ਹਰੜਾਂ ਨੇ ਰਗੜੇ: ਟੌਰੰਗਾ ਵਿੱਚ ਅਫੀਮ ਤਸਕਰੀ ਗਿਰੋਹ ਦਾ ਪਰਦਾਫਾਸ਼, ਤਿੰਨ ਗ੍ਰਿਫਤਾਰ-ਭਾਰਤ ਤੋਂ ਆਏ ਪਤੰਜਲੀ ਪਾਚਕ ਡੱਬੀਆਂ ਵਿਚ ਨਿਕਲੀ ਅਫੀਮ
-ਪਾਰਸਲ ਯੂਨਾਈਟਿਡ ਕਿੰਗਡਮ ਅਤੇ ਭਾਰਤ ਤੋਂ ਭੇਜੇ ਗਏ
ਹਰਜਿੰਦਰ ਸਿੰਘ ਬਸਿਆਲਾ-
ਔਕਲੈਂਡ, 05 ਅਗਸਤ 2026:-ਟੌਰੰਗਾ ਕ੍ਰਾਈਮ ਇਨਵੈਸਟੀਗੇਸ਼ਨ ਬ੍ਰਾਂਚ ਵੱਲੋਂ ਅਫੀਮ ਦੀ ਦਰਾਮਦ ਅਤੇ ਉਸਦੇ ਵਿਤਰਣ ਵਿਰੁੱਧ ਚਲਾਈ ਗਈ ਇੱਕ ਵਿਸ਼ੇਸ਼ ਜਾਂਚ ਤੋਂ ਬਾਅਦ ਤਿੰਨ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ। 1 ਜੂਨ ਤੋਂ 19 ਜੁਲਾਈ ਦੇ ਵਿਚਕਾਰ ਕਸਟਮਜ਼ ਵਿਭਾਗ ਵੱਲੋਂ ਬਲਾਕ ਬੀ ਸ਼੍ਰੇਣੀ ਦੇ ਇਸ ਨਸ਼ੀਲੇ ਪਦਾਰਥ ਦੀ 24 ਕਿੱਲੋਗ੍ਰਾਮ ਖੇਪ ਜ਼ਬਤ ਕੀਤੇ ਜਾਣ ਤੋਂ ਬਾਅਦ ਪੁਲਿਸ ਨੇ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ ਸੀ। ਇਹ ਨਸ਼ੀਲੇ ਪਦਾਰਥ ਔਕਲੈਂਡ ਵਿੱਚ ਫੜੇ ਗਏ ਸਨ ਪਰ ਇਹ ਵੈਸਟਰਨ ਬੇਅ ਆਫ ਪਲੈਂਟੀ ਵੱਲ ਭੇਜੇ ਜਾ ਰਹੇ ਸਨ। ਇਹ ਪਾਰਸਲ ਯੂਨਾਈਟਿਡ ਕਿੰਗਡਮ ਅਤੇ ਭਾਰਤ ਤੋਂ ਭੇਜੇ ਗਏ ਸਨ। ਪਿਛਲੇ ਹਫਤੇ ਵੀਰਵਾਰ ਅਤੇ ਸ਼ੁੱਕਰਵਾਰ ਨੂੰ ਕੀਤੀ ਗਈ ਅਗਲੇਰੀ ਪੁੱਛਗਿੱਛ ਤੋਂ ਬਾਅਦ ਪੁਲਿਸ ਨੇ ਟੌਰੰਗਾ, ਪਾਪਾਮੋਆ, ਓਮੋਕੋਰੋਆ ਅਤੇ ਟੀ ਪੁਕੀ ਵਿੱਚ 11 ਟਿਕਾਣਿਆਂ ਉੱਤੇ ਛਾਪੇਮਾਰੀ ਕੀਤੀ।
ਪੁਲਿਸ ਨੇ ਵੱਡੀ ਮਾਤਰਾ ਵਿੱਚ ਅਫੀਮ, ਸਟੀਰੌਇਡ, ਨਕਦੀ ਅਤੇ ਇਲੈਕਟਰਾਨਿਕ ਉਪਕਰਣ ਜ਼ਬਤ ਕੀਤੇ ਹਨ। 31 ਅਤੇ 36 ਸਾਲ ਦੀ ਉਮਰ ਦੇ ਦੋ ਪੁਰਸ਼ਾਂ ਉੱਤੇ ਅਫੀਮ ਦਰਾਮਦ ਕਰਨ ਦੇ ਦੋਸ਼ ਲਗਾਏ ਗਏ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਉੱਤੇ ਪਿਛਲੇ 12 ਮਹੀਨਿਆਂ ਦੌਰਾਨ 48 ਕਿੱਲੋਗ੍ਰਾਮ ਅਫੀਮ ਮੰਗਵਾਉਣ ਦਾ ਪ੍ਰਤੀਨਿਧ ਦੋਸ਼ ਸ਼ਾਮਲ ਹੈ, ਜਦੋਂ ਕਿ 38 ਸਾਲਾ ਵਿਅਕਤੀ ਉੱਤੇ ਡਾਕਟਰੀ ਦਵਾਈਆਂ ਰੱਖਣ ਦਾ ਦੋਸ਼ ਲਗਾਇਆ ਗਿਆ ਹੈ। ਇਹ ਤਿੰਨੋਂ ਆਉਣ ਵਾਲੇ ਹਫਤਿਆਂ ਵਿੱਚ ਟੌਰੰਗਾ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਹੋਣਗੇ। ਇਹ ਕਾਰਵਾਈ ਅਪ੍ਰੈਲ 2026 ਵਿੱਚ ਹੋਈ ਇੱਕ ਗ੍ਰਿਫਤਾਰੀ ਤੋਂ ਬਾਅਦ ਅਮਲ ਵਿੱਚ ਆਈ ਹੈ, ਜਦੋਂ ਪੁਲਿਸ ਨੇ ਟੌਰੰਗਾ ਦੇ ਇੱਕ ਪਤੇ ਉੱਤੇ ਛਾਪਾ ਮਾਰ ਕੇ 24 ਕਿੱਲੋਗ੍ਰਾਮ ਅਫੀਮ ਬਰਾਮਦ ਕੀਤੀ ਸੀ।
ਉਸ ਮਾਮਲੇ ਵਿੱਚ ਇੱਕ 38 ਸਾਲਾ ਵਿਅਕਤੀ ਉੱਤੇ ਦਰਾਮਦਗੀ ਦੇ ਦੋਸ਼ ਲਗਾਏ ਗਏ ਸਨ ਅਤੇ ਉਹ ਫਿਲਹਾਲ ਅਦਾਲਤ ਵਿੱਚ ਕੇਸ ਦਾ ਸਾਹਮਣਾ ਕਰ ਰਿਹਾ ਹੈ। ਅਫੀਮ ਬਹੁਤ ਜ਼ਿਆਦਾ ਨਸ਼ੇ ਵਾਲੀ ਹੁੰਦੀ ਹੈ ਅਤੇ ਇਸ ਵਿੱਚ ਜ਼ਹਿਰੀਲੇ ਰਸਾਇਣ ਹੋ ਸਕਦੇ ਹਨ ਜੋ ਸਰੀਰ ਲਈ ਗੰਭੀਰ ਰੂਪ ਵਿੱਚ ਹਾਨੀਕਾਰਕ ਹਨ, ਜੋ ਤੁਹਾਡੇ ਦਿਮਾਗ, ਆਂਦਰਾਂ, ਜਿਗਰ, ਫੇਫੜਿਆਂ, ਗੁਰਦਿਆਂ, ਚਮੜੀ, ਅੱਖਾਂ ਅਤੇ ਰੋਗ ਪ੍ਰਤੀਰੋਧਕ ਪ੍ਰਣਾਲੀ ਨੂੰ ਪ੍ਰਭਾਵਿਤ ਕਰਦੇ ਹਨ। ਅਫੀਮ ਦੀ ਦਰਾਂਮਦ ਅਤੇ ਸਪਲਾਈ ਸਾਡੇ ਲਈ ਚਿੰਤਾ ਦਾ ਦਾਅਵਾ ਹੈ, ਅਤੇ ਅਸੀਂ ਇਸਦੇ ਪਿੱਛੇ ਸ਼ਾਮਲ ਲੋਕਾਂ ਨੂੰ ਨਿਸ਼ਾਨਾ ਬਣਾਉਣਾ ਜਾਰੀ ਰੱਖਾਂਗੇ। ਪੁਲਿਸ ਪ੍ਰਭਾਵਿਤ ਭਾਈਚਾਰੇ ਨਾਲ ਮਿਲ ਕੇ ਕੰਮ ਕਰਨਾ ਜਾਰੀ ਰੱਖ ਰਹੀ ਹੈ। ਕਿਉਂਕਿ ਇਹ ਮਾਮਲਾ ਅਦਾਲਤ ਵਿੱਚ ਹੈ, ਇਸ ਲਈ ਪੁਲਿਸ ਹੋਰ ਕੋਈ ਟਿੱਪਣੀ ਨਹੀਂ ਕਰ ਸਕਦੀ।
- Download Babushahi App
-
-
