Himachal ਜਾਣ ਵਾਲੇ ਖ਼ਬਰਦਾਰ !!
ਹਿਮਾਚਲ ਮਾਨਸੂਨ ਤਬਾਹੀ: ਮੀਂਹ ਅਤੇ Landslides ਕਾਰਨ 152 ਸੜਕਾਂ ਠੱਪ, 72 Electricity Transformers ਅਤੇ 68 Drinking Water Projects ਪ੍ਰਭਾਵਿਤ
ਬਾਬੂਸ਼ਾਹੀ ਬਿਊਰੋ
ਸ਼ਿਮਲਾ, 30 ਜੁਲਾਈ 2026:
ਹਿਮਾਚਲ ਪ੍ਰਦੇਸ਼ ਵਿੱਚ ਲਗਾਤਾਰ ਹੋ ਰਹੀ ਮੂਸਲਾਧਾਰ ਬਾਰਿਸ਼ ਨੇ ਆਮ ਜਨਜੀਵਨ ਨੂੰ ਬੁਰੇ ਤਰੀਕੇ ਨਾਲ ਪ੍ਰਭਾਵਿਤ ਕੀਤਾ ਹੈ, ਜਿਸ ਕਾਰਨ ਰਾਜ ਭਰ ਵਿੱਚ ਸੜਕੀ ਆਵਾਜਾਈ, ਬਿਜਲੀ ਅਤੇ ਪੀਣ ਵਾਲੇ ਪਾਣੀ ਦੀਆਂ ਸੇਵਾਵਾਂ ਬੁਰੇ ਤਰ੍ਹਾਂ ਡਗਮਗਾ ਗਈਆਂ ਹਨ। ਪਹਾੜਾਂ 'ਚ ਜ਼ਮੀਨ ਖਿਸਕਣ (Landslides) ਕਾਰਨ ਸੂਬੇ ਭਰ ਦੀਆਂ 152 ਮੁੱਖ ਸੜਕਾਂ 'ਤੇ ਵਾਹਨਾਂ ਦੀ ਆਵਾਜਾਈ ਪੂਰੀ ਤਰ੍ਹਾਂ ਬੰਦ ਹੋ ਗਈ ਹੈ, ਜਦਕਿ 72 ਟ੍ਰਾਂਸਫਾਰਮਰ ਠੱਪ ਹੋਣ ਨਾਲ ਕਈ ਖੇਤਰਾਂ 'ਚ ਬਲੈਕਆਊਟ ਦੀ ਸਥਿਤੀ ਹੈ ਅਤੇ 68 ਪੀਣ ਵਾਲੇ ਪਾਣੀ ਦੇ ਪ੍ਰੋਜੈਕਟ ਵੀ ਬੰਦ ਪਏ ਹਨ।
ਸਟੇਟ ਐਮਰਜੈਂਸੀ ਆਪ੍ਰੇਸ਼ਨ ਸੈਂਟਰ (State Emergency Operation Centre) ਦੀ ਤਾਜ਼ਾ ਰਿਪੋਰਟ ਅਨੁਸਾਰ ਸਭ ਤੋਂ ਮਾੜਾ ਅਸਰ ਮੰਡੀ ਜ਼ਿਲ੍ਹੇ ਵਿੱਚ ਦੇਖਣ ਨੂੰ ਮਿਲਿਆ ਹੈ, ਜਿੱਥੇ ਸਭ ਤੋਂ ਵੱਧ 57 ਸੜਕਾਂ ਬੰਦ ਹਨ, ਜਿਨ੍ਹਾਂ ਵਿੱਚ ਸਰਾਜ ਖੇਤਰ ਦੀਆਂ 33, ਥਲੌਟ ਦੀਆਂ 11, ਪਧਰ ਦੀਆਂ 8, ਸੁੰਦਰਨਗਰ ਦੀਆਂ 2 ਅਤੇ ਕਾਰਸੋਗ, ਧਰਮਪੁਰ ਤੇ ਜੋਗਿੰਦਰਨਗਰ ਸਬ-ਡਿਵੀਜ਼ਨਾਂ ਦੀ ਇੱਕ-ਇੱਕ ਸੜਕ ਸ਼ਾਮਲ ਹੈ। ਬੁੱਧਵਾਰ ਸਵੇਰੇ ਸੂਬੇ ਵਿੱਚ 182 ਸੜਕਾਂ ਠੱਪ ਸਨ, ਪਰ ਦਿਨ ਭਰ ਚੱਲੇ Restoration Work ਤੋਂ ਬਾਅਦ ਇਹ ਗਿਣਤੀ ਘੱਟ ਕੇ 152 ਰਹਿ ਗਈ ਹੈ। ਇਸ ਤੋਂ ਇਲਾਵਾ ਚੰਬਾ ਵਿੱਚ 33, ਕੁੱਲੂ ਵਿੱਚ 31, ਅਤੇ ਸ਼ਿਮਲਾ ਤੇ ਸਿਰਮੌਰ ਵਿੱਚ 14-14 ਸੜਕਾਂ 'ਤੇ ਆਵਾਜਾਈ ਠੱਪ ਹੈ।
ਬਿਜਲੀ ਅਤੇ ਪਾਣੀ ਦੀ ਸਪਲਾਈ ਦੀ ਗੱਲ ਕਰੀਏ ਤਾਂ ਚੰਬਾ ਦੇ ਡਲਹੌਜ਼ੀ ਵਿੱਚ 38, ਚੰਬਾ ਵਿੱਚ 11, ਟੀਸਾ ਵਿੱਚ 8, ਅਤੇ ਸਲੂਨੀ ਤੇ ਭਾਟੀਆਤ ਵਿੱਚ 1-1 ਟ੍ਰਾਂਸਫਾਰਮਰ ਬੰਦ ਹਨ। ਦੂਜੇ ਪਾਸੇ ਪੀਣ ਵਾਲੇ ਪਾਣੀ ਦੀਆਂ 68 ਸਕੀਮਾਂ ਬੰਦ ਹੋਣ ਨਾਲ ਲੋਕਾਂ ਨੂੰ ਭਾਰੀ ਕਿੱਲਤ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਜਿਸ ਵਿੱਚ ਹਮੀਰਪੁਰ ਦੀਆਂ 23, ਬਿਲਾਸਪੁਰ ਦੀਆਂ 18, ਚੰਬਾ ਦੀਆਂ 15, ਸਿਰਮੌਰ ਦੀਆਂ 9, ਸ਼ਿਮਲਾ ਦੀਆਂ 2 ਅਤੇ ਮੰਡੀ ਦੀ 1 ਪਾਣੀ ਯੋਜਨਾ ਸ਼ਾਮਲ ਹੈ।
ਇਸ ਮਾਨਸੂਨ ਸੀਜ਼ਨ ਦੌਰਾਨ ਮੌਸਮ ਦੇ ਕਹਿਰ ਨਾਲ ਜਾਨੀ ਨੁਕਸਾਨ ਵੀ ਹੋਇਆ ਹੈ। ਐਮਰਜੈਂਸੀ ਆਪ੍ਰੇਸ਼ਨ ਸੈਂਟਰ ਦੇ ਅੰਕੜਿਆਂ ਮੁਤਾਬਕ 30 ਜੂਨ ਤੋਂ 29 ਜੁਲਾਈ ਤੱਕ ਸੂਬੇ ਵਿੱਚ ਕੁੱਲ 15 ਮੌਤਾਂ ਦਰਜ ਕੀਤੀਆਂ ਗਈਆਂ ਹਨ, ਜਿਨ੍ਹਾਂ ਵਿੱਚੋਂ ਲਾਹੌਲ-ਸਪਿਤੀ ਵਿੱਚ ਜ਼ਮੀਨ ਖਿਸਕਣ ਕਾਰਨ 13 ਲੋਕਾਂ ਦੀ ਜਾਨ ਗਈ, ਜਦਕਿ ਚੰਬਾ ਵਿੱਚ 1 ਅਤੇ ਕਿਨੌਰ ਵਿੱਚ Flash Floods ਕਾਰਨ 1 ਵਿਅਕਤੀ ਦੀ ਮੌਤ ਹੋਈ ਹੈ। ਪ੍ਰਸ਼ਾਸਨ ਵਲੋਂ ਰਾਹਤ ਅਤੇ ਬਚਾਅ ਕਾਰਜ ਲਗਾਤਾਰ ਜਾਰੀ ਹਨ।
- Download Babushahi App
-
-
