NRI ਨੇ ਕਰੀਬ ਕਰੋੜ ਰੁਪਏ ਖਰਚ ਕੇ ਬਦਲ ਦਿੱਤੀ ਆਪਣੇ ਪਿੰਡ ਦੀ ਨੁਹਾਰ
ਪਿੰਡ ਬੂਲੇਵਾਲ ਨੂੰ ਕਰ ਦਿੱਤਾ ਹਰਿਆ ਭਰਿਆ ਖੂਬਸੂਰਤੀ ਦੇਖ ਕੇ ਪੈਂਦਾ ਹੈ ਕਿਸੇ ਵਿਕਸਿਤ ਸ਼ਹਿਰ ਦੀ ਖੂਬਸੂਰਤ ਕਲੋਨੀ ਦਾ ਭੁਲੇਖਾ
ਰੋਹਿਤ ਗੁਪਤਾ
ਗੁਰਦਾਸਪੁਰ : ਇਨ੍ਹੀਂ ਦਿਨਾਂ ਚ ਅਕਸਰ ਲੋਕ ਬੂਟੇ ਲਗਾਉਣ ਲਈ ਅੱਗੇ ਆਉਂਦੇ ਹਨ ਅਤੇ ਸਮਾਜ ਸੇਵੀ ਸੰਸਥਾਵਾ ਵੀ ਵਾਤਾਵਰਨ ਸੰਤੁਲਨ ਲਈ ਬਹੁਤ ਉਪਰਾਲੇ ਕਰਦੀਆਂ ਹਨ ਲੇਕਿਨ ਜ਼ਿਲ੍ਹਾ ਗੁਰਦਾਸਪੁਰ ਦੇ ਪਿੰਡ ਬੂਲੇਵਾਲ ਦੀ ਖੂਬਸੂਰਤੀ ਦੇਖਦਿਆਂ ਹੀ ਬਣਦੀ ਹੈ। ਇਸ ਪਿੰਡ ਨੂੰ ਦੇਖ ਕੇ ਕਿਸੇ ਵਿਕਸਤ ਸ਼ਹਿਰ ਦੀ ਸਭ ਤੋਂ ਖੂਬਸੂਰਤ ਕਲੋਨੀ ਦਾ ਭੁਲੇਖਾ ਪੈਂਦਾ ਹੈ। ਪਿੰਡ ਦੀ ਇਸ ਬਦਲੀ ਨੁਹਾਰ ਪਿੱਛੇ ਪਿੰਡ ਬੂਲੇਵਾਲ ਦੇ ਪ੍ਰਵਾਸੀ ਭਾਰਤੀ ਗੁਰਜੀਤ ਸਿੰਘ ਸਾਬ ਬੂਲੇਵਾਲੀਆ ਦਾ ਯੋਗਦਾਨ ਹੈ ਅਤੇ ਉਸਨੇ ਕਰੀਬ ਇੱਕ ਕਰੋੜ ਰੁਪਏ ਪਿੰਡ ਦੀ ਨੁਹਾਰ ਬਦਲਣ ਲਈ ਆਪਣੇ ਕੋਲੋਂ ਖਰਚ ਕੀਤੇ ਹਨ। ਇਹੀ ਨਹੀਂ ਬਲਕਿ ਉਸ ਐਨਆਰਆਈ ਦੇ ਕੁਦਰਤ ਨਾਲ ਪਿਆਰ ਦੀ ਤਸਵੀਰ ਇਸ ਪਿੰਡ ਚ ਦੇਖਣ ਨੂੰ ਮਿਲਦੀ ਹੈ ਜਿੱਥੇ ਉਸ ਵਲੋ ਅਣਗਿਣਤ ਫਲਦਾਰ, ਫੁੱਲਦਾਰ ਬੂਟੇ ਅਤੇ ਰੁੱਖ ਲਗਾ ਦਿੱਤੇ ਗਏ ਹਨ ।
ਸਾਬ ਬੂਲੇਵਾਲ ਦੇ ਪਰਿਵਾਰ ਵਾਲੇ ਉਸਦੀ ਮਾਤਾ ਮਨਜੀਤ ਕੌਰ ਅਤੇ ਪਿੰਡ ਬੂੱਲੇਵਾਲ ਦੇ ਵਸਨੀਕ ਰਸ਼ਪਾਲ ਸਿੰਘ ਦੱਸਦੇ ਹਨ ਗੁਰਜੀਤ ਸਿੰਘ ਸਾਬ ਪਿਛਲੇ ਲੰਮੇ ਸਮੇਂ ਤੋਂ ਨਾਰਵੇ ਵਿੱਚ ਆਪਣੀ ਮਿਹਨਤ ਦੇ ਬਲਬੂਤੇ ਭਾਵੇਂ ਸਾਹਬ ਤਾਂ ਬਣ ਗਿਆ ਸੀ ਪਰ ਉਸਨੂੰ ਆਪਣੀਆਂ ਜੜ੍ਹਾਂ ਦਾ ਮੋਹ ਆਪਣੇ ਪਿੰਡ ਲਈ ਹਮੇਸ਼ਾਂ ਕੁਝ ਕਰਨ ਦੀ ਪ੍ਰੇਰਨਾ ਦਿੰਦਾ ਰਹਿੰਦਾ ਸੀ।ਸਾਲ 2014 ਵਿੱਚ ਗੁਰਜੀਤ ਸਿੰਘ ਸਾਬ ਬੂਲੇਵਾਲੀਆ ਨੇ ਆਪਣੇ ਪਿੰਡ ਦੀ ਨੁਹਾਰ ਬਦਲਣ ਦਾ ਬੀੜਾ ਚੁੱਕਿਆ ਸੀ ਅਤੇ ਪਿੰਡ ਵਾਲਿਆਂ ਦੇ ਸਹਿਯੋਗ ਨਾਲ ਪਿੰਡ ਵਿੱਚ ਵਿਕਾਸ ਕਾਰਜ ਕਰਵਾਉਣੇ ਸ਼ੁਰੂ ਕਰ ਦਿੱਤੇ। ਸਭ ਤੋਂ ਪਹਿਲਾਂ ਪਿੰਡ ਦੀਆਂ ਸੜਕਾਂ ਕਿਨਾਰੇ ਰੂੜੀਆਂ ਨੂੰ ਚੁੱਕਿਆ ਗਿਆ ਅਤੇ ਸਾਂਝੀਆਂ ਥਾਵਾਂ ਅਤੇ ਸੜਕਾਂ ਕਿਨਾਰੇ ਹਜਾਰਾਂ ਦੇ ਕਰੀਬ ਫ਼ਲਾਂ ਦੇ ਅਤੇ ਛਾਂਦਾਰ ਬੂਟੇ ਲਗਾਏ ਗਏ। ਪਿੰਡ ਦੇ ਖੇਡ ਮੈਦਾਨ ਦੀ ਨੁਹਾਰ ਬਦਲੀ ਗਈ। ਬੱਚਿਆਂ ਦੇ ਖੇਡਣ ਲਈ ਵਧੀਆ ਪਾਰਕਾਂ ਦਾ ਨਿਰਮਾਣ ਕੀਤਾ ਗਿਆ ਅਤੇ ਉਨ੍ਹਾਂ ਵਿੱਚ ਝੂਲੇ ਲਗਾਏ ਗਏ। ਪਿੰਡ ਦੇ ਸ਼ਹੀਦ ਜਵਾਨ ਨਵਜੀਤ ਸਿੰਘ ਦੀ ਯਾਦ ਵਿਚ ਵੀ ਇੱਕ ਖੂਬਸੂਰਤ ਪਾਰਕ ਬਣਾਈ ਗਈ ਹੈ। ਪਿੰਡ ਵਾਸੀਆਂ ਦੇ ਬੈਠਣ ਲਈ ਪਿੰਡ ਦੇ ਵੱਖ-ਵੱਖ ਥਾਵਾਂ ’ਤੇ 65 ਦੇ ਕਰੀਬ ਕੁਰਸੀਆਂ ਅਤੇ ਛੱਤਰੀਆਂ ਲਗਾਈਆਂ ਗਈਆਂ।
ਪਿੰਡ ਦੀ ਡਿਸਪੈਂਸਰੀ ਨੂੰ ਖੂਬਸੂਰਤ ਇਕ ਪਾਰਕ ਦੀ ਦਿੱਖ ਦਿੱਤੀ ਗਈ। ਪਿੰਡ ਦੀ ਹਰ ਗਲੀ-ਮੋੜ ’ਤੇ ਸਾਈਨ ਬੋਰਡ ਲਗਾਏ ਗਏ ਹਨ।ਸਟਰੀਟ ਲਾਈਟਾਂ ਲਗਾਈਆਂ ਗਈਆਂ ਹਨ, ਜਿਨ੍ਹਾਂ ਦੀ ਬਦੌਲਤ ਰਾਤ ਸਮੇਂ ਪਿੰਡ ਪੂਰਾ ਰੁਸ਼ਨਾਉਨਦਾ ਹੈ। ਪਾਰਕਾਂ ਦੀ ਸਾਂਭ-ਸੰਭਾਲ ਲਈ ਇਕ ਮਾਲੀ ਅਤੇ ਇਕ ਵਰਕਰ ਪੱਕੇ ਤੌਰ ’ਤੇ ਰੁੱਖੇ ਹੋਏ ਹਨ ਜਿੰਨਾਂ ਦੀ ਤਨਖਾਹ ਗੁਰਜੀਤ ਸਿੰਘ ਸਾਬ ਬੂਲੇਵਾਲੀਆ ਵਲੋਂ ਦਿੱਤੀ ਜਾਂਦੀ ਹੈ।ਪਿੰਡ ਵਾਲੇ ਅਤੇ ਪਰਿਵਾਰ ਦਾ ਕਹਿਣਾ ਹੈ ਕਿ ਸਾਬ ਬੂਲੇਵਾਲੀਆ ਭਾਂਵੇਂ ਉਹ ਲੰਮੇ ਸਮੇਂ ਤੋਂ ਨਾਰਵੇ ਰਹਿ ਰਹੇ ਹਨ ਪਰ ਉਨ੍ਹਾਂ ਦੀ ਰੂਹ ਅੱਜ ਵੀ ਆਪਣੇ ਪਿੰਡ ਬੂਲੇਵਾਲ ਹੀ ਵੱਸਦੀ ਹੈ। ਉਨ੍ਹਾਂ ਕਿਹਾ ਕਿ ਜਦੋਂ ਉਹ ਯੂਰਪ ਦੇ ਖੂਬਸੂਰਤ ਸ਼ਹਿਰਾਂ ਤੇ ਪਿੰਡਾਂ ਨੂੰ ਦੇਖਦੇ ਸਨ ਤਾਂ ਉਨ੍ਹਾਂ ਦੇ ਮਨ ਵਿੱਚ ਇਹ ਸਵਾਲ ਉੱਠਦਾ ਸੀ ਕਿ ਆਖਰ ਉਨ੍ਹਾਂ ਦੇ ਪਿੰਡ ਕਿਉਂ ਨਹੀਂ ਵਿਕਸਤ ਤੇ ਖੂਬਸੂਰਤ ਹੋ ਸਕਦੇ? ਇਸੇ ਮਕਸਦ ਨੂੰ ਪੂਰਾ ਕਰਨ ਲਈ ਉਨ੍ਹਾਂ ਨੇ ਆਪਣੇ ਪਿੰਡ ਦੀ ਨੁਹਾਰ ਬਦਲਣ ਦੀ ਸੋਚੀ ਸੀ ਅਤੇ ਉਸ ਉੱਪਰ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ। ਓਧਰ ਬੂਲੇਵਾਲ ਪਿੰਡ ਦੇ ਵਸਨੀਕ ਆਪਣੇ ਪਿੰਡ ਦੀ ਬਦਲੀ ਨੁਹਾਰ ਤੋਂ ਬੇਹੱਦ ਖੁਸ਼ ਹਨ।