ਕੇਂਦਰ ਸਰਕਾਰ ਨੇ 16 ਫਿਕਸਡ-ਡੋਜ਼ ਕੰਬੀਨੇਸ਼ਨ (FDC) ਦਵਾਈਆਂ 'ਤੇ ਲਾਈ ਤੁਰੰਤ ਪਾਬੰਦੀ
ਸੂਚੀ ਵਿੱਚ ਆਮ ਦਰਦ ਨਿਵਾਰਕ, ਐਂਟੀਬਾਇਓਟਿਕਸ ਅਤੇ ਸਕਿਨ ਪ੍ਰੋਡਕਟਸ ਸ਼ਾਮਲ
ਨਵੀਂ ਦਿੱਲੀ, 21 ਜੂਨ:
ਦੇਸ਼ ਵਿੱਚ ਮਰੀਜ਼ਾਂ ਦੀ ਸਿਹਤ ਸੁਰੱਖਿਆ ਨੂੰ ਮੁੱਖ ਰੱਖਦਿਆਂ ਕੇਂਦਰੀ ਸਿਹਤ ਮੰਤਰਾਲੇ ਨੇ ਇੱਕ ਵੱਡਾ ਫੈਸਲਾ ਲਿਆ ਹੈ। ਸਰਕਾਰ ਨੇ ਇਲਾਜ ਪੱਖੋਂ ਕੋਈ ਠੋਸ ਵਿਗਿਆਨਕ ਆਧਾਰ ਨਾ ਹੋਣ ਅਤੇ ਮਰੀਜ਼ਾਂ ਲਈ ਸੰਭਾਵੀ ਖ਼ਤਰਾ ਬਣਨ ਦਾ ਹਵਾਲਾ ਦਿੰਦੇ ਹੋਏ, ਮਨੁੱਖੀ ਵਰਤੋਂ ਵਾਲੀਆਂ 16 ਫਿਕਸਡ-ਡੋਜ਼ ਕੰਬੀਨੇਸ਼ਨ (FDC) ਦਵਾਈਆਂ ਦੇ ਨਿਰਮਾਣ, ਵਿਕਰੀ ਅਤੇ ਵੰਡ 'ਤੇ ਤੁਰੰਤ ਪ੍ਰਭਾਵ ਨਾਲ ਪਾਬੰਦੀ ਲਗਾ ਦਿੱਤੀ ਹੈ। ਸਿਹਤ ਵਿਭਾਗ ਵੱਲੋਂ ਜਾਰੀ ਇਹ ਨੋਟੀਫਿਕੇਸ਼ਨ ਤੁਰੰਤ ਲਾਗੂ ਹੋ ਗਿਆ ਹੈ। ਇਹ ਸਖ਼ਤ ਕਦਮ ਕਈ ਸਾਲਾਂ ਤੱਕ ਚੱਲੀ ਲੰਮੀ ਰੈਗੂਲੇਟਰੀ ਸਮੀਖਿਆ ਪ੍ਰਕਿਰਿਆ ਤੋਂ ਬਾਅਦ, ਡਰੱਗਜ਼ ਐਂਡ ਕਾਸਮੈਟਿਕਸ ਐਕਟ, 1940 ਦੀ ਧਾਰਾ 26ਏ ਦੇ ਤਹਿਤ ਚੁੱਕਿਆ ਗਿਆ ਹੈ। ਪਾਬੰਦੀਸ਼ੁਦਾ ਕੀਤੀਆਂ ਗਈਆਂ ਇਨ੍ਹਾਂ ਦਵਾਈਆਂ (ਜਿਨ੍ਹਾਂ ਵਿੱਚ ਦੋ ਜਾਂ ਦੋ ਤੋਂ ਵੱਧ ਸਾਲਟ ਇੱਕੋ ਟੈਬਲੇਟ ਜਾਂ ਕੈਪਸੂਲ ਵਿੱਚ ਮਿਲਾਏ ਹੁੰਦੇ ਹਨ) ਦੀ ਸੂਚੀ ਵਿੱਚ ਆਮ ਤੌਰ 'ਤੇ ਘਰਾਂ ਵਿੱਚ ਵਰਤੇ ਜਾਣ ਵਾਲੇ ਦਰਦ ਨਿਵਾਰਕ (Painkillers), ਐਂਟੀਬਾਇਓਟਿਕਸ ਅਤੇ ਚਮੜੀ ਨਾਲ ਸਬੰਧਤ ਉਤਪਾਦ ਸ਼ਾਮਲ ਹਨ।
ਸਿਹਤ ਮੰਤਰਾਲੇ ਵੱਲੋਂ ਜਾਰੀ ਪਾਬੰਦੀਸ਼ੁਦਾ ਦਵਾਈਆਂ ਦੀ ਅਧਿਕਾਰਤ ਸੂਚੀ ਵਿੱਚ ਐਸੀਟਿਲ ਸੈਲੀਸਿਲਿਕ ਐਸਿਡ + ਈਥੋਹੇਪਟਾਜ਼ੀਨ; ਐਲੋਵੇਰਾ + ਜੋਜੋਬਾ ਤੇਲ + ਕਣਕ ਦੇ ਜਰਮ ਦਾ ਤੇਲ + ਚਾਹ ਦੇ ਰੁੱਖ ਦਾ ਤੇਲ; ਅਮੋਕਸੀਸਿਲਿਨ + ਸੇਰਾਟੀਓਪੇਪਟੀਡੇਸ + ਲੈਕਟੋਬੈਸੀਲਸ ਸਪੋਰੋਜੀਨਸ; ਡਾਈਸਾਈਕਲੋਮਾਈਨ + ਪੈਰਾਸੀਟਾਮੋਲ + ਕਲੀਡੀਨੀਅਮ ਬ੍ਰੋਮਾਈਡ + ਕਲੋਰਡਾਇਆਜ਼ੇਪੋਕਸਾਈਡ; ਅਮੋਕਸੀਸਿਲਿਨ + ਸੇਰਾਟੀਓਪੇਪਟੀਡੇਸ; ਐਲੋ ਐਬਸਟਰੈਕਟ + ਐਲਨਟੋਇਨ + ਅਲਫ਼ਾ-ਟੋਕੋਫੇਰਲ ਐਸੀਟੇਟ + ਡੀ-ਪੈਂਥੇਨੋਲ + ਵਿਟਾਮਿਨ ਏ; ਐਲੋ ਐਬਸਟਰੈਕਟ + ਵਿਟਾਮਿਨ ਈ + ਡਾਈਮੇਥੀਕੋਨ + ਗਲਿਸਰੀਨ; ਐਲੋਵੇਰਾ + ਜੋਜੋਬਾ ਤੇਲ + ਵਿਟਾਮਿਨ ਈ; ਐਲੋਵੇਰਾ + ਸੰਤਰਾ ਤੇਲ; ਐਲੋਵੇਰਾ + ਵਿਟਾਮਿਨ ਈ + ਹਰਬਲ; ਡਾਈਸਾਈਕਲੋਮਾਈਨ + ਪੈਰਾਸੀਟਾਮੋਲ + ਕਲੀਡੀਨੀਅਮ ਬ੍ਰੋਮਾਈਡ; ਪੈਰਾਸੀਟਾਮੋਲ + ਲਿਗਨੋਕੇਨ; ਗਲਿਕਲਾਜ਼ਾਈਡ + ਕ੍ਰੋਮੀਅਮ ਪਿਕੋਲੀਨੇਟ; ਅਮੋਕਸੀਸਿਲਿਨ + ਕਲੌਕਸੀਸਿਲਿਨ + ਲੈਕਟਿਕ ਐਸਿਡ ਬੈਸੀਲਸ + ਸੇਰਾਟੀਓਪੇਪਟੀਡੇਸ; ਸੇਫਾਡ੍ਰੋਕਸਿਲ + ਪ੍ਰੋਬੇਨੇਸੀਡ ਅਤੇ ਸੇਫੁਰੋਕਸੀਮ + ਸੇਰਾਟੀਓਪੇਪਟੀਡੇਸ ਵਰਗੇ ਫਾਰਮੂਲੇਸ਼ਨ ਸ਼ਾਮਲ ਹਨ।
ਐਫਡੀਸੀ ਦਵਾਈਆਂ ਦਾ ਇਹ ਵਿਵਾਦਪੂਰਨ ਮੁੱਦਾ ਸਾਲ 2021 ਵਿੱਚ ਉਦੋਂ ਸਾਹਮਣੇ ਆਇਆ ਸੀ ਜਦੋਂ ਇੱਕ ਮਾਹਰ ਪੈਨਲ ਨੇ ਇਨ੍ਹਾਂ ਦੀ ਡੂੰਘਾਈ ਨਾਲ ਜਾਂਚ ਸ਼ੁਰੂ ਕੀਤੀ ਸੀ। ਜਾਂਚ ਵਿੱਚ ਇਹ ਤੱਥ ਸਾਹਮਣੇ ਆਇਆ ਕਿ ਉਪਲਬਧ ਡੇਟਾ ਅਤੇ ਵਿਗਿਆਨਕ ਸਬੂਤ ਇਨ੍ਹਾਂ ਸੁਮੇਲਾਂ ਦੀ ਤਰਕਸ਼ੀਲਤਾ ਦਾ ਬਿਲਕੁਲ ਵੀ ਸਮਰਥਨ ਨਹੀਂ ਕਰਦੇ। ਉਦਾਹਰਨ ਵਜੋਂ, ਬੈਕਟੀਰੀਆ ਦੀ ਇਨਫੈਕਸ਼ਨ, ਸੋਜ ਅਤੇ ਦਰਦ ਘਟਾਉਣ ਲਈ ਵਰਤੇ ਜਾਣ ਵਾਲੇ ਅਮੋਕਸੀਸਿਲਿਨ-ਸੇਰੇਟੀਓਪੇਪਟੀਡੇਸ (ਜਿਸ ਵਿੱਚ ਲੈਕਟੋਬੈਸੀਲਸ ਸਪੋਰੋਜੀਨਸ ਅਤੇ ਕਲੌਕਸਾਸਿਲਿਨ ਸ਼ਾਮਲ ਹਨ) ਦੇ ਸੁਮੇਲ ਨੂੰ ਕਮੇਟੀ ਨੇ ਸਰੀਰਕ ਕਿਰਿਆ ਦੇ ਲਿਹਾਜ਼ ਨਾਲ ਪੂਰੀ ਤਰ੍ਹਾਂ ਅਪ੍ਰਸੰਗਿਕ ਪਾਇਆ। ਮਾਹਰਾਂ ਮੁਤਾਬਕ ਐਂਟੀਬਾਇਓਟਿਕ ਅਤੇ ਐਨਜ਼ਾਈਮ ਦੀ ਇੱਕੋ ਸਮੇਂ ਵਰਤੋਂ ਦਾ ਕੋਈ ਠੋਸ ਕਲੀਨਿਕਲ ਸਬੂਤ ਨਹੀਂ ਹੈ ਅਤੇ ਨਾ ਹੀ ਇਹ ਮਿਆਰੀ ਇਲਾਜ ਦਿਸ਼ਾ-ਨਿਰਦੇਸ਼ਾਂ ਦੀ ਪਾਲਣਾ ਕਰਦਾ ਹੈ। ਇਹੀ ਤਰਕ ਸਾਹ ਦੀ ਇਨਫੈਕਸ਼ਨ ਲਈ ਵਰਤੀ ਜਾਣ ਵਾਲੀ ਸੇਫੁਰੋਕਸੀਮ + ਸੇਰਾਟੀਓਪੇਪਟੀਡੇਸ ਦਵਾਈ 'ਤੇ ਵੀ ਲਾਗੂ ਕੀਤਾ ਗਿਆ ਹੈ।
ਇਸੇ ਤਰ੍ਹਾਂ ਅੰਤੜੀਆਂ ਦੇ ਦਰਦ ਅਤੇ ਚਿੜਚਿੜਾ ਟੱਟੀ ਸਿੰਡਰੋਮ (IBS) ਦੇ ਇਲਾਜ ਵਿੱਚ ਵਰਤੇ ਜਾਣ ਵਾਲੇ ਡਾਈਸਾਈਕਲੋਮਾਈਨ-ਅਧਾਰਿਤ ਸੰਜੋਗਾਂ ਬਾਰੇ ਕਮੇਟੀ ਨੇ ਨੋਟ ਕੀਤਾ ਕਿ ਡਾਈਸਾਈਕਲੋਮਾਈਨ ਵਿੱਚ ਪਹਿਲਾਂ ਹੀ ਮਾਸਪੇਸ਼ੀਆਂ ਨੂੰ ਆਰਾਮ ਦੇਣ ਵਾਲੇ ਸ਼ਕਤੀਸ਼ਾਲੀ ਗੁਣ ਹੁੰਦੇ ਹਨ, ਜਿਸ ਕਾਰਨ ਇਸ ਨੂੰ ਕਲੀਡੀਨੀਅਮ ਬ੍ਰੋਮਾਈਡ ਵਰਗੇ ਕਿਸੇ ਹੋਰ ਐਂਟੀ-ਕੋਲੀਨਰਜਿਕ ਸਾਲਟ ਨਾਲ ਮਿਲਾਉਣਾ ਗੈਰ-ਵਾਜਬ ਹੈ। ਟਾਈਪ 2 ਡਾਇਬਟੀਜ਼ ਦੇ ਪ੍ਰਬੰਧਨ ਲਈ ਵਰਤੀ ਜਾਂਦੀ ਗਲਿਕਲਾਜ਼ਾਈਡ + ਕ੍ਰੋਮੀਅਮ ਪਿਕੋਲੀਨੇਟ ਬਾਰੇ ਕਮੇਟੀ ਨੇ ਸਪੱਸ਼ਟ ਕੀਤਾ ਕਿ ਕੋਈ ਵੀ ਰਾਸ਼ਟਰੀ ਜਾਂ ਅੰਤਰਰਾਸ਼ਟਰੀ ਮਿਆਰੀ ਗਾਈਡਲਾਈਨ ਕ੍ਰੋਮੀਅਮ ਪਿਕੋਲੀਨੇਟ ਦੀ ਵਰਤੋਂ ਦੀ ਸਿਫ਼ਾਰਸ਼ ਨਹੀਂ ਕਰਦੀ। ਸੇਫਾਡ੍ਰੋਕਸਿਲ + ਪ੍ਰੋਬੇਨੇਸਿਡ ਦੇ ਸੁਮੇਲ ਬਾਰੇ ਵੀ ਸਰੀਰ 'ਤੇ ਹੋਣ ਵਾਲੇ ਅਸਰ ਦਾ ਕੋਈ ਢੁਕਵਾਂ ਫਾਰਮਾਕੋਕਾਇਨੇਟਿਕ ਡੇਟਾ ਨਹੀਂ ਮਿਲਿਆ। ਇਸ ਤੋਂ ਇਲਾਵਾ, ਚਮੜੀ 'ਤੇ ਲਗਾਉਣ ਵਾਲੇ ਕਈ ਐਲੋਵੇਰਾ-ਅਧਾਰਿਤ ਉਤਪਾਦਾਂ ਵਿੱਚ ਵੀ ਵਿਗਿਆਨਕ ਤੱਥਾਂ ਅਤੇ ਸਪੱਸ਼ਟ ਪਰਿਭਾਸ਼ਾ ਦੀ ਭਾਰੀ ਕਮੀ ਪਾਈ ਗਈ।
ਇਨ੍ਹਾਂ ਸਾਰੀਆਂ ਮਾਹਰ ਸਿਫ਼ਾਰਸ਼ਾਂ ਦੀ ਕੇਂਦਰੀ ਸਿਹਤ ਮੰਤਰਾਲੇ ਦੇ ਡਰੱਗਜ਼ ਟੈਕਨੀਕਲ ਐਡਵਾਈਜ਼ਰੀ ਬੋਰਡ (DTAB) ਦੁਆਰਾ ਬਾਰੀਕੀ ਨਾਲ ਸਮੀਖਿਆ ਕੀਤੀ ਗਈ, ਜੋ ਕਿ ਦਵਾਈਆਂ ਸਬੰਧੀ ਨੀਤੀਆਂ 'ਤੇ ਸਰਕਾਰ ਨੂੰ ਸਲਾਹ ਦੇਣ ਵਾਲੀ ਦੇਸ਼ ਦੀ ਸਿਖਰਲੀ ਕਾਨੂੰਨੀ ਸੰਸਥਾ ਹੈ। ਬੋਰਡ ਨੇ ਮਾਹਰਾਂ ਦੇ ਨਤੀਜਿਆਂ ਨਾਲ ਸਹਿਮਤੀ ਪ੍ਰਗਟਾਉਂਦੇ ਹੋਏ ਆਪਣੀ ਸਬ-ਕਮੇਟੀ ਨੂੰ ਸਾਰੇ ਤਰਕਹੀਣ ਐਫਡੀਸੀਜ਼ ਦੀ ਵਿਸਥਾਰਪੂਰਵਕ ਜਾਂਚ ਦੇ ਨਿਰਦੇਸ਼ ਦਿੱਤੇ ਸਨ। ਉਪ-ਕਮੇਟੀ ਨੇ ਦਵਾਈ ਨਿਰਮਾਤਾਵਾਂ ਅਤੇ ਸਬੰਧਤ ਧਿਰਾਂ ਨੂੰ ਜਨਤਕ ਨੋਟਿਸਾਂ ਰਾਹੀਂ ਆਪਣਾ ਪੱਖ ਅਤੇ ਡੇਟਾ ਪੇਸ਼ ਕਰਨ ਦਾ ਪੂਰਾ ਮੌਕਾ ਦਿੱਤਾ ਸੀ। ਅਖੀਰ ਸਾਰੀਆਂ ਸੁਣਵਾਈਆਂ ਤੋਂ ਬਾਅਦ ਉਪ-ਕਮੇਟੀ ਨੇ 28 ਦਸੰਬਰ, 2024 ਨੂੰ ਆਪਣੀ ਅੰਤਿਮ ਰਿਪੋਰਟ ਸੌਂਪੀ, ਜਿਸ ਵਿੱਚ ਵੱਡੇ ਜਨਤਕ ਹਿੱਤਾਂ ਨੂੰ ਮੁੱਖ ਰੱਖਦਿਆਂ ਇਨ੍ਹਾਂ 'ਤੇ ਪਾਬੰਦੀ ਲਗਾਉਣ ਦੀ ਸਿਫ਼ਾਰਸ਼ ਕੀਤੀ ਗਈ। ਡੀਟੀਏਬੀ ਵੱਲੋਂ ਇਸ ਰਿਪੋਰਟ ਨੂੰ ਸਵੀਕਾਰ ਕੀਤੇ ਜਾਣ ਤੋਂ ਬਾਅਦ ਕੇਂਦਰ ਸਰਕਾਰ ਨੇ ਇਹ ਸਿੱਟਾ ਕੱਢਿਆ ਕਿ ਆਮ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਰੋਕਣ ਲਈ ਇਹ ਪਾਬੰਦੀ ਲਗਾਉਣੀ ਬੇਹੱਦ ਜ਼ਰੂਰੀ ਅਤੇ ਸੁਵਿਧਾਜਨਕ ਸੀ, ਜਿਸ ਦੇ ਚਲਦਿਆਂ ਹੁਣ ਪੂਰੇ ਭਾਰਤ ਵਿੱਚ ਇਨ੍ਹਾਂ 16 ਸੁਮੇਲਾਂ ਦੇ ਨਿਰਮਾਣ ਅਤੇ ਵੰਡ ਨੂੰ ਗੈਰ-ਕਾਨੂੰਨੀ ਐਲਾਨ ਦਿੱਤਾ ਗਿਆ ਹੈ।
- Download Babushahi App
-
-
