ਜੱਚਾ-ਬੱਚਾ ਦੀ ਮੌਤ ਦਰ ਘਟਾਉਣ ਲਈ ਪੋਸਟ ਨੇਟਲ ਕੇਅਰ ਲਾਹੇਵੰਦ : ਸਿਵਲ ਸਰਜਨ ਡਾ ਤਪਿੰਦਰਜੋਤ
ਅਸ਼ੋਕ ਵਰਮਾ
ਬਠਿੰਡਾ, 2 ਜਨਵਰੀ 2026 : ਜਣੇਪੇ ਤੋਂ ਬਾਅਦ ਕਿਸੇ ਵੀ ਮਾਂ-ਬੱਚੇ ਨੂੰ ਸਿਹਤ ਸਬੰਧੀ ਕੋਈ ਦਿੱਕਤ ਨਾ ਆਵੇ ਇਸ ਲਈ ਸਿਹਤ ਕਰਮੀਆਂ ਵੱਲੋਂ ਇਹਨਾਂ ਮਾਵਾਂ ਦੀ ਸਮੇਂ ਸਮੇਂ ਤੇ ਦੇਖਭਾਲ ਕੀਤੀ ਜਾਂਦੀ ਹੈ । ਇਸ ਸਬੰਧੀ ਜਾਣਕਾਰੀ ਦਿੰਦਿਆ ਸਿਵਲ ਸਰਜਨ ਡਾ ਤਪਿੰਦਰਜੋਤ ਨੇ ਦੱਸਿਆ ਕਿ ਮਾਂ ਅਤੇ ਬੱਚੇ ਦੀ ਮੌਤ ਦਰ ਨੂੰ ਘਟਾਉਣ ਲਈ ਸਿਹਤ ਵਿਭਾਗ ਹਰ ਤਰ੍ਹਾਂ ਦੇ ਸੰਭਵ ਉਪਰਾਲੇ ਕਰ ਰਿਹਾ ਹੈ । ਪੋਸਟ ਨੇਟਲ ਕੇਅਰ ਅਧੀਨ ਨਵਜੰਮੇ ਬੱਚੇ ਦੀ 6 ਹਫ਼ਤੇ ਤੱਕ ਘਰ ਵਿੱਚ ਜਾ ਕੇ ਸਿਹਤ ਵਿਭਾਗ ਦੇ ਕਰਮਚਾਰੀਆ ਵੱਲੋਂ ਲੋੜੀਦੀ ਜਾਂਚ ਕੀਤੀ ਜਾ ਰਹੀ ਹੈ ।
ਉਹਨਾਂ ਦੱਸਿਆ ਕਿ ਬੱਚਾ ਹੋਂਣ ਉਪਰੰਤ ਮਲਟੀਪਰਪਜ਼ ਹੈਲਥ ਸੁਪਰਵਾਇਜਰ (ਫੀਮੇਲ), ਮਲਟੀਪਰਪਜ਼ ਹੈਲਥ ਵਰਕਰ (ਫੀਮੇਲ) ਅਤੇ ਸਬੰਧਿਤ ਇਲਾਕੇ ਦੀ ਆਸ਼ਾ ਵਰਕਰ ਵੱਲੋਂ ਤੀਸਰੇ ਦਿਨ, ਸਤਵੇਂ ਦਿਨ, ਚੌਦਵੇਂ ਦਿਨ, ਅਠਾਈਵੇਂ ਦਿਨ ਅਤੇ ਬਿਆਲੀਵੇਂ ਦਿਨ ਮਾਂ ਅਤੇ ਬੱਚੇ ਦੀ ਘਰ ਜਾ ਕੇ ਜਾਂਚ ਕੀਤੀ ਜਾਂਦੀ ਹੈ । ਇਸ ਜਾਂਚ ਵਿੱਚ ਮਾਂ ਨੂੰ ਦੁੱਧ ਦੀ ਮਹੱਤਤਾ ਅਤੇ ਟੀਕਾਕਰਣ ਬਾਰੇ ਜਾਣਕਾਰੀ ਦਿੱਤੀ ਜਾਂਦੀ ਹੈ, ਨਾਲ ਹੀ, ਪੀਲੀਆ, ਬੁਖਾਰ, ਨਮੂਨੀਆ, ਸਾਹ ਸਬੰਧੀ ਅਤੇ ਬੱਚੇ ਦੇ ਭਾਰ ਦੀ ਜਾਂਚ ਕੀਤੀ ਜਾਂਦੀ ਹੈ । ਇਸ ਮੌਕੇ ਸਿਹਤ ਕਰਮਚਾਰੀਆ ਵੱਲੋਂ ਮਾਂ ਦੀ ਪੀੜਾ, ਰਕਤ-ਬਹਾਓ, ਮਾਸਪੇਸ਼ੀਆਂ ਦੀ ਸਹੀ ਜਗ੍ਹਾ , ਤਾਪਮਾਨ ਅਤੇ ਦਬਾਅ ਦੀ ਮੁਕੰਮਲ ਜਾਂਚ ਕੀਤੀ ਜਾਂਦੀ ਹੈ ।ਜਿਲ੍ਹਾ ਪਰਿਵਾਰ ਭਲਾਈ ਅਫ਼ਸਰ ਡਾ ਸੁਖਜਿੰਦਰ ਸਿੰਘ ਗਿੱਲ ਨੇ ਦੱਸਿਆ ਕਿ ਇਸਦੇ ਨਾਲ ਨਾਲ ਪਰਿਵਾਰਿਕ ਮੈਂਬਰਾਂ ਦੀ ਵੀ ਕੋਂਸਲਿੰਗ ਕੀਤੀ ਜਾਂਦੀ ਹੈ ਕਿ ਮਾਂ ਨੂੰ ਪੌਸ਼ਟਿਕ ਭੋਜਨ ਦਿੱਤਾ ਜਾਵੇ ਅਤੇ ਬੱਚੇ ਨੂੰ ਗੁੜਤੀ ਜਗ੍ਹਾ ਮਾਂ ਦਾ ਦੁੱਧ ਹੀ ਪਿਲਾਇਆ ਜਾਵੇ ।