Jet Fuel) ਦੀਆਂ ਕੀਮਤਾਂ 2025 ਦੀ ਔਸਤ ਨਾਲੋਂ ਲਗਭਗ 70% ਤੱਕ ਉੱਪਰ ਚੱਲ ਰਹੀਆਂ ਹਨ। ਇਸ ਤੋਂ ਇਲਾਵਾ ਹਵਾਈ ਅੱਡਿਆਂ ਦੇ ਚਾਰਜ ਅਤੇ ਲੰਬੀ ਦੂਰੀ ਦੀਆਂ ਉਡਾਣਾਂ ਦਾ ਖ਼ਰਚਾ ਵੀ ਲਗਾਤਾਰ ਵਧ ਰਿਹਾ ਹੈ।
ਫਲਾਈਟ ਸੈਂਟਰ ਦੀ ਜਨਰਲ ਮੈਨੇਜਰ ਹਾਈਡੀ ਵਾਕਰ ਨੇ ਵੀ ਚੇਤਾਵਨੀ ਦਿੱਤੀ ਹੈ ਕਿ ਆਉਣ ਵਾਲੇ ਮਹੀਨਿਆਂ ਵਿੱਚ ਕਿਰਾਏ ਘਟਣ ਦੀ ਬਜਾਏ ਹੋਰ 7% ਤੋਂ 8% ਤੱਕ ਮਹਿੰਗੇ ਹੋ ਸਕਦੇ ਹਨ, ਕਿਉਂਕਿ ਏਅਰਲਾਈਨਜ਼ ਆਪਣੇ ਵਧੇ ਹੋਏ ਖ਼ਰਚਿਆਂ ਨੂੰ ਪੂਰਾ ਕਰਨ ਲਈ ਨਵੇਂ ਰੇਟ ਲਾਗੂ ਕਰ ਰਹੀਆਂ ਹਨ। ਮਾਹਰਾਂ ਦੀ ਸਲਾਹ ਹੈ ਕਿ ਵਧਦੇ ਕਿਰਾਇਆਂ ਦੇ ਇਸ ਦੌਰ ਵਿੱਚ ਜੇਕਰ ਤੁਸੀਂ ਆਪਣੀ ਯਾਤਰਾ ਦਾ ਬਜਟ ਕਾਬੂ ਵਿੱਚ ਰੱਖਣਾ ਚਾਹੁੰਦੇ ਹੋ, ਤਾਂ ਆਖ਼ਰੀ ਸਮੇਂ ਦੀ ਉਡੀਕ ਕਰਨ ਦੀ ਬਜਾਏ ਆਪਣੀ ਬੁਕਿੰਗ ਪਹਿਲਾਂ ਹੀ ਪੱਕੀ ਕਰ ਲਓ।
- Download Babushahi App
-
-
