ਜੰਮੂ ਕਸ਼ਮੀਰ ਦੇ ਪ੍ਰਮੁੱਖ ਲੇਖਕ ਹਰਭਜਨ ਸਿੰਘ ਸਾਗਰ ਦੇ ਚਲਾਣੇ ਤੇ ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਵੱਲੋਂ ਅਫ਼ਸੋਸ ਦਾ ਪ੍ਰਗਟਾਵਾ
ਲੁਧਿਆਣਾਃ 30 ਨਵੰਬਰ
ਜੰਮੂ ਕਸ਼ਮੀਰ ਵਿੱਚ ਸਰਗਰਮ ਪੰਜਾਬੀ ਸਾਹਿਤ ਸਿਰਜਕ ਸ. ਹਰਭਜਨ ਸਿੰਘ ਸਾਗਰ ਦੇ ਚਲਾਣੇ ਤੇ ਪੰਜਾਬੀ ਲੋਕ ਵਿਰਾਸਤ ਅਕਾਡਮੀ ਦੇ ਚੇਅਰਮੈਨ ਪ੍ਹੋ. ਗੁਰਭਜਨ ਸਿੰਘ ਗਿੱਲ ਨੇ ਡੂੰਘੇ ਅਫ਼ਸੋਸ ਦਾ ਪ੍ਰਗਟਾਵਾ ਕੀਤਾ ਹੈ। ਹਰਭਜਨ ਸਿੰਘ ਸਾਗਰ ਦੀ ਰਚਨਾਤਮਕ ਯਾਤਰਾ ਬਾਰੇ ਸ਼ੰਮੀ ਕਸ਼ਮੀਰ ਤੋਂ ਛਪਦੇ ਸਾਹਿੱਤਕ ਰਸਾਲੇ ਸ਼ੀਰਾਜ਼ਾ ਦੇ ਸੰਪਾਦਕ ਪੋਪਿੰਦਰ ਸਿੰਘ ਪਾਰਸ ਨੇ ਉਨ੍ਹਾਂ ਦੇ ਦੇਹਾਂਤ ਬਾਰੇ ਜਾਣਕਾਰੀ ਦੇਂਦਿਆਂ ਦੱਸਿਆ ਹੈ ਕਿ ਸ. ਹਰਭਜਨ ਸਿੰਘ ਸਾਗਰ ਦੇ ਤਿੰਨ ਕਹਾਣੀ-ਸੰਗ੍ਰਹਿ- 'ਯਾਤਰੀ’, ‘ਦਾਇਰੇ' ਅਤੇ 'ਬੰਦ ਦਰਵਾਜ਼ਾ’ ਦਾ ਬਿਰਤਾਂਤ '-ਪੰਜਾਬੀ ਕਹਾਣੀ-ਸਾਹਿਤ ਦੇ ਅਹਿਮ ਮੋੜ ਮੰਨੇ ਜਾਂਦੇ ਹਨ।
ਇਨ੍ਹਾਂ ਵਿੱਚੋਂ 'ਯਾਤਰੀ' ਅਤੇ 'ਬੰਦ ਦਰਵਾਜ਼ਾ’ ਦਾ ਬਿਰਤਾਂਤ ' ਨੂੰ ਜੰਮੂ ਕਸ਼ਮੀਰ ਅਕੈਡਮੀ ਆਫ ਲੈਂਗੂਏਜਿਜ ਐਂਡ ਕਲਚਰ ਵੱਲੋਂ ਸਰਵੋਤਮ ਪੁਸਤਕ ਪੁਰਸਕਾਰ ਪ੍ਰਦਾਨ ਕੀਤਾ ਗਿਆ ਸੀ ਜਦਕਿ 'ਦਾਇਰੇ' ਨੂੰ ਵੀ ਸਾਹਿਤਿਕ ਜਗਤ ਵਲੋਂ ਵਿਸ਼ੇਸ਼ ਪ੍ਰਸ਼ੰਸਾ ਮਿਲੀ। ਸ. ਹਰਭਜਨ ਸਿੰਘ ਸਾਗਰ ਦੀ ਰਚਨਾ-ਸ਼ੈਲੀ, ਭਾਸ਼ਾਈ ਪ੍ਰਵਾਹ ਅਤੇ ਸਮਾਜਿਕ ਸੱਚਾਈਆਂ ਦੀ ਗਹਿਰੀ ਪੜਚੋਲ ਨੇ ਉਨ੍ਹਾਂ ਨੂੰ ਸਮਕਾਲੀ ਕਹਾਣੀਕਾਰਾਂ ਵਿੱਚ ਵਿਸ਼ੇਸ਼ ਥਾਂ ਦਿਵਾਈ।