ਸਰੀ 'ਚ ਉਭਰਦੇ ਨੌਜਵਾਨ ਸ਼ਾਇਰਾਂ ਨੇ ਉਸਤਾਦ ਤਜੰਮੁਲ ਕਲੀਮ ਦੀ ਯਾਦ 'ਚ ਸਜਾਈ ਯਾਦਗਾਰੀ ਮਹਿਫ਼ਿਲ
ਹਰਦਮ ਮਾਨ
ਸਰੀ, 4 ਜੂਨ 2026-ਪਰਦੇਸ ਦੀ ਧਰਤੀ ’ਤੇ ਪੜ੍ਹਾਈ ਦੇ ਬੋਝ, ਰੋਜ਼ੀ-ਰੋਟੀ ਦੀ ਜੱਦੋਜਹਿਦ ਅਤੇ ਭਵਿੱਖ ਨੂੰ ਸਥਾਪਿਤ ਕਰਨ ਦੀਆਂ ਚੁਣੌਤੀਆਂ ਦੇ ਦਰਮਿਆਨ, ਸਰੀ ਦੇ ਨੌਜਵਾਨਾਂ ਨੇ ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਦੀ ਇੱਕ ਮਿਸਾਲੀ ਇਬਾਰਤ ਲਿਖੀ ਹੈ। ਬੀਤੇ ਦਿਨੀਂ ‘ਪੰਜਾਬੀ ਗ਼ਜ਼ਲ’ ਸੰਸਥਾ ਵੱਲੋਂ ਸਰੀ ਦੇ ‘ਇੰਡੀਅਨ ਕਲੱਬ ਹਾਊਸ’ ਵਿਖੇ ਇੱਕ ਬੇਹੱਦ ਰਵਾਇਤੀ, ਸੰਜੀਦਾ ਅਤੇ ਸ਼ਾਨਦਾਰ ਮੁਸ਼ਾਇਰਾ ਕਰਵਾਇਆ ਗਿਆ। ਇਹ ਮੁਹੱਬਤੀ ਸ਼ਾਮ ਪਾਕਿਸਤਾਨ ਦੇ ਸਵਰਗੀ ਨਾਮਵਰ ਸ਼ਾਇਰ ਉਸਤਾਦ ਤਜੰਮੁਲ ਕਲੀਮ ਦੀ ਮਿੱਠੀ ਯਾਦ ਨੂੰ ਸਮਰਪਿਤ ਸੀ, ਜਿਨ੍ਹਾਂ ਦੀ ਅਦਬੀ ਵਿਰਾਸਤ ਅੱਜ ਦਿਆਂ ਨੌਜਵਾਨਾਂ ਦੇ ਦਿਲਾਂ ਵਿੱਚ ਚਾਨਣ ਬਿਖੇਰ ਰਹੀ ਹੈ।
ਇਸ ਸਮਾਗਮ ਦੀ ਸਭ ਤੋਂ ਵੱਡੀ ਖ਼ੂਬਸੂਰਤੀ ਇਹ ਸੀ ਕਿ ‘ਪੰਜਾਬੀ ਗ਼ਜ਼ਲ’ ਸੰਸਥਾ ਦੀ ਪ੍ਰਬੰਧਕੀ ਟੀਮ ਦੇ ਬਹੁਤੇ ਮੈਂਬਰ ਸਰੀ ਵਿੱਚ ਰਹਿ ਰਹੇ ਅੰਤਰਰਾਸ਼ਟਰੀ ਵਿਦਿਆਰਥੀ (ਇੰਟਰਨੈਸ਼ਨਲ ਸਟੂਡੈਂਟਸ) ਹਨ। ਅੱਜ ਦੇ ਦੌਰ ਵਿੱਚ ਜਿੱਥੇ ਆਮ ਬਹਿਸਾਂ ਵਿਦਿਆਰਥੀਆਂ ਦੀਆਂ ਮੁਸ਼ਕਿਲਾਂ ਜਾਂ ਨਕਾਰਾਤਮਕ ਵਿਵਾਦਾਂ ਦੁਆਲੇ ਘੁੰਮਦੀਆਂ ਹਨ, ਉੱਥੇ ਇਸ ਮਹਿਫ਼ਿਲ ਨੇ ਇੱਕ ਬੇਹੱਦ ਸਕਾਰਾਤਮਕ ਅਤੇ ਪ੍ਰੇਰਨਾਦਾਇਕ ਪੱਖ ਸਾਹਮਣੇ ਲਿਆਂਦਾ ਹੈ।
ਨੌਜਵਾਨ ਪ੍ਰਬੰਧਕਾਂ ਬਲਕਾਰ, ਬਲਤੇਜ ਬਰਾੜ, ਨੂਰ ਬੱਲ, ਸੰਧੂ ਚੋਹਲਾ, ਸਤਬੀਰ, ਅਨੰਤ, ਦੀਤ, ਹਰਪ੍ਰੀਤ ਬਰਾੜ, ਹਨੀ, ਸਤਵਿੰਦਰ ਅਤੇ ਅਨਮੋਲ ਨੇ ਜਿਸ ਉੱਚਪਾਏ ਦੀ ਲਗਨ, ਕਲਾਤਮਕ ਸੁਹਜ ਅਤੇ ਲੀਡਰਸ਼ਿਪ ਦਾ ਸਬੂਤ ਦਿੱਤਾ, ਉਸ ਨੂੰ ਦੇਖ ਕੇ ਇੰਝ ਲੱਗਦਾ ਸੀ ਜਿਵੇਂ ਇਹ ਕਾਰਜ ਵਰ੍ਹਿਆਂ ਤੋਂ ਮਹਿਫ਼ਿਲਾਂ ਸਜਾਉਣ ਵਾਲੇ ਤਜਰਬੇਕਾਰ ਪ੍ਰਬੰਧਕਾਂ ਨੇ ਕੀਤਾ ਹੋਵੇ। ਪੰਜਾਬੀ ਮਾਂ-ਬੋਲੀ ਦੀ ਸੇਵਾ ਅਤੇ ਭਾਈਚਾਰਕ ਸਾਂਝ ਦਾ ਜਜ਼ਬਾ ਪ੍ਰੋਗਰਾਮ ਦੇ ਹਰ ਰੰਗ ਵਿੱਚੋਂ ਝਲਕ ਰਿਹਾ ਸੀ। ਇਸ ਸੰਸਥਾ ਦੀ ਸਾਹਿਤਕ ਹਲਕਿਆਂ ਵਿੱਚ ਬਣੀ ਗੂੜ੍ਹੀ ਪਛਾਣ ਦਾ ਪ੍ਰਤੱਖ ਪ੍ਰਮਾਣ ਉਦੋਂ ਮਿਲਿਆ, ਜਦੋਂ ਪ੍ਰਸਿੱਧ ਗਾਇਕ-ਸ਼ਾਇਰ ਅਜ਼ੀਮ ਇਸ ਮਹਿਫ਼ਿਲ ਵਿੱਚ ਸ਼ਾਮਲ ਹੋਣ ਲਈ ‘ਪ੍ਰਿੰਸ ਜਾਰਜ’ ਤੋਂ ਉਚੇਚੇ ਤੌਰ 'ਤੇ ਲੰਮਾ ਸਫ਼ਰ ਤੈਅ ਕਰਕੇ ਪਹੁੰਚੇ।
ਮੁਸ਼ਾਇਰੇ ਦੌਰਾਨ 19 ਨਾਮਵਰ ਸ਼ਾਇਰਾਂ ਅਤੇ ਗਾਇਕਾਂ ਨੇ ਆਪਣੀ ਕਲਾਮ ਰਾਹੀਂ ਹਾਜ਼ਰੀ ਲਵਾਈ, ਜਿਨ੍ਹਾਂ ਵਿੱਚ ਸਿੱਧੂ ਬਲਕਾਰ, ਸ਼ਿਫ਼ਾਇਤ ਅਲੀ, ਜੱਸ, ਗੁਰੂ, ਸੰਧੂ ਚੋਹਲਾ, ਬਲਤੇਜ ਬਰਾੜ, ਨੂਰ ਬੱਲ, ਨਵਜੀਤ, ਦਸ਼ਮੇਸ਼ ਗਿੱਲ ਫ਼ਿਰੋਜ਼, ਰਾਜਵੰਤ ਰਾਜ, ਦਵਿੰਦਰ ਗੌਤਮ, ਪ੍ਰੀਤ ਮਨਪ੍ਰੀਤ, ਸੁਖਜੀਤ ਕੌਰ, ਹਰਸ਼ ਬਦੇਸ਼ਾ, ਵਸੁੰਧਰਾ ਰੋਗਨ, ਸਤਬੀਰ, ਮਨਪ੍ਰੀਤ, ਹਰਪ੍ਰੀਤ ਬਰਾੜ, ਅਤੇ ਅਜ਼ੀਜ਼ ਸ਼ਾਮਲ ਸਨ। ਹਾਲਾਂਕਿ ਬਹੁਤੇ ਫ਼ਨਕਾਰ ਉਮਰ ਦੇ ਲਿਹਾਜ਼ ਨਾਲ ਅਜੇ ਨੌਜਵਾਨ ਹਨ, ਪਰ ਉਨ੍ਹਾਂ ਦੀ ਸ਼ਾਇਰੀ ਵਿੱਚਲੀ ਡੂੰਘਾਈ, ਪਰਪੱਕਤਾ ਅਤੇ ਜਜ਼ਬਾਤੀ ਸੁਹਿਰਦਤਾ ਨੇ ਹਾਲ ਵਿੱਚ ਬੈਠੇ ਸਭਨਾਂ ਸਰੋਤਿਆਂ ਨੂੰ ਹੈਰਾਨ ਕਰ ਦਿੱਤਾ। ਹਰ ਸ਼ਿਅਰ ’ਤੇ ਸਰੋਤਿਆਂ ਵੱਲੋਂ ਦਿਲੋਂ ਨਿਕਲੀ ਦਾਦ ਨੇ ਮਾਹੌਲ ਨੂੰ ਰੂਹਾਨੀ ਰੰਗ ਦਿੱਤਾ।
ਇਨ੍ਹਾਂ ਨੌਜਵਾਨਾਂ ਨੇ ਸਥਾਨਕ ਸਾਹਿਤਕ ਸੰਸਥਾਵਾਂ ‘ਗ਼ਜ਼ਲ ਮੰਚ ਸਰੀ’, ‘ਸ਼ਾਇਰੀ ਕਲੱਬ’ ਅਤੇ ‘ਕਲਮਾਂ ਬੋਲਦੀਆਂ’ ਦੇ ਅਹੁਦੇਦਾਰਾਂ ਅਤੇ ਮੈਂਬਰਾਂ ਨੂੰ ਨਿੱਘਾ ਜੀ ਆਇਆਂ ਆਖ ਕੇ ਸਾਂਝੀਵਾਲਤਾ ਦੀ ਇੱਕ ਖ਼ੂਬਸੂਰਤ ਪਿਰਤ ਪਾਈ। ਇਸ ਆਪਸੀ ਸਹਿਯੋਗ ਨੇ ਸਾਹਿਤਕ ਭਾਈਚਾਰੇ ਵਿੱਚ ਆਪਸੀ ਪੁਲ ਉਸਾਰਨ ਦੀ ਅਹਿਮੀਅਤ ਨੂੰ ਹੋਰ ਦ੍ਰਿੜ੍ਹ ਕੀਤਾ।
'ਗ਼ਜ਼ਲ ਮੰਚ ਸਰੀ' ਨੇ 'ਪੰਜਾਬੀ ਗ਼ਜ਼ਲ' ਦੀ ਪੂਰੀ ਟੀਮ 'ਤੇ ਬੇਹੱਦ ਫ਼ਖ਼ਰ ਮਹਿਸੂਸ ਕਰਦਿਆਂ ਭਵਿੱਖ ਵਿੱਚ ਵੀ ਇਨ੍ਹਾਂ ਉਭਰਦੇ ਸਿਤਾਰਿਆਂ ਦੀ ਰਹਿਨੁਮਾਈ ਅਤੇ ਪਿੱਠ ਥਾਪੜਨ ਦਾ ਅਹਿਦ ਦੁਹਰਾਇਆ। ਮੰਚ ਵੱਲੋਂ ਸਿੱਧੂ ਬਲਕਾਰ, ਬਲਤੇਜ ਬਰਾੜ ਅਤੇ ਸਮੁੱਚੀ ਟੀਮ ਨੂੰ ਇਸ ਬੇਹੱਦ ਸਫ਼ਲ, ਸਾਰਥਕ ਅਤੇ ਯਾਦਗਾਰੀ ਅਦਬੀ ਸ਼ਾਮ ਲਈ ਮੁਬਾਰਕਬਾਦ ਦਿੱਤੀ ਗਈ।
- Download Babushahi App
-
-
