ਮਸ਼ਹੂਰ ਬਾਲੀਵੁੱਡ ਅਦਾਕਾਰ ਦੀ ਪਤਨੀ ਦਾ ਦੇਹਾਂਤ! 81 ਸਾਲ ਦੀ ਉਮਰ ਵਿੱਚ ਲਿਆ ਆਖ਼ਰੀ ਸਾਹ
ਬਾਬੁਸ਼ਾਹੀ ਬਿਊਰੋ
ਮੁੰਬਈ, 7 ਨਵੰਬਰ 2025: ਬਾਲੀਵੁੱਡ ਦੇ ਮਸ਼ਹੂਰ ਅਦਾਕਾਰ ਸੰਜੈ ਖਾਨ ਦੀ ਪਤਨੀ ਅਤੇ ਪ੍ਰਸਿੱਧ ਸੋਸ਼ਲਾਈਟ ਜ਼ਰੀਨ ਖਾਨ ਦਾ ਸ਼ੁੱਕਰਵਾਰ ਸਵੇਰੇ ਦੇਹਾਂਤ ਹੋ ਗਿਆ। 81 ਸਾਲ ਦੀ ਉਮਰ ਵਿੱਚ ਉਨ੍ਹਾਂ ਨੇ ਮੁੰਬਈ ਸਥਿਤ ਆਪਣੇ ਘਰ ਵਿੱਚ ਆਖ਼ਰੀ ਸਾਹ ਲਿਆ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਪਿਛਲੇ ਕੁਝ ਸਮੇਂ ਤੋਂ ਬੁਢ਼ਾਪੇ ਨਾਲ ਜੁੜੀਆਂ ਬਿਮਾਰੀਆਂ ਨਾਲ ਪੀੜਤ ਸਨ। ਉਨ੍ਹਾਂ ਦੇ ਦੇਹਾਂਤ ਨਾਲ ਖਾਨ ਪਰਿਵਾਰ ਅਤੇ ਪੂਰੇ ਫਿਲਮ ਜਗਤ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ।
ਖਾਨ ਪਰਿਵਾਰ ਵਿੱਚ ਮਾਤਮ ਦਾ ਮਾਹੌਲ
ਜ਼ਰੀਨ ਖਾਨ ਦੇ ਦੇਹਾਂਤ ਤੋਂ ਬਾਅਦ ਪਰਿਵਾਰ ਵਿੱਚ ਉਨ੍ਹਾਂ ਦੇ ਪਤੀ ਸੰਜੈ ਖਾਨ ਅਤੇ ਚਾਰ ਬੱਚੇ — ਧੀਆਂ ਸੁਜ਼ੈਨ ਖਾਨ, ਸਿਮੋਨ ਅਰੋੜਾ, ਫਰਾਹ ਅਲੀ ਖਾਨ ਅਤੇ ਪੁੱਤਰ ਜ਼ਾਇਦ ਖਾਨ ਰਹਿ ਗਏ ਹਨ। ਇਨ੍ਹਾਂ ਵਿੱਚ ਸੁਜ਼ੈਨ ਖਾਨ ਬਾਲੀਵੁੱਡ ਅਦਾਕਾਰ ਹ੍ਰਿਤਿਕ ਰੋਸ਼ਨ ਦੀ ਸਾਬਕਾ ਪਤਨੀ ਅਤੇ ਪ੍ਰਸਿੱਧ ਇੰਟੀਰੀਅਰ ਡਿਜ਼ਾਈਨਰ ਹਨ। ਜਦਕਿ ਜ਼ਾਇਦ ਖਾਨ ਖੁਦ ਇੱਕ ਜਾਣੇ-ਮਾਣੇ ਅਦਾਕਾਰ ਹਨ। ਚਾਰੇ ਬੱਚਿਆਂ ਨੇ ਆਪਣੇ-ਆਪਣੇ ਖੇਤਰਾਂ ਵਿੱਚ ਸਫਲ ਕਰੀਅਰ ਬਣਾਇਆ ਹੈ।
ਅਦਾਕਾਰੀ ਤੋਂ ਇੰਟੀਰੀਅਰ ਡਿਜ਼ਾਈਨਿੰਗ ਤੱਕ ਜ਼ਰੀਨ ਦਾ ਸਫ਼ਰ
ਜ਼ਰੀਨ ਖਾਨ ਨੇ ਫਿਲਮਾਂ ਵਿੱਚ ਵੀ ਕੰਮ ਕੀਤਾ ਸੀ। ਉਨ੍ਹਾਂ ਨੇ ‘ਤੇਰੇ ਘਰ ਕੇ ਸਾਹਮਣੇ’ ਅਤੇ ‘ਇਕ ਫੂਲ ਦੋ ਮਾਲੀ’ ਵਰਗੀਆਂ ਫਿਲਮਾਂ ਵਿੱਚ ਅਦਾਕਾਰੀ ਕੀਤੀ ਸੀ। ਹਾਲਾਂਕਿ ਬਾਅਦ ਵਿੱਚ ਉਨ੍ਹਾਂ ਨੇ ਆਪਣੀ ਤਵੱਜੋ ਪਰਿਵਾਰ ਅਤੇ ਇੰਟੀਰੀਅਰ ਡਿਜ਼ਾਈਨਿੰਗ ਵੱਲ ਦੇ ਦਿੱਤੀ ਸੀ। ਆਪਣੇ ਕੰਮ ਦੇ ਨਾਲ-ਨਾਲ ਉਹ ਆਪਣੇ ਪਤੀ ਸੰਜੈ ਖਾਨ ਲਈ ਹਮੇਸ਼ਾਂ ਇੱਕ ਮਜ਼ਬੂਤ ਸਹਾਰਾ ਬਣੀਆਂ ਰਹੀਆਂ।
ਬਸ ਸਟਾਪ ‘ਤੇ ਸ਼ੁਰੂ ਹੋਈ ਸੀ ਪ੍ਰੇਮ ਕਹਾਣੀ
ਸੰਜੈ ਖਾਨ ਅਤੇ ਜ਼ਰੀਨ ਕਤਰਾਕ ਦੀ ਮੁਲਾਕਾਤ ਕਿਸੇ ਫਿਲਮੀ ਕਹਾਣੀ ਤੋਂ ਘੱਟ ਨਹੀਂ ਸੀ। ਦੋਵੇਂ ਦੀ ਪਹਿਲੀ ਮੁਲਾਕਾਤ ਇੱਕ ਬਸ ਸਟਾਪ ‘ਤੇ ਹੋਈ ਸੀ ਅਤੇ ਉੱਥੇ ਹੀ ਉਨ੍ਹਾਂ ਦੀ ਪ੍ਰੇਮ ਕਹਾਣੀ ਦੀ ਸ਼ੁਰੂਆਤ ਹੋਈ ਸੀ। ਪਹਿਲੀ ਨਜ਼ਰ ਵਿੱਚ ਹੀ ਦੋਵੇਂ ਇੱਕ-ਦੂਜੇ ਨੂੰ ਪਸੰਦ ਕਰਨ ਲੱਗੇ ਅਤੇ 1966 ਵਿੱਚ ਵਿਆਹ ਕਰ ਲਿਆ। 59 ਸਾਲ ਤੋਂ ਵੱਧ ਸਮੇਂ ਤੱਕ ਇਕੱਠੇ ਰਹਿਣ ਵਾਲੇ ਇਸ ਜੋੜੇ ਨੂੰ ਬਾਲੀਵੁੱਡ ਦੇ ਸਭ ਤੋਂ ਮਜ਼ਬੂਤ ਰਿਸ਼ਤਿਆਂ ਵਿੱਚ ਗਿਣਿਆ ਜਾਂਦਾ ਸੀ। ਜ਼ਰੀਨ ਨੇ ਸੰਜੈ ਖਾਨ ਦੇ ਜੀਵਨ ਦੇ ਹਰ ਉਤਾਰ-ਚੜ੍ਹਾਵ ਵਿੱਚ ਉਨ੍ਹਾਂ ਦਾ ਸਾਥ ਦਿੱਤਾ।
ਸੰਜੈ ਖਾਨ ਦਾ ਕਰੀਅਰ ਅਤੇ ਮੌਜੂਦਾ ਹਾਲਤ
ਸੰਜੈ ਖਾਨ ਨੇ 1988 ਵਿੱਚ ਆਪਣੀ ਆਖ਼ਰੀ ਫਿਲਮ ‘ਆਕਰਸ਼ਣ’ ਵਿੱਚ ਕੰਮ ਕੀਤਾ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਫਿਲਮ ਇੰਡਸਟਰੀ ਤੋਂ ਦੂਰੀ ਬਣਾ ਲਈ ਸੀ। ਉਨ੍ਹਾਂ ਨੇ ਟੈਲੀਵਿਜ਼ਨ ‘ਤੇ ਵੀ ਕੰਮ ਕੀਤਾ ਅਤੇ 2003 ਵਿੱਚ ‘1857 ਕ੍ਰਾਂਤੀ’ ਨਾਮਕ ਇਤਿਹਾਸਕ ਸੀਰੀਅਲ ਡਾਇਰੈਕਟ ਕੀਤਾ ਸੀ।
ਸੰਜੈ ਖਾਨ ਇੱਕ ਪ੍ਰੋਡੀੂਸਰ ਅਤੇ ਸਕ੍ਰਿਪਟ ਰਾਈਟਰ ਵੀ ਰਹੇ ਹਨ। ਇਸ ਵੇਲੇ ਉਨ੍ਹਾਂ ਦੀ ਉਮਰ 84 ਸਾਲ ਹੈ ਅਤੇ ਉਹ ਕਾਫ਼ੀ ਸਮੇਂ ਤੋਂ ਮੀਡੀਆ ਤੋਂ ਦੂਰ ਹਨ।