'ਡੰਕੀ ਫਾਰਮ' ਚ ₹7,000 ਪ੍ਰਤੀ ਲੀਟਰ ਤੱਕ ਵਿਕਦੈ ਦੁੱਧ
ਜਾਣੋ ਇਸ ਦੁੱਧ ਦੇ ਹੈਰਾਨੀਜਨਕ ਔਸ਼ਧੀ ਗੁਣ ਅਤੇ ਵਪਾਰਕ ਫ਼ਾਇਦੇ
ਬਾਬੂਸ਼ਾਹੀ ਬਿਊਰੋ
ਬਿਲਾਸਪੁਰ (ਹਿਮਾਚਲ ਪ੍ਰਦੇਸ਼), 16 ਨਵੰਬਰ, 2026: ਹਿਮਾਚਲ ਪ੍ਰਦੇਸ਼ ਦੇ ਡੇਅਰੀ ਅਤੇ ਪਸ਼ੂ ਪਾਲਣ ਖੇਤਰ ਵਿੱਚ ਇੱਕ ਬੇਹੱਦ ਅਨੂਠਾ ਅਤੇ ਨਵਾਂ ਅਧਿਆਏ ਜੁੜ ਗਿਆ ਹੈ। ਜ਼ਿਲ੍ਹਾ ਬਿਲਾਸਪੁਰ ਦੇ ਪਿੰਡ ਕੰਦੌਰ ਵਿਖੇ ਸੂਬੇ ਦਾ ਪਹਿਲਾ 'ਡੰਕੀ ਫਾਰਮ' (ਖੋਤਾ ਫਾਰਮ) ਖੋਲ੍ਹਿਆ ਗਿਆ ਹੈ, ਜਿਸ ਦਾ ਰਸਮੀ ਉਦਘਾਟਨ ਹਿਮਾਚਲ ਪ੍ਰਦੇਸ਼ ਦੇ ਤਕਨੀਕੀ ਸਿੱਖਿਆ ਮੰਤਰੀ ਰਾਜੇਸ਼ ਧਰਮਾਨੀ ਵੱਲੋਂ 'ਡੇਅਰੀ ਕਾਨਕਲੇਵ-2026' ਤਹਿਤ ਕੀਤਾ ਗਿਆ। 'ਡੇਅਰਿਕਾ ਫਾਰਮਜ਼ ਪ੍ਰਾਈਵੇਟ ਲਿਮਟਿਡ' ਵੱਲੋਂ ਸਥਾਪਿਤ ਕੀਤੇ ਗਏ ਇਸ ਵਿਲੱਖਣ ਸਟਾਰਟ-ਅੱਪ ਦੀ ਸ਼ੁਰੂਆਤ ਨੌਜਵਾਨ ਉੱਦਮੀ ਸੰਜੀਵ ਸਿੰਘ ਠਾਕੁਰ ਅਤੇ ਸੀਰਤ ਤੂਰ ਵੱਲੋਂ ਕੀਤੀ ਗਈ ਹੈ। ਫਿਲਹਾਲ ਫਾਰਮ ਵਿੱਚ 12 ਖੋਤੀਆਂ ਲਿਆਂਦੀਆਂ ਹਨ ਅਤੇ ਆਉਣ ਵਾਲੇ ਸਮੇਂ ਵਿੱਚ ਇਨ੍ਹਾਂ ਦੀ ਗਿਣਤੀ ਵਧਾ ਕੇ 25 ਕਰਨ ਦੀ ਯੋਜਨਾ ਹੈ। ਜ਼ਿਕਰਯੋਗ ਹੈ ਕਿ ਔਸ਼ਧੀ ਗੁਣਾਂ ਨਾਲ ਭਰਪੂਰ ਹੋਣ ਕਾਰਨ ਬਾਜ਼ਾਰ ਵਿੱਚ ਗਧੀ (ਖੋਤੀ) ਦਾ ਦੁੱਧ 5,000 ਤੋਂ 7,000 ਰੁਪਏ ਪ੍ਰਤੀ ਲੀਟਰ ਤੱਕ ਵਿਕਦਾ ਹੈ।
ਉਦਘਾਟਨੀ ਸਮਾਰੋਹ ਨੂੰ ਸੰਬੋਧਨ ਕਰਦਿਆਂ ਤਕਨੀਕੀ ਸਿੱਖਿਆ ਮੰਤਰੀ ਰਾਜੇਸ਼ ਧਰਮਾਨੀ ਨੇ ਕਿਹਾ ਕਿ ਖੋਤੀ ਪਾਲਣ ਅਤੇ ਇਸ ਦੇ ਦੁੱਧ ਦੇ ਉਤਪਾਦਨ 'ਤੇ ਆਧਾਰਿਤ ਇਹ ਆਪਣੀ ਕਿਸਮ ਦਾ ਇੱਕ ਵਿਲੱਖਣ ਸਟਾਰਟ-ਅੱਪ ਹੈ, ਜਿਸ ਵਿੱਚ ਭਵਿੱਖ ਵਿੱਚ ਸਵੈ-ਰੋਜ਼ਗਾਰ ਅਤੇ ਵਪਾਰਕ ਤਰੱਕੀ ਦੀਆਂ ਅਪਾਰ ਸੰਭਾਵਨਾਵਾਂ ਮੌਜੂਦ ਹਨ। ਉਨ੍ਹਾਂ ਦੱਸਿਆ ਕਿ ਅੰਤਰਰਾਸ਼ਟਰੀ ਬਾਜ਼ਾਰ ਵਿੱਚ ਗਧੀ ਦੇ ਦੁੱਧ ਦੀ ਸਭ ਤੋਂ ਵੱਧ ਮੰਗ ਫਾਰਮਾਸਿਊਟੀਕਲ (ਦਵਾਈਆਂ) ਅਤੇ ਸਕਿਨ ਕੇਅਰ (ਸ਼ਿੰਗਾਰ ਸਮੱਗਰੀ) ਉਦਯੋਗ ਵਿੱਚ ਹੈ। ਹਾਲਾਂਕਿ, ਉਨ੍ਹਾਂ ਇਸ ਗੱਲ 'ਤੇ ਵੀ ਜ਼ੋਰ ਦਿੱਤਾ ਕਿ ਹਿਮਾਚਲ ਪ੍ਰਦੇਸ਼ ਵਿੱਚ ਇਸ ਕਾਰੋਬਾਰ ਨੂੰ ਵੱਡੇ ਪੱਧਰ 'ਤੇ ਵਪਾਰਕ ਰੂਪ ਦੇਣ ਲਈ ਵਿਗਿਆਨਕ ਖੋਜ, ਗੁਣਵੱਤਾ ਜਾਂਚ, ਪ੍ਰੋਸੈਸਿੰਗ ਅਤੇ ਮਾਰਕੀਟਿੰਗ ਦੀਆਂ ਸੰਭਾਵਨਾਵਾਂ ਦਾ ਡੂੰਘਾਈ ਨਾਲ ਅਧਿਐਨ ਕਰਨਾ ਬੇਹੱਦ ਜ਼ਰੂਰੀ ਹੈ। ਮੰਤਰੀ ਨੇ ਕਿਹਾ ਕਿ ਮੁੱਖ ਮੰਤਰੀ ਸੁਖਵਿੰਦਰ ਸਿੰਘ ਸੁੱਖੂ ਦੀ ਅਗਵਾਈ ਵਾਲੀ ਸੂਬਾ ਸਰਕਾਰ ਪਸ਼ੂ ਪਾਲਕਾਂ ਦੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਲਈ ਡੇਅਰੀ ਖੇਤਰ ਵਿੱਚ ਆਧੁਨਿਕ ਤਕਨੀਕ ਅਤੇ ਨਵਾਚਾਰ ਨੂੰ ਲਗਾਤਾਰ ਉਤਸ਼ਾਹਿਤ ਕਰ ਰਹੀ ਹੈ।
ਮਾਹਿਰਾਂ ਅਨੁਸਾਰ, ਗਧੀ ਦੇ ਦੁੱਧ ਵਿੱਚ ਲੈਕਟੋਜ਼, ਵੇਅ ਪ੍ਰੋਟੀਨ (Whey Protein), ਲਾਈਸੋਜ਼ਾਈਮ ਅਤੇ ਲੈਕਟੋਫੈਰਿਨ ਵਰਗੇ ਦੁਰਲੱਭ ਜੈਵਿਕ ਤੱਤ ਪਾਏ ਜਾਂਦੇ ਹਨ, ਜੋ ਇਸ ਨੂੰ ਪੋਸ਼ਣ ਅਤੇ ਸਿਹਤ ਪੱਖੋਂ ਬੇਹੱਦ ਖ਼ਾਸ ਬਣਾਉਂਦੇ ਹਨ। ਇਸ ਦੁੱਧ ਵਿੱਚ ਮੌਜੂਦ ਐਂਟੀਆਕਸੀਡੈਂਟ, ਵਿਟਾਮਿਨ-ਏ ਅਤੇ ਵਿਟਾਮਿਨ-ਡੀ ਚਮੜੀ ਨੂੰ ਡੂੰਘਾ ਪੋਸ਼ਣ ਦੇ ਕੇ ਝੁਰੜੀਆਂ ਘਟਾਉਣ ਅਤੇ ਚਮਕ ਵਧਾਉਣ ਵਿੱਚ ਮਦਦ ਕਰਦੇ ਹਨ, ਜਿਸ ਕਾਰਨ ਕਈ ਦੇਸ਼ਾਂ ਵਿੱਚ ਇਸ ਤੋਂ ਮਹਿੰਗੀਆਂ ਕਰੀਮਾਂ, ਸਾਬਣ, ਮੋਇਸਚਰਾਈਜ਼ਰ ਅਤੇ ਐਂਟੀ-ਏਜਿੰਗ ਉਤਪਾਦ ਤਿਆਰ ਕੀਤੇ ਜਾਂਦੇ ਹਨ। ਇਸ ਤੋਂ ਇਲਾਵਾ, ਸਿਹਤ ਪੱਖੋਂ ਇਹ ਦੁੱਧ ਬੱਚਿਆਂ ਅਤੇ ਬਜ਼ੁਰਗਾਂ ਵਿੱਚ ਖੰਘ, ਜ਼ੁਕਾਮ, ਦਮਾ, ਬ੍ਰੌਨਕਾਈਟਿਸ ਅਤੇ ਬਲਗਮ ਵਰਗੀਆਂ ਸਾਹ ਦੀਆਂ ਬਿਮਾਰੀਆਂ ਤੋਂ ਰਾਹਤ ਦਿਵਾਉਣ ਦੇ ਨਾਲ-ਨਾਲ ਬਲੱਡ ਸ਼ੂਗਰ ਦੇ ਪੱਧਰ ਨੂੰ ਕੰਟਰੋਲ ਕਰਨ ਵਿੱਚ ਵੀ ਸਹਾਈ ਸਿੱਧ ਹੁੰਦਾ ਹੈ।
ਘੱਟ ਉਤਪਾਦਨ ਅਤੇ ਸੀਮਤ ਉਪਲਬਧਤਾ ਕਾਰਨ ਗਧੀ ਦਾ ਦੁੱਧ ਆਮ ਬਾਜ਼ਾਰ ਵਿੱਚ ਆਸਾਨੀ ਨਾਲ ਨਹੀਂ ਮਿਲਦਾ, ਜਿਸ ਸਦਕਾ ਇਸ ਦੀ ਕੀਮਤ ਪੰਜ ਤੋਂ ਸੱਤ ਹਜ਼ਾਰ ਰੁਪਏ ਪ੍ਰਤੀ ਲੀਟਰ ਤੱਕ ਰਹਿੰਦੀ ਹੈ, ਜਦੋਂ ਕਿ ਇਸ ਦੁੱਧ ਤੋਂ ਤਿਆਰ ਪਾਊਡਰ ਦੀ ਕੀਮਤ ਗੁਣਵੱਤਾ ਦੇ ਆਧਾਰ 'ਤੇ 20 ਹਜ਼ਾਰ ਤੋਂ ਲੈ ਕੇ 80 ਹਜ਼ਾਰ ਰੁਪਏ ਪ੍ਰਤੀ ਕਿਲੋਗ੍ਰਾਮ ਤੱਕ ਪਹੁੰਚ ਜਾਂਦੀ ਹੈ। ਫਾਰਮ ਦੇ ਸੰਸਥਾਪਕ ਸੰਜੀਵ ਠਾਕੁਰ ਨੇ ਦੱਸਿਆ ਕਿ ਉਨ੍ਹਾਂ ਦੀ ਕੰਪਨੀ ਦੁੱਧ ਉਤਪਾਦਨ ਅਤੇ ਸੰਗ੍ਰਹਿ ਦੇ ਖੇਤਰ ਵਿੱਚ ਸਰਗਰਮੀ ਨਾਲ ਕੰਮ ਕਰ ਰਹੀ ਹੈ ਅਤੇ ਮੌਜੂਦਾ ਸਮੇਂ ਵਿੱਚ ਰੋਜ਼ਾਨਾ 2,700 ਲੀਟਰ ਤੋਂ ਵੱਧ ਦੁੱਧ ਇਕੱਠਾ ਕਰਕੇ ਆਸ-ਪਾਸ ਦੇ ਪਸ਼ੂ ਪਾਲਕਾਂ ਨੂੰ ਬਿਹਤਰ ਮਾਰਕੀਟਿੰਗ ਸਹੂਲਤਾਂ ਪ੍ਰਦਾਨ ਕਰ ਰਹੀ ਹੈ। ਦੱਸਣਯੋਗ ਹੈ ਕਿ ਹਿਮਾਚਲ ਸਰਕਾਰ ਵੱਲੋਂ ਪਹਿਲਾਂ ਹੀ ਪਸ਼ੂ ਪਾਲਕਾਂ ਦੇ ਹਿੱਤ ਵਿੱਚ ਗਾਂ ਦੇ ਦੁੱਧ ਦਾ ਖਰੀਦ ਮੁੱਲ ₹51 ਤੋਂ ਵਧਾ ਕੇ ₹61 ਪ੍ਰਤੀ ਲੀਟਰ, ਮੱਝ ਦੇ ਦੁੱਧ ਦਾ ਮੁੱਲ ₹61 ਤੋਂ ਵਧਾ ਕੇ ₹71 ਪ੍ਰਤੀ ਲੀਟਰ ਅਤੇ ਪ੍ਰਮਾਣਿਤ ਡੇਅਰੀਆਂ ਤੋਂ ਪ੍ਰਾਪਤ 'ਏ-2' (A-2) ਦੁੱਧ ਲਈ ₹100 ਪ੍ਰਤੀ ਲੀਟਰ ਦਾ ਮੁੱਲ ਨਿਰਧਾਰਤ ਕੀਤਾ ਗਿਆ ਹੈ।
- Download Babushahi App
-
-