ਸਿਵਲ ਸਰਜਨ ਵੱਲੋਂ ਜੱਚਾ-ਬੱਚਾ ਹਸਪਤਾਲ ਵਿਖੇ ਨਵੇਂ ਬਣੇ ਅਪ੍ਰੇਸ਼ਨ ਥੀਏਟਰ ਤੇ ਲੇਬਰ ਰੂਮ ਦਾ ਜਾਇਜ਼ਾ
ਅਸ਼ੋਕ ਵਰਮਾ
ਬਠਿੰਡਾ, 4 ਦਸੰਬਰ 2025: ਸੂਬਾ ਸਰਕਾਰ ਵੱਲੋਂ ਸਿਹਤ ਸੇਵਾਵਾਂ ਨੂੰ ਹੋਰ ਮਜ਼ਬੂਤ ਤੇ ਮਿਆਰੀ ਬਣਾਉਣ ਦੇ ਯਤਨਾਂ ਤਹਿਤ ਜੱਚਾ–ਬੱਚਾ ਹਸਪਤਾਲ ਨੂੰ ਪਹਿਲਾਂ ਦੇ 100 ਬੈਡ ਤੋਂ ਅਪਗ੍ਰੇਡ ਕਰਕੇ ਹੁਣ 130 ਬੈਡਾਂ ਦੇ ਵਿਸ਼ੇਸ਼ ਤੌਰ ‘ਤੇ ਵਿਕਸਤ ਜੱਚਾ-ਬੱਚਾ ਕੇਅਰ ਹਸਪਤਾਲ ਸਿਵਲ ਸਰਜਨ ਡਾ. ਤਪਿੰਦਰਜੋਤ ਵੱਲੋਂ ਵਿਸਤ੍ਰਿਤ ਜਾਇਜ਼ਾ ਲਿਆ ਗਿਆ।
ਇਸ ਮੌਕੇ ਸਿਵਲ ਸਰਜਨ ਨੇ ਦੱਸਿਆ ਕਿ ਇਸ ਜੱਚਾ-ਬੱਚਾ ਕੇਅਰ ਹਸਪਤਾਲ ਵਿੱਚ ਅਪਗ੍ਰੇਡ ਦੇ ਤਹਿਤ ਮੋਡਰਨ ਤਕਨੀਕ ਨਾਲ ਲੈਸ ਨਵਾਂ ਮੋਡੁਲਰ ਅਪਰੇਸ਼ਨ ਥੀਏਟਰ ਅਤੇ ਅਧੁਨਿਕ ਲੇਬਰ ਰੂਮ ਤਿਆਰ ਕੀਤੇ ਗਏ ਹਨ। ਉਹਨਾਂ ਵੱਲੋਂ ਨਵੇਂ ਤਿਆਰ ਕੀਤੇ ਗਏ ਮੋਡੁਲਰ ਅਪ੍ਰੇਸ਼ਨ ਥੀਏਟਰ ਦੀ ਬਣਤਰ, ਹਵਾ ਪ੍ਰਬੰਧਕ ਪ੍ਰਣਾਲੀ, ਫਿਲਟਰੇਸ਼ਨ, ਐਲ.ਈ.ਡੀ ਸਰਜੀਕਲ ਲਾਈਟਾਂ, ਮੋਡਰਨ ਐਨਸਥੀਸ਼ੀਆ ਮਸ਼ੀਨ, ਰਿਕਵਰੀ ਰੂਮ, ਇੰਫੈਕਸ਼ਨ ਕੰਟਰੋਲ ਲਈ ਸਪੱਸ਼ਟ ਕੀਤੇ ਮਿਆਰ, ਸਟੀਰੀਲਾਈਜ਼ੇਸ਼ਨ ਜ਼ੋਨ ਅਤੇ ਐਮਰਜੈਂਸੀ ਬੈਕਅੱਪ ਸਿਸਟਮ ਦੀ ਸਮੀਖਿਆ ਕੀਤੀ।
ਉਨ੍ਹਾਂ ਕਿਹਾ ਕਿ ਇਹ ਨਵਾਂ ਅਪਰੇਸ਼ਨ ਥੀਏਟਰ ਜੱਚਾ-ਬੱਚਾ ਸੇਵਾਵਾਂ ਵਿੱਚ ਇੱਕ ਵੱਡਾ ਕਦਮ ਹੈ ਜੋ ਹਸਪਤਾਲ ਦੀ ਸਮਰੱਥਾ ਨੂੰ ਕਾਫ਼ੀ ਵਧਾਏਗਾ। ਉਹਨਾਂ ਦੱਸਿਆ ਕਿ ਲੋਕਾਂ ਦੀਆਂ ਲੋੜਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਹਸਪਤਾਲ ਦੇ ਲੇਬਰ ਰੂਮ ਨੂੰ ਕੁੱਲ ਮਿਆਰੀ ਪੱਧਰ ਤੇ ਅਪਗ੍ਰੇਡ ਕੀਤਾ ਗਿਆ ਹੈ। ਇਸ ਵਿੱਚ ਨਾਰਮਲ ਡਿਲਿਵਰੀ ਸੁਵਿਧਾਵਾਂ, ਨਵਜਾਤ ਬੱਚਿਆਂ ਦੀ ਸੰਭਾਲ ਲਈ ਰੇਡੀਐਂਟ ਵਾਰਮਰ, ਆਕਸੀਜਨ ਸਪੋਰਟ, ਮਾਤਾ ਦੀ ਮਾਨੀਟਰਿੰਗ ਲਈ ਆਧੁਨਿਕ ਮਸ਼ੀਨਰੀ, ਸੈਨੀਟਾਈਜ਼ੇਸ਼ਨ ਸਹੂਲਤਾਂ, ਪ੍ਰਾਈਵੇਸੀ ਬੈਡਾਂ ਅਤੇ ਐਮਰਜੈਂਸੀ ਸਹੂਲਤਾਂ ਸ਼ਾਮਲ ਹਨ।
ਉਹਨਾਂ ਇਹ ਵੀ ਦੱਸਿਆ ਕਿ ਨਵਾਂ ਲੇਬਰ ਰੂਮ "ਮਾਂ ਅਤੇ ਨਵਜਾਤ ਬੱਚੇ ਦੀ ਸੁਰੱਖਿਆ" ਨੂੰ ਮੁੱਖ ਧਿਆਨ ਵਿੱਚ ਰੱਖ ਕੇ ਤਿਆਰ ਕੀਤਾ ਗਿਆ ਹੈ, ਜਿਸ ਨਾਲ ਜਟਿਲ ਪ੍ਰਸੂਤੀ ਮਾਮਲਿਆਂ ਦਾ ਤੁਰੰਤ ਇਲਾਜ ਹੋ ਸਕੇਗਾ। ਦੌਰੇ ਦੌਰਾਨ ਸਿਵਲ ਸਰਜਨ ਨੇ ਹਸਪਤਾਲ ਦੇ ਡਾਕਟਰਾਂ, ਨਰਸਿੰਗ ਸਟਾਫ ਅਤੇ ਟੈਕਨੀਕਲ ਟੀਮ ਨਾਲ ਗੱਲਬਾਤ ਕੀਤੀ ਅਤੇ ਨਵੀਂ ਬਣੀਆਂ ਸਹੂਲਤਾਂ ਨੂੰ ਵੱਧ ਤੋਂ ਵੱਧ ਪ੍ਰਭਾਵਸ਼ਾਲੀ ਢੰਗ ਨਾਲ ਚਲਾਉਣ ਲਈ ਨਿਰਦੇਸ਼ ਦਿੱਤੇ। ਇਹ ਅਪਗ੍ਰੇਡ ਬਠਿੰਡਾ ਅਤੇ ਆਸ-ਪਾਸ ਦੇ ਇਲਾਕਿਆਂ ਦੇ ਹਜ਼ਾਰਾਂ ਮਰੀਜ਼ਾਂ ਲਈ ਬਹੁਤ ਫਾਇਦੇਮੰਦ ਸਾਬਿਤ ਹੋਵੇਗਾ।
ਇਸ ਮੌਕੇ ਜਿਲ੍ਹਾ ਪਰਿਵਾਰ ਭਲਾਈ ਅਫ਼ਸਰ ਡਾ ਸੁਖਜਿੰਦਰ ਸਿੰਘ ਗਿੱਲ, ਡਾ ਅੰਜਲੀ ਬਾਂਸ਼ਲ, ਡਾ ਸਰਬਜੀਤ ਸਿੰਘ, ਡਾ ਕਰਨ ਅਬਰੋਲ, ਡਿਪਟੀ ਮਾਸ ਮੀਡੀਆ ਅਫ਼ਸਰ ਕੇਵਲ ਸਿੰਘ, ਜਿਲ੍ਹਾ ਬੀ.ਸੀ.ਸੀ ਨਰਿੰਦਰ ਕੁਮਾਰ, ਮੈਟਰਨ ਅਤੇ ਸਟਾਫ ਨਰਸ ਹਾਜ਼ਰ ਸਨ ।