Lady ਐਂਕਰ 'ਤੇ ਬੁਰੀ ਤਰ੍ਹਾਂ ਭੜਕੇ ਟਰੰਪ; ਮਾਈਕ ਸੁੱਟ ਕੇ ਇੰਟਰਵਿਊ ਵਿਚਾਲੇ ਛੱਡ ਗੁੱਸੇ 'ਚ ਨਿਕਲੇ
ਬਾਬੂਸ਼ਾਹੀ ਬਿਊਰੋ
ਵਾਸ਼ਿੰਗਟਨ, 8 ਜੂਨ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਇੱਕ ਵਾਰ ਫਿਰ ਮੀਡੀਆ ਜਗਤ ਅਤੇ ਸੋਸ਼ਲ ਮੀਡੀਆ 'ਤੇ ਚਰਚਾ ਦਾ ਕੇਂਦਰ ਬਣ ਗਏ ਹਨ। NBC ਨਿਊਜ਼ ਦੇ ਪ੍ਰਸਿੱਧ ਸਿਆਸੀ ਸ਼ੋਅ "ਮੀਟ ਦ ਪ੍ਰੈਸ" (Meet the Press) ਵਿੱਚ ਦਿੱਤੇ ਇੱਕ ਇੰਟਰਵਿਊ ਦੌਰਾਨ ਟਰੰਪ ਦਾ ਗੁੱਸਾ ਇਸ ਕਦਰ ਸੱਤਵੇਂ ਅਸਮਾਨ 'ਤੇ ਪਹੁੰਚ ਗਿਆ ਕਿ ਉਨ੍ਹਾਂ ਨੇ ਮਹਿਲਾ ਐਂਕਰ ਕ੍ਰਿਸਟਨ ਵੇਲਕਰ (Kristen Welker) ਨੂੰ ਸ਼ਰੇਆਮ 'ਬੇਈਮਾਨ ਅਤੇ ਮੂਰਖ' ਕਰਾਰ ਦੇ ਦਿੱਤਾ। ਇੰਨਾ ਹੀ ਨਹੀਂ, ਤਿੱਖੀ ਬਹਿਸ ਤੋਂ ਬਾਅਦ ਟਰੰਪ ਨੇ ਗੁੱਸੇ ਵਿੱਚ ਆਪਣਾ ਮਾਈਕ੍ਰੋਫ਼ੋਨ ਉਤਾਰ ਕੇ ਸੁੱਟ ਦਿੱਤਾ ਅਤੇ ਇੰਟਰਵਿਊ ਅੱਧ ਵਿਚਕਾਰ ਛੱਡ ਕੇ ਬਾਹਰ ਚਲੇ ਗਏ। ਇਸ ਹੰਗਾਮੇ ਦੀ ਵੀਡੀਓ ਇੰਟਰਨੈੱਟ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ।
ਇਸ ਵਿਵਾਦ ਦੀ ਸ਼ੁਰੂਆਤ ਉਦੋਂ ਹੋਈ ਜਦੋਂ ਐਂਕਰ ਕ੍ਰਿਸਟਨ ਵੇਲਕਰ ਨੇ ਟਰੰਪ ਨੂੰ ਉਨ੍ਹਾਂ ਦੀ ਪ੍ਰਸਤਾਵਿਤ $1.8 ਬਿਲੀਅਨ (ਲਗਭਗ 180 ਕਰੋੜ ਡਾਲਰ) ਦੀ "ਹਥਿਆਰਬੰਦੀ ਵਿਰੋਧੀ ਪਹਿਲਕਦਮੀ" (Anti-Weaponization Initiative) ਬਾਰੇ ਸਵਾਲ ਪੁੱਛਿਆ। ਇਹ ਫੰਡ ਉਨ੍ਹਾਂ ਲੋਕਾਂ ਨੂੰ ਮੁਆਵਜ਼ਾ ਦੇਣ ਲਈ ਬਣਾਇਆ ਜਾ ਰਿਹਾ ਹੈ, ਜਿਨ੍ਹਾਂ ਦਾ ਮੰਨਣਾ ਹੈ ਕਿ ਜੋਅ ਬਿਡੇਨ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਸਿਆਸੀ ਤੌਰ 'ਤੇ ਨਿਸ਼ਾਨਾ ਬਣਾਇਆ ਹੈ (ਜਿਸ ਵਿੱਚ ਕੈਪੀਟਲ ਹਿੱਲ ਦੰਗਾਕਾਰੀ ਵੀ ਸ਼ਾਮਲ ਮੰਨੇ ਜਾ ਰਹੇ ਹਨ)।
ਇਸ ਮੁੱਦੇ 'ਤੇ ਬੋਲਦਿਆਂ ਟਰੰਪ ਨੇ ਜੋਅ ਬਿਡੇਨ ਅਤੇ ਅਮਰੀਕੀ ਮੀਡੀਆ 'ਤੇ ਤਿੱਖੇ ਹਮਲੇ ਕੀਤੇ। ਉਨ੍ਹਾਂ ਦੋਸ਼ ਲਾਇਆ ਕਿ ਬਿਡੇਨ ਪ੍ਰਸ਼ਾਸਨ ਨੇ ਦੇਸ਼ ਦੇ ਬੇਕਸੂਰ ਲੋਕਾਂ ਦੀਆਂ ਜ਼ਿੰਦਗੀਆਂ ਬਰਬਾਦ ਕਰਕੇ ਉਨ੍ਹਾਂ ਨੂੰ ਜੇਲ੍ਹਾਂ ਵਿੱਚ ਡੱਕਿਆ ਹੈ।
ਜਦੋਂ ਐਂਕਰ ਵੇਲਕਰ ਨੇ ਟਰੰਪ ਨੂੰ ਟੋਕਦਿਆਂ ਕਿਹਾ ਕਿ ਬਿਡੇਨ ਪ੍ਰਸ਼ਾਸਨ 'ਤੇ ਲਗਾਏ ਜਾ ਰਹੇ ਇਨ੍ਹਾਂ ਦੋਸ਼ਾਂ ਦਾ ਕੋਈ ਪੁਖ਼ਤਾ ਸਬੂਤ ਨਹੀਂ ਹੈ, ਤਾਂ ਟਰੰਪ ਨੇ ਸਾਲ 2020 ਦੀਆਂ ਰਾਸ਼ਟਰਪਤੀ ਚੋਣਾਂ ਅਤੇ ਹਾਲ ਹੀ ਦੀਆਂ ਕੈਲੀਫੋਰਨੀਆ ਪ੍ਰਾਇਮਰੀ ਚੋਣਾਂ ਦਾ ਮੁੱਦਾ ਚੁੱਕ ਦਿੱਤਾ।
ਟਰੰਪ ਨੇ ਦਾਅਵਾ ਕੀਤਾ: "ਮੇਰੀ ਗੱਲ ਸੁਣੋ, ਬਹੁਤ ਸਾਰੇ ਸਬੂਤ ਹਨ। 2020 ਦੀ ਚੋਣ ਪੂਰਨ ਤੌਰ 'ਤੇ ਫਿਕਸ (ਧਾਂਦਲੀ ਵਾਲੀ) ਸੀ ਅਤੇ ਹੁਣ ਕੈਲੀਫੋਰਨੀਆ ਵਿੱਚ ਵੀ ਇਹੀ ਕੁਝ ਹੋ ਰਿਹਾ ਹੈ।"
ਟਰੰਪ ਨੇ ਤਰਕ ਦਿੱਤਾ ਕਿ ਕੈਲੀਫੋਰਨੀਆ ਵਿੱਚ ਵੋਟਿੰਗ ਖ਼ਤਮ ਹੋਣ ਦੇ ਕਈ ਦਿਨਾਂ ਬਾਅਦ ਵੀ ਵੋਟਾਂ ਦੀ ਗਿਣਤੀ ਅਧੂਰੀ ਰਹਿਣਾ ਇਸ ਗੱਲ ਦਾ ਸਬੂਤ ਹੈ ਕਿ ਉੱਥੇ ਕੋਈ ਵੱਡੀ ਗੜਬੜ ਚੱਲ ਰਹੀ ਹੈ।
ਮੀਡੀਆ ਅਤੇ ਐਂਕਰ 'ਤੇ ਨਿੱਜੀ ਹਮਲੇ
ਜਦੋਂ ਐਂਕਰ ਨੇ ਚੋਣਾਂ ਵਿੱਚ ਗੜਬੜੀ ਦੇ ਇਨ੍ਹਾਂ ਦੋਸ਼ਾਂ 'ਤੇ ਮੁੜ ਸਬੂਤ ਮੰਗਿਆ, ਤਾਂ ਟਰੰਪ ਸਿੱਧਾ ਨਿੱਜੀ ਹਮਲਿਆਂ 'ਤੇ ਉਤਰ ਆਏ। ਉਨ੍ਹਾਂ ਵੇਲਕਰ ਨੂੰ ਪੁੱਛਿਆ ਕਿ ਕੀ ਚੋਣਾਂ ਤੋਂ ਕਈ ਦਿਨਾਂ ਬਾਅਦ ਤੱਕ ਜੇਤੂ ਦਾ ਫੈਸਲਾ ਨਾ ਹੋਣਾ ਸਹੀ ਹੈ? ਇਸ 'ਤੇ ਜਦੋਂ ਵੇਲਕਰ ਨੇ ਕਿਹਾ ਕਿ ਖ਼ੁਦ ਚੋਣ ਅਧਿਕਾਰੀਆਂ ਨੇ ਨਿਯਮਾਂ ਤਹਿਤ ਗਿਣਤੀ ਹੌਲੀ ਹੋਣ ਦੀ ਗੱਲ ਮੰਨੀ ਹੈ, ਤਾਂ ਟਰੰਪ ਬੁਰੀ ਤਰ੍ਹਾਂ ਭੜਕ ਗਏ।
ਟਰੰਪ ਨੇ ਕਿਹਾ, "ਨਹੀਂ, ਉਹ ਬੇਈਮਾਨ ਹਨ। ਉਹ ਬਿਲਕੁਲ ਤੁਹਾਡੇ ਵਾਂਗ ਹੀ ਬੇਈਮਾਨ ਹਨ। ਤੁਹਾਡੀ ਪੂਰੀ ਪ੍ਰੈਸ ਅਤੇ 'ਮੀਟ ਦ ਪ੍ਰੈਸ' ਬੇਈਮਾਨ ਹੈ। ਇਹੀ ਹਾਲ ABC, CBS ਅਤੇ CNN ਦਾ ਹੈ। ਤੁਸੀਂ ਸਾਰੇ ਇੱਕ-ਪਾਸੜ ਅਤੇ ਵਿਕਾਊ ਨੈੱਟਵਰਕ ਹੋ।"
"ਬਸ ਬਹੁਤ ਹੋ ਗਿਆ, ਧੰਨਵਾਦ ਪਿਆਰੇ..."
ਜਦੋਂ ਐਂਕਰ ਨੇ ਆਪਣਾ ਪੱਖ ਰੱਖਦਿਆਂ ਕਿਹਾ ਕਿ "ਮੈਂ ਬੇਈਮਾਨ ਨਹੀਂ ਹਾਂ...", ਤਾਂ ਟਰੰਪ ਨੇ ਉਨ੍ਹਾਂ ਦੀ ਗੱਲ ਵਿਚਾਲੇ ਹੀ ਕੱਟਦਿਆਂ ਕਿਹਾ, "ਸੱਚਮੁੱਚ? ਤੁਸੀਂ ਜਾਂ ਤਾਂ ਬੇਈਮਾਨ ਹੋ ਜਾਂ ਫਿਰ ਬਿਲਕੁਲ ਮੂਰਖ ਹੋ।"
ਇਸ ਤੋਂ ਤੁਰੰਤ ਬਾਅਦ ਟਰੰਪ ਨੇ ਆਪਣੇ ਕੱਪੜਿਆਂ ਨਾਲ ਲੱਗਿਆ ਮਾਈਕ੍ਰੋਫ਼ੋਨ ਖਿੱਚ ਕੇ ਲਾਹਿਆ ਅਤੇ ਉਸ ਨੂੰ ਵਗਾਹ ਮਾਰਿਆ।
ਉਨ੍ਹਾਂ ਇੰਟਰਵਿਊ ਖ਼ਤਮ ਕਰਦਿਆਂ ਕਿਹਾ "ਚਲੋ ਇਸਨੂੰ ਇੱਥੇ ਹੀ ਖ਼ਤਮ ਕਰੀਏ, ਕਿਉਂਕਿ ਹੁਣ ਬਹੁਤ ਹੋ ਗਿਆ ਹੈ। ਧੰਨਵਾਦ, ਪਿਆਰੇ।"
ਐਂਕਰ ਕ੍ਰਿਸਟਨ ਵੇਲਕਰ ਨੇ ਉਨ੍ਹਾਂ ਨੂੰ ਬੈਠਣ ਅਤੇ ਇੰਟਰਵਿਊ ਜਾਰੀ ਰੱਖਣ ਦੀ ਅਪੀਲ ਕੀਤੀ, ਪਰ ਟਰੰਪ ਨੇ ਕੁਰਸੀ ਤੋਂ ਉੱਠਦਿਆਂ ਆਖਰੀ ਤਨਜ਼ ਕੱਸਿਆ, "ਮੈਂ ਤੁਹਾਨੂੰ ਪੂਰਾ ਸਮਾਂ ਦਿੱਤਾ ਹੈ। ਤੁਹਾਨੂੰ ਆਪਣੀ ਪ੍ਰੈਸ ਨੂੰ ਸੁਧਾਰਨਾ ਚਾਹੀਦਾ ਹੈ, ਕਿਉਂਕਿ ਕੋਈ ਵੀ ਦੇਸ਼ ਅਜਿਹੀ ਬੇਈਮਾਨ ਪ੍ਰੈਸ ਦੇ ਹੁੰਦਿਆਂ ਕਦੇ ਮਹਾਨ ਨਹੀਂ ਬਣ ਸਕਦਾ।" ਇਹ ਕਹਿ ਕੇ ਟਰੰਪ ਕੈਮਰੇ ਦੇ ਸਾਹਮਣੇ ਤੋਂ ਚਲੇ ਗਏ।
- Download Babushahi App
-
-
