ਬਿਆਸ ਦੇ ਬਦਲੇ ਵਹਿਣ ਘਰਾਂ ਨੂੰ ਢਾਅ ਲਗਾਉਣ ਲੱਗਾ
*ਪੀੜਤ ਲੋਕ ਘਰਾਂ ਦਾ ਸਮਾਨ ਬਾਹਰ ਕੱਢਣ ਲੱਗੇ*
*28ਵੇਂ ਦਿਨ ਵੀ ਸੰਤ ਸੀਚੇਵਾਲ ਨੇ ਵਰ੍ਹਦੇ ਮੀਂਹ ਵਿੱਚ ਲੋਕਾਂ ਦੇ ਘਰਾਂ ਵਿੱਚ ਪਹੁੰਚਾਏ ਪ੍ਰਸ਼ਾਦੇ*
ਬਲਵਿੰਦਰ ਸਿੰਘ ਧਾਲੀਵਾਲ
ਸੁਲਤਾਨਪੁਰ ਲੋਧੀ, 07 ਸਤੰਬਰ 2025- ਬਾਊਪੁਰ ਮੰਡ ਇਲਾਕੇ ਵਿੱਚ ਬਿਆਸ ਦਰਿਆ ਦੇ ਬਦਲੇ ਵਹਿਣ ਨੇ ਅੱਧੀ ਦਰਜਨ ਘਰਾਂ ਨੂੰ ਢਾਹ ਲਗਾਉਣੀ ਸ਼ੁਰੂ ਕਰ ਦਿੱਤੀ ਹੈ। ਘਰਾਂ ਵਿੱਚ ਵੱਡੀਆਂ ਤਰੇੜਾਂ ਆਉਣ ਕਾਰਨ ਪੀੜਤ ਲੋਕਾਂ ਨੇ ਆਪਣੇ ਘਰ ਖਾਲੀ ਕਰਨੇ ਸ਼ੁਰੂ ਕਰ ਦਿੱਤੇ ਹਨ। ਰਾਜ ਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਵੱਲੋਂ ਬਣਾਏ ਗਏ ਵੱਡੇ ਬੇੜੇ ਵਿੱਚ ਦੋ ਘਰਾਂ ਦਾ ਇੱਕੋ ਵਾਰ ਸਮਾਨ ਲੱਦ ਕੇ ਸੁਰੱਖਿਅਤ ਥਾਂ ‘ਤੇ ਲਿਆਂਦਾ ਗਿਆ।
ਮੁਬਾਰਕਪੁਰ ਦੇ ਪੀੜਤ ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਘਰ ਦੇ ਬਿਲਕੁਲ ਸਾਹਮਣੇ ਤੋਂ ਬਿਆਸ ਦਰਿਆ ਵਹਿਣ ਵੱਗਣ ਲੱਗ ਪਿਆ ਹੈ। ਪਾਣੀ ਦਾ ਤੇਜ਼ ਵਹਾਅ ਘਰ ਨੂੰ ਸਿੱਧਾ ਟੱਕਰ ਮਾਰ ਰਿਹਾ ਹੈ ਜਿਸ ਕਾਰਨ ਉਨ੍ਹਾਂ ਦੇ ਘਰ ਦੀਆਂ ਨੀਂਹਾਂ ਹਿੱਲ ਗਈਆਂ ਹਨ ਤੇ ਮਕਾਨਾਂ ਨੂੰ ਵੱਡੀਆਂ ਤਰੇੜਾਂ ਆ ਗਈਆਂ ਹਨ। ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਅੱਜ ਸਵੇਰ ਤੋਂ ਢਾਹ ਲੱਗਣੀ ਸ਼ੁਰੂ ਹੋ ਗਈ ਸੀ ਤੇ ਉਸ ਸਮੇਂ ਤੋਂ ਘਰ ਦਾ ਸਮਾਨ ਚੁੱਕਣਾ ਸ਼ੁਰੂ ਕਰ ਦਿੱਤਾ ਸੀ।
ਗੁਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਘਰ ਸਮੇਤ 6 ਹੋਰ ਘਰ ਹਨ ਜਿੰਨ੍ਹਾਂ ਨੂੰ ਬਿਆਸ ਦਰਿਆ ਦੇ ਬਦਲੇ ਵਹਿਣ ਨੇ ਢਾਅ ਲਾਈ ਹੈ। ਉਨ੍ਹਾਂ ਕਿਹਾ ਕਿ ਕੁੱਝ ਦਿਨ ਪਹਿਲਾਂ ਸੰਤ ਬਲਬੀਰ ਸਿੰਘ ਸੀਚੇਵਾਲ ਜੀ ਆਪਣਾ ਵੱਡਾ ਬੇੜਾ ਸਮੇਂ ਸਿਰ ਨਾ ਭੇਜਦੇ ਸਾਡਾ ਸਮਾਨ ਹੜ੍ਹ ਵਿੱਚ ਨਹੀਂ ਸੀ ਕੱਢਿਆ ਜਾਣਾ।
ਉਧਰ ਹੜ੍ਹ ਪ੍ਰਭਾਵਿਤ ਇਲਾਕਿਆਂ ਵਿੱਚ ਅੱਜ ਤੇਜ਼ ਮੀਂਹ ਵਰ੍ਹਦਿਆ ਵੀ ਰਾਜ ਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਪੀੜਤ ਪਰਿਵਾਰਾਂ ਦੇ ਘਰਾਂ ਵਿੱਚ ਪ੍ਰਸ਼ਾਦੇ ਪਹੁੰਚਦੇ ਕੀਤੇ। ਸੰਤ ਸੀਚੇਵਾਲ ਦੀ ਕਿਸ਼ਤੀ ਦੇਖਕੇ ਹੀ ਪਰਿਵਾਰ ਆਪਣੇ ਬਰਤਨ ਲੈ ਕੇ ਆ ਜਾਂਦੇ ਹਨ।
ਬਾਕਸ ਆਈਟਿਮ : ਹੜ੍ਹ ਪ੍ਰਭਾਵਿਤ ਇਲਾਕੇ ਵਿਚ ਰਸੋਈ ਗੈਸ ਸਿਲੰਡਰਾਂ ਦੀ ਕਿਲੱਤ ਨੂੰ ਦੂਰ ਕਰਨ ਲਈ ਸੰਤ ਸੀਚੇਵਾਲ ਲੋੜਵੰਦਾਂ ਨੂੰ ਮੁਫ਼ਤ ਵਿਚ ਸਿਲੰਡਰ ਭਰਾ ਕੇ ਦੇ ਰਹੇ ਹਨ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਪਿਛਲੇ 27 ਦਿਨਾਂ ਵਿੱਚ ਤਾਂ ਲੋਕਾਂ ਦੇ ਘਰਾਂ ਵਿੱਚ ਪਾਣੀ ਫਿਰ ਗਿਆ ਹੈ। ਜਿਹੜੀ ਵੀ ਚੀਜ਼ ਦੀ ਮੰਗ ਕੀਤੀ ਜਾਂਦੀ ਹੈ ਉਸ ਨੂੰ ਪੂਰਾ ਕੀਤਾ ਜਾਂਦਾ ਹੈ। ਹੁਣ ਪਿਛਲੇ ਕੁਝ ਦਿਨਾਂ ਤੋਂ ਲੋਕ ਰਸੋਈ ਗੈਸ ਸਿਲੰਡਰਾਂ ਦੀ ਮੰਗ ਵੱਧ ਗਈ ਹੈ ਤਾਂ ਬਾਊਪੁਰ ਬੰਨ੍ਹ ‘ਤੇ ਸੰਤ ਸੀਚੇਵਾਲ ਸਿਲੰਡਰਾਂ ਦੀ ਗੱਡੀ ਮੰਗਵਾਂ ਕੇ ਪੀੜਤ ਲੋਕਾਂ ਦੇ ਘਰਾਂ ਵਿੱਚ ਸਿਲੰਡਰ ਵੀ ਪਹੁੰਚਾ ਰਹੇ ਹਨ। ਅੱਜ 15 ਸਿਲੰਡਰ ਭੇਜੇ ਗਏ।