Punjab Breaking: 'ਮੇਡ' ਬਣ ਕੇ ਕਰੋੜਾਂ ਦੀ ਚੋਰੀ ਕਰਨ ਵਾਲੀ ਸ਼ਾਤਰ ਔਰਤ ਲੁਧਿਆਣਾ ਪੁਲਿਸ ਵੱਲੋਂ ਗ੍ਰਿਫ਼ਤਾਰ; ਪਿਸਤੌਲ, ਲੱਖਾਂ ਦੀ ਨਕਦੀ ਤੇ ਸੋਨਾ ਬਰਾਮਦ
ਥਾਣਾ ਟਿੱਬਾ ਦੀ ਪੁਲਿਸ ਨੇ ਸੀਸੀਟੀਵੀ (CCTV) ਕੈਮਰਿਆਂ ਦੀ ਮਦਦ ਨਾਲ ਸ਼ਾਤਰ ਮਹਿਲਾ ਚੋਰ ਨੂੰ ਦਬੋਚਿਆ
ਮੁਲਜ਼ਮ ਸੁਮਨ ਵਰਮਾ ਕੋਲੋਂ ਚੋਰੀ ਕੀਤੀ ਲਾਇਸੰਸੀ 7.62 MM ਪਿਸਤੌਲ, 17 ਜ਼ਿੰਦਾ ਰੌਂਦ, 2.80 ਲੱਖ ਕੈਸ਼ ਅਤੇ ਸੋਨਾ ਬਰਾਮਦ
ਘਰਾਂ ਵਿੱਚ ਨੌਕਰਾਨੀ ਬਣ ਕੇ ਵੜਦੀ ਸੀ ਮਹਿਲਾ; ਅਦਾਲਤ 'ਚ ਪੇਸ਼ ਕਰਕੇ ਦੁਬਾਰਾ ਲਿਆ ਜਾਵੇਗਾ ਰਿਮਾਂਡ
ਸੁਖਮਿੰਦਰ ਭੰਗੂ
ਲੁਧਿਆਣਾ, 26 ਮਈ 2026 - ਲੁਧਿਆਣਾ ਪੁਲਿਸ ਨੇ ਇੱਕ ਵੱਡੀ ਕਾਮਯਾਬੀ ਹਾਸਲ ਕਰਦਿਆਂ ਸ਼ਹਿਰ ਵਿੱਚ ਹੋਈ ਇੱਕ ਵੱਡੀ ਚੋਰੀ ਦੀ ਵਾਰਦਾਤ ਨੂੰ ਸੁਲਝਾਉਣ ਵਿੱਚ ਸਫ਼ਲਤਾ ਪ੍ਰਾਪਤ ਕੀਤੀ ਹੈ। ਪੁਲਿਸ ਨੇ ਇੱਕ ਅਜਿਹੀ ਸ਼ਾਤਰ ਮਹਿਲਾ ਚੋਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜੋ ਅਮੀਰ ਘਰਾਂ ਵਿੱਚ ਕੰਮ ਕਰਨ ਵਾਲੀ ਨੌਕਰਾਨੀ (ਮੇਡ) ਬਣ ਕੇ ਦਾਖ਼ਲ ਹੁੰਦੀ ਸੀ ਅਤੇ ਮੌਕਾ ਪਾ ਕੇ ਲੱਖਾਂ ਰੁਪਏ ਦੇ ਕੀਮਤੀ ਮਾਲ 'ਤੇ ਹੱਥ ਸਾਫ਼ ਕਰ ਦਿੰਦੀ ਸੀ। ਪੁਲਿਸ ਨੇ ਮੁਲਜ਼ਮ ਮਹਿਲਾ ਕੋਲੋਂ ਚੋਰੀ ਕੀਤੀ ਗਈ ਇੱਕ ਲਾਇਸੰਸੀ 7.62 MM ਪਿਸਤੌਲ, ਭਾਰੀ ਮਾਤਰਾ ਵਿੱਚ ਜ਼ਿੰਦਾ ਰੌਂਦ, ਲੱਖਾਂ ਦੀ ਨਕਦੀ ਅਤੇ ਸੋਨੇ ਦੇ ਗਹਿਣੇ ਬਰਾਮਦ ਕੀਤੇ ਹਨ।
ਇਹ ਸਫ਼ਲਤਾ ਪੁਲਿਸ ਕਮਿਸ਼ਨਰ ਸਵਪਨ ਸ਼ਰਮਾ (IPS), ਡਿਪਟੀ ਕਮਿਸ਼ਨਰ ਪੁਲਿਸ ਜਸਕਿਰਨਜੀਤ ਸਿੰਘ ਤੇਜਾ (PPS), ਵਧੀਕ ਡਿਪਟੀ ਕਮਿਸ਼ਨਰ (ਜ਼ੋਨ-4) ਜਸਨਦੀਪ ਸਿੰਘ ਗਿੱਲ (PPS) ਅਤੇ ਅਸਿਸਟੈਂਟ ਕਮਿਸ਼ਨਰ ਪੁਲਿਸ (ਈਸਟ) ਰਾਜ ਕੁਮਾਰ (PPS) ਦੇ ਦਿਸ਼ਾ-ਨਿਰਦੇਸ਼ਾਂ ਹੇਠ ਥਾਣਾ ਟਿੱਬਾ ਦੇ ਮੁੱਖ ਅਫ਼ਸਰ ਐਸ.ਆਈ. (SI) ਬਲਬੀਰ ਸਿੰਘ ਦੀ ਪੁਲਿਸ ਪਾਰਟੀ ਵੱਲੋਂ ਅੰਜਾਮ ਦਿੱਤੀ ਗਈ ਮੁਹਿੰਮ ਦੌਰਾਨ ਮਿਲੀ।
ਜਾਣਕਾਰੀ ਅਨੁਸਾਰ ਥਾਣਾ ਟਿੱਬਾ, ਲੁਧਿਆਣਾ ਵਿਖੇ ਮਿਤੀ 18.05.2026 ਨੂੰ ਮੁਕੱਦਮਾ ਨੰਬਰ 114 ਅਧੀਨ ਧਾਰਾ 305 BNS ਤਹਿਤ ਚੋਰੀ ਦਾ ਮਾਮਲਾ ਦਰਜ ਕੀਤਾ ਗਿਆ ਸੀ। ਸ਼ਿਕਾਇਤਕਰਤਾ ਮੁਤਾਬਕ ਉਨ੍ਹਾਂ ਦੇ ਘਰੋਂ ਇੱਕ ਲਾਇਸੰਸੀ 7.62 MM ਪਿਸਤੌਲ (ਸਮੇਤ ਮੈਗਜ਼ੀਨ ਅਤੇ 12 ਰੌਂਦ), ਲਾਕਰ ਵਿੱਚੋਂ 2,80,000 ਰੁਪਏ ਕੈਸ਼, 5/5 ਗ੍ਰਾਮ ਦੇ ਦੋ ਸੋਨੇ ਦੇ ਬਿਸਕੁਟ ਅਤੇ ਭਾਰੀ ਮਾਤਰਾ ਵਿੱਚ ਸੋਨੇ ਦੇ ਗਹਿਣੇ (ਜਿਸ ਵਿੱਚ ਜੈਂਟਸ ਬ੍ਰੇਸਲੈੱਟ, ਛਾਪਾਂ, ਲੇਡੀਜ਼ ਚੇਨਾਂ, ਡਾਇਮੰਡ ਰਿੰਗ, ਟੌਪਸ, ਵਾਲੀਆਂ ਅਤੇ ਲੇਡੀਜ਼ ਰਿੰਗਾਂ ਸ਼ਾਮਲ ਸਨ) ਚੋਰੀ ਹੋ ਗਏ ਸਨ।
ਸੀਸੀਟੀਵੀ (CCTV) ਕੈਮਰਿਆਂ ਨੇ ਖੋਲ੍ਹਿਆ ਰਾਜ਼
ਮਾਮਲੇ ਦੀ ਬਾਰੀਕੀ ਨਾਲ ਤਫ਼ਤੀਸ਼ ਕਰਦਿਆਂ ਪੁਲਿਸ ਨੇ ਇਲਾਕੇ ਵਿੱਚ ਲੱਗੇ CCTV ਕੈਮਰਿਆਂ ਦੀ ਫੁਟੇਜ ਨੂੰ ਖੰਗਾਲਿਆ ਅਤੇ ਪ੍ਰਾਈਵੇਟ ਸੋਰਸਾਂ ਦੀ ਮਦਦ ਲਈ। ਤਕਨੀਕੀ ਜਾਂਚ ਦੇ ਆਧਾਰ 'ਤੇ ਪੁਲਿਸ ਨੇ ਸੁਮਨ ਵਰਮਾ ਪਤਨੀ ਅਸ਼ੋਕ ਕੁਮਾਰ (ਵਾਸੀ ਮਕਾਨ ਨੰਬਰ 1703/5, ਗਲੀ ਨੰਬਰ 7, ਮਹਾਰਾਜਾ ਪ੍ਰਤਾਪ ਨਗਰ, ਲੁਧਿਆਣਾ) ਨੂੰ ਮਾਮਲੇ ਵਿੱਚ ਨਾਮਜ਼ਦ ਕਰਕੇ ਮਿਤੀ 23.05.2026 ਨੂੰ ਗ੍ਰਿਫ਼ਤਾਰ ਕਰ ਲਿਆ। ਪੁਲਿਸ ਮੁਤਾਬਕ ਉਕਤ ਮਹਿਲਾ ਦਾ ਪਹਿਲਾ ਕੋਈ ਅਪਰਾਧਿਕ ਰਿਕਾਰਡ ਨਹੀਂ ਹੈ।
ਅਦਾਲਤ ਵੱਲੋਂ ਮਿਲੇ 3 ਦਿਨਾਂ ਦੇ ਪੁਲਿਸ ਰਿਮਾਂਡ ਦੌਰਾਨ ਜਦੋਂ ਪੁਲਿਸ ਨੇ ਮੁਲਜ਼ਮ ਮਹਿਲਾ ਕੋਲੋਂ ਸਖ਼ਤੀ ਨਾਲ ਪੁੱਛਗਿੱਛ ਕੀਤੀ, ਤਾਂ ਉਸ ਦੀ ਨਿਸ਼ਾਨਦੇਹੀ 'ਤੇ ਮਿਤੀ 24.05.2026 ਨੂੰ: 1,50,000 ਰੁਪਏ ਨਕਦ, ਇੱਕ ਚੋਰੀ ਸ਼ੁਦਾ 7.62 MM ਪਿਸਤੌਲ ਸਮੇਤ ਮੈਗਜ਼ੀਨ ਅਤੇ 5 ਜ਼ਿੰਦਾ ਰੌਂਦ। ਮਿਤੀ 26.05.2026 ਨੂੰ: 1,30,000 ਰੁਪਏ ਨਕਦ, ਸੋਨੇ ਦੀਆਂ 2 ਚੇਨਾਂ, 3 ਲੇਡੀਜ਼ ਰਿੰਗਾਂ, 2 ਜੈਂਟਸ ਰਿੰਗ, ਕੰਨਾਂ ਦੀਆਂ ਸੋਨੇ ਦੀਆਂ ਵਾਲੀਆਂ ਅਤੇ 2 ਜੋੜੇ ਛੋਟੇ ਕੰਨਾਂ ਦੇ ਕੋਕੇ (ਕੁੱਲ ਵਜ਼ਨ 35 ਗ੍ਰਾਮ) ਅਤੇ 13 ਜ਼ਿੰਦਾ ਰੌਂਦ ਬਰਾਮਦ ਕੀਤੇ ਗਏ।
ਪੁਲਿਸ ਅਧਿਕਾਰੀਆਂ ਨੇ ਦੱਸਿਆ ਕਿ ਮੁਲਜ਼ਮ ਸੁਮਨ ਵਰਮਾ ਨੂੰ ਮਿਤੀ 27.05.2026 ਨੂੰ ਦੁਬਾਰਾ ਮਾਨਯੋਗ ਅਦਾਲਤ ਵਿੱਚ ਪੇਸ਼ ਕਰਕੇ ਹੋਰ ਪੁਲਿਸ ਰਿਮਾਂਡ ਹਾਸਲ ਕੀਤਾ ਜਾਵੇਗਾ। ਪੁਲਿਸ ਨੂੰ ਉਮੀਦ ਹੈ ਕਿ ਅਗਲੇਰੀ ਪੁੱਛਗਿੱਛ ਦੌਰਾਨ ਸ਼ਹਿਰ ਵਿੱਚ ਹੋਈਆਂ ਕਈ ਹੋਰ ਚੋਰੀਆਂ ਦੇ ਵੱਡੇ ਖੁਲਾਸੇ ਹੋਣ ਦੀ ਸੰਭਾਵਨਾ ਹੈ।
- Download Babushahi App
-
-
