ਪੰਜਾਬ ਵਿਧਾਨ ਸਭਾ 'ਚ E-20 ਪੈਟਰੋਲ 'ਤੇ ਹੰਗਾਮਾ: ਹਰਪਾਲ ਚੀਮਾ ਨੇ ਕੇਂਦਰ ਨੂੰ ਘੇਰਿਆ
ਰਾਣਾ ਗੁਰਜੀਤ ਬੋਲੇ, "ਮੈਂ ਕਰਮਯੋਗੀ ਹਾਂ, ਡਾਕੂ ਨਹੀਂ"
ਬਾਬੂਸ਼ਾਹੀ ਬਿਊਰੋ
ਚੰਡੀਗੜ੍ਹ, 4 ਅਗਸਤ 2026:
ਪੰਜਾਬ ਵਿਧਾਨ ਸਭਾ ਦੇ ਮਾਨਸੂਨ ਸੈਸ਼ਨ ਦੇ ਦੂਜੇ ਦਿਨ ਈਥਾਨੌਲ ਬਲੈਂਡਿਡ E-20 ਪੈਟਰੋਲ (E-20 Petrol) ਦਾ ਮੁੱਦਾ ਛਾਇਆ ਰਿਹਾ। ਵਿੱਤ ਮੰਤਰੀ ਹਰਪਾਲ ਸਿੰਘ ਚੀਮਾ ਨੇ ਸਦਨ ਵਿੱਚ E-20 ਪੈਟਰੋਲ ਦੇ ਖ਼ਾਮੀਆਂ ਅਤੇ ਵਾਹਨਾਂ 'ਤੇ ਪੈਣ ਵਾਲੇ ਮਾੜੇ ਪ੍ਰਭਾਵਾਂ ਸਬੰਧੀ ਇੱਕ ਪ੍ਰਸਤਾਵ (Resolution) ਪੇਸ਼ ਕੀਤਾ। ਉਨ੍ਹਾਂ ਮੰਗ ਕੀਤੀ ਕਿ ਪੁਰਾਣੇ ਜਾਂ ਗੈਰ-ਸਹਾਇਕ ਵਾਹਨਾਂ ਦੇ ਮਾਲਕਾਂ ਨੂੰ ਈਥਾਨੌਲ-ਮੁਕਤ ਸ਼ੁੱਧ ਪੈਟਰੋਲ ਦੀ ਵਰਤੋਂ ਦਾ ਵਿਕਲਪ ਮਿਲਣਾ ਚਾਹੀਦਾ ਹੈ ਅਤੇ ਵਾਹਨਾਂ ਦੇ ਨੁਕਸਾਨ ਦੀ ਸੂਰਤ ਵਿੱਚ ਮੁਆਵਜ਼ਾ ਨਿਰਧਾਰਤ ਕੀਤਾ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਇਹ ਪ੍ਰਸਤਾਵ ਕੇਂਦਰ ਸਰਕਾਰ ਨੂੰ ਭੇਜਣ ਦੀ ਅਪੀਲ ਕੀਤੀ।
ਇਸ ਬਹਿਸ ਦੌਰਾਨ ਹਰਪਾਲ ਚੀਮਾ ਨੇ ਤੰਜ ਕੱਸਦਿਆਂ ਕਿਹਾ ਕਿ ਈਥਾਨੌਲ ਤਿਆਰ ਕਰਨ ਵਾਲੇ ਨਿਰਮਾਤਾ (Manufacturers) ਵੀ ਸਦਨ ਵਿੱਚ ਮੌਜੂਦ ਹਨ। ਇਸ 'ਤੇ ਪਲਟਵਾਰ ਕਰਦਿਆਂ ਕਾਂਗਰਸ ਵਿਧਾਇਕ ਅਤੇ ਉਦਯੋਗਪਤੀ ਰਾਣਾ ਗੁਰਜੀਤ ਸਿੰਘ ਨੇ ਤਿੱਖੇ ਸ਼ਬਦਾਂ ਵਿੱਚ ਕਿਹਾ, "ਮੈਂ ਇੱਕ ਕਰਮਯੋਗੀ ਹਾਂ, ਡਾਕੂ ਨਹੀਂ।" ਰਾਣਾ ਗੁਰਜੀਤ ਨੇ ਆਪਣਾ ਪੱਖ ਰੱਖਦਿਆਂ ਕਿਹਾ ਕਿ ਉਨ੍ਹਾਂ ਦੀ ਇੰਡਸਟਰੀ ਨੇ ਪਹਿਲਾਂ ਧਾਗਾ ਬਣਾਇਆ, ਫਿਰ ਖੰਡ ਅਤੇ ਹੁਣ ਈਥਾਨੌਲ ਬਣਾ ਰਹੀ ਹੈ, ਜਿਸ ਨਾਲ ਕਿਸਾਨਾਂ ਦੀ ਮੱਕੀ ₹24 ਪ੍ਰਤੀ ਕਿੱਲੋ ਵਿਕ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਸਰਕਾਰ ਈਥਾਨੌਲ ਬੰਦ ਕਰਨਾ ਚਾਹੁੰਦੀ ਹੈ ਤਾਂ ਬੇਸ਼ੱਕ ਕਰ ਦੇਵੇ, ਉਹ ਕੋਈ ਹੋਰ ਕਾਰੋਬਾਰ ਸ਼ੁਰੂ ਕਰ ਲੈਣਗੇ।
- Download Babushahi App
-
-
