ਸਾਲਾਂ ਦਾ ਇੰਤਜ਼ਾਰ ਖ਼ਤਮ! ਨੇਵੀ ਦੀ ਐਂਸੀ ਸੋਜਨ ਐਡਾਪਿੱਲੀ ਨੇ 6.88 ਮੀਟਰ ਦੀ ਛਾਲ ਮਾਰ ਕੇ ਭਾਰਤੀ ਐਥਲੈਟਿਕਸ ਵਿੱਚ ਰਚਿਆ ਇਤਿਹਾਸ
ਸੁਖਮਿੰਦਰ ਭੰਗੂ
ਐਥਲੈਟਿਕਸ ਲਈ 27 ਜੂਨ 2026 ਦਾ ਦਿਨ ਇਤਿਹਾਸਕ ਬਣ ਗਿਆ, ਜਦੋਂ ਭਾਰਤੀ ਨੇਵੀ ਦੀ ਚੀਫ਼ ਪੈਟੀ ਅਫ਼ਸਰ ਐਂਸੀ ਸੋਜਨ ਐਡਾਪਿੱਲੀ ਨੇ 65ਵੀਂ ਰਾਸ਼ਟਰੀ ਇੰਟਰ-ਸਟੇਟ ਸੀਨੀਅਰ ਐਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਮਹਿਲਾਵਾਂ ਦੀ ਲੰਬੀ ਛਾਲ ਦਾ 22 ਸਾਲ ਪੁਰਾਣਾ ਰਾਸ਼ਟਰੀ ਰਿਕਾਰਡ ਤੋੜ ਕੇ ਦੇਸ਼ ਨੂੰ ਮਾਣ ਦਾ ਅਹਿਸਾਸ ਕਰਵਾਇਆ। ਕਲਿੰਗਾ ਸਟੇਡੀਅਮ ਵਿੱਚ ਖਚਾਖਚ ਭਰੇ ਦਰਸ਼ਕਾਂ ਦੀਆਂ ਤਾਲੀਆਂ ਦਰਮਿਆਨ ਐਂਸੀ ਨੇ ਆਪਣੇ ਪੰਜਵੇਂ ਯਤਨ ਵਿੱਚ 6.88 ਮੀਟਰ ਦੀ ਸ਼ਾਨਦਾਰ ਛਾਲ ਮਾਰ ਕੇ ਨਵਾਂ ਰਾਸ਼ਟਰੀ ਕੀਰਤੀਮਾਨ ਸਥਾਪਤ ਕੀਤਾ।
ਇਸ ਤੋਂ ਪਹਿਲਾਂ ਇਹ ਰਿਕਾਰਡ ਭਾਰਤ ਦੀ ਮਹਾਨ ਐਥਲੀਟ ਅੰਜੂ ਬੌਬੀ ਜਾਰਜ ਦੇ ਨਾਮ ਸੀ, ਜਿਨ੍ਹਾਂ ਨੇ 2004 ਦੇ ਏਥਨਜ਼ ਓਲੰਪਿਕ ਦੌਰਾਨ 6.83 ਮੀਟਰ ਦੀ ਛਾਲ ਮਾਰ ਕੇ ਰਾਸ਼ਟਰੀ ਰਿਕਾਰਡ ਬਣਾਇਆ ਸੀ। ਲਗਭਗ ਦੋ ਦਹਾਕਿਆਂ ਤੱਕ ਅਟੁੱਟ ਰਹੇ ਇਸ ਰਿਕਾਰਡ ਨੂੰ ਤੋੜਨਾ ਹਰ ਭਾਰਤੀ ਐਥਲੀਟ ਦਾ ਸੁਪਨਾ ਸੀ, ਜੋ ਹੁਣ ਐਂਸੀ ਸੋਜਨ ਨੇ ਸਾਕਾਰ ਕਰ ਦਿਖਾਇਆ।
ਮੁਕਾਬਲੇ ਦੌਰਾਨ ਐਂਸੀ ਦਾ ਪ੍ਰਦਰਸ਼ਨ ਲਗਾਤਾਰ ਪ੍ਰਭਾਵਸ਼ਾਲੀ ਰਿਹਾ। ਉਸ ਦੀਆਂ ਛੇ ਕੋਸ਼ਿਸ਼ਾਂ ਵਿੱਚ 6.73 ਮੀਟਰ, ਫਾਊਲ, 6.67 ਮੀਟਰ, 6.72 ਮੀਟਰ, 6.88 ਮੀਟਰ ਅਤੇ 6.69 ਮੀਟਰ ਦੀਆਂ ਛਾਲਾਂ ਸ਼ਾਮਲ ਰਹੀਆਂ। ਰਿਕਾਰਡ ਤੋੜਨ ਵਾਲੀ ਪੰਜਵੀਂ ਛਾਲ ਨੇ ਨਾ ਸਿਰਫ਼ ਉਸਨੂੰ ਸੋਨ ਤਗਮਾ ਦਿਵਾਇਆ, ਸਗੋਂ ਏਸ਼ੀਆਈ ਖੇਡਾਂ ਲਈ ਲੋੜੀਂਦਾ ਕੁਆਲੀਫਿਕੇਸ਼ਨ ਮਾਪਦੰਡ ਵੀ ਆਸਾਨੀ ਨਾਲ ਪਾਰ ਕਰਵਾ ਦਿੱਤਾ। ਇਸ ਮੁਕਾਬਲੇ ਵਿੱਚ ਸ਼ੈਲੀ ਸਿੰਘ 6.67 ਮੀਟਰ ਨਾਲ ਦੂਜੇ ਅਤੇ ਮੁਬਾਸ਼ੀਨਾ ਮੁਹੰਮਦ 6.53 ਮੀਟਰ ਨਾਲ ਤੀਜੇ ਸਥਾਨ 'ਤੇ ਰਹੀਆਂ।
ਆਟੋ ਚਾਲਕ ਦੀ ਧੀ ਬਣੀ ਦੇਸ਼ ਦੀ ਸ਼ਾਨ
1 ਮਾਰਚ 2001 ਨੂੰ ਕੇਰਲ ਦੇ ਤ੍ਰਿਸ਼ੂਰ ਜ਼ਿਲ੍ਹੇ ਦੇ ਨੱਟਿਕਾ ਵਿੱਚ ਜਨਮੀ ਐਂਸੀ ਸੋਜਨ ਦਾ ਸਫ਼ਰ ਸੰਘਰਸ਼, ਮਿਹਨਤ ਅਤੇ ਦ੍ਰਿੜ੍ਹ ਇਰਾਦੇ ਦੀ ਮਿਸਾਲ ਹੈ। ਉਸਦੇ ਪਿਤਾ ਸੋਜਨ ਈ.ਟੀ. ਇੱਕ ਆਟੋ-ਰਿਕਸ਼ਾ ਚਾਲਕ ਹਨ। ਉਹ ਖੁਦ ਵੀ ਐਥਲੈਟਿਕਸ ਨਾਲ ਜੁੜੇ ਰਹੇ, ਪਰ ਆਰਥਿਕ ਹਾਲਾਤਾਂ ਕਾਰਨ ਆਪਣੇ ਸੁਪਨੇ ਪੂਰੇ ਨਾ ਕਰ ਸਕੇ। ਉਨ੍ਹਾਂ ਨੇ ਆਪਣੀਆਂ ਖ਼ਾਹਿਸ਼ਾਂ ਨੂੰ ਪਿੱਛੇ ਛੱਡ ਕੇ ਧੀ ਦੇ ਸੁਪਨਿਆਂ ਨੂੰ ਆਪਣਾ ਮਕਸਦ ਬਣਾ ਲਿਆ। ਸੀਮਤ ਆਮਦਨ ਦੇ ਬਾਵਜੂਦ ਉਨ੍ਹਾਂ ਨੇ ਕਦੇ ਵੀ ਧੀ ਦੀ ਟ੍ਰੇਨਿੰਗ, ਖੁਰਾਕ ਜਾਂ ਮੁਕਾਬਲਿਆਂ ਵਿੱਚ ਕੋਈ ਕਮੀ ਨਹੀਂ ਆਉਣ ਦਿੱਤੀ।
ਨੇਵੀ ਦੀ ਵਰਦੀ ਅਤੇ ਦੇਸ਼ ਲਈ ਮਾਣ
ਐਂਸੀ ਸਿਰਫ਼ ਇੱਕ ਕਾਮਯਾਬ ਐਥਲੀਟ ਹੀ ਨਹੀਂ, ਸਗੋਂ ਭਾਰਤੀ ਨੇਵੀ ਵਿੱਚ ਚੀਫ਼ ਪੈਟੀ ਅਫ਼ਸਰ ਵਜੋਂ ਵੀ ਦੇਸ਼ ਦੀ ਸੇਵਾ ਕਰ ਰਹੀ ਹੈ। ਫੌਜੀ ਅਨੁਸ਼ਾਸਨ, ਸਖ਼ਤ ਸਿਖਲਾਈ ਅਤੇ ਦੇਸ਼ ਪ੍ਰਤੀ ਸਮਰਪਣ ਨੇ ਉਸਨੂੰ ਵਿਸ਼ਵ ਪੱਧਰ ਦੀ ਖਿਡਾਰਨ ਬਣਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ। ਖੇਡ ਮੈਦਾਨ ਅਤੇ ਫੌਜੀ ਸੇਵਾ—ਦੋਵਾਂ ਖੇਤਰਾਂ ਵਿੱਚ ਉਸਦੀ ਕਾਰਗੁਜ਼ਾਰੀ ਨੌਜਵਾਨਾਂ ਲਈ ਪ੍ਰੇਰਣਾ ਹੈ।
ਪਹਿਲਾਂ ਵੀ ਜਿੱਤ ਚੁੱਕੀ ਹੈ ਕਈ ਅੰਤਰਰਾਸ਼ਟਰੀ ਤਮਗੇ
ਐਂਸੀ ਨੇ 2022 ਦੀਆਂ ਏਸ਼ੀਆਈ ਖੇਡਾਂ ਵਿੱਚ ਚਾਂਦੀ ਦਾ ਤਗਮਾ ਜਿੱਤ ਕੇ ਆਪਣੀ ਕਾਬਲੀਅਤ ਦਾ ਲੋਹਾ ਮਨਵਾਇਆ ਸੀ। ਇਸ ਤੋਂ ਬਾਅਦ 2025 ਏਸ਼ੀਅਨ ਐਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਵੀ ਚਾਂਦੀ ਦਾ ਤਗਮਾ ਅਤੇ 2026 ਏਸ਼ੀਅਨ ਇੰਡੋਰ ਐਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਵੀ ਸ਼ਾਨਦਾਰ ਪ੍ਰਦਰਸ਼ਨ ਕਰਕੇ ਭਾਰਤ ਦਾ ਮਾਣ ਵਧਾਇਆ। ਹੁਣ ਰਾਸ਼ਟਰੀ ਰਿਕਾਰਡ ਨੇ ਉਸਨੂੰ ਭਾਰਤੀ ਐਥਲੈਟਿਕਸ ਦੀਆਂ ਮਹਾਨ ਹਸਤੀਆਂ ਦੀ ਕਤਾਰ ਵਿੱਚ ਖੜ੍ਹਾ ਕਰ ਦਿੱਤਾ ਹੈ।
"ਇਹ ਰਿਕਾਰਡ ਮੇਰੇ ਪਿਤਾ ਲਈ"
ਇਤਿਹਾਸ ਰਚਣ ਤੋਂ ਬਾਅਦ ਭਾਵੁਕ ਹੋਈ ਐਂਸੀ ਨੇ ਆਪਣੀ ਇਹ ਉਪਲਬਧੀ ਆਪਣੇ ਪਿਤਾ ਨੂੰ ਸਮਰਪਿਤ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਤਿਆਗ ਅਤੇ ਵਿਸ਼ਵਾਸ ਤੋਂ ਬਿਨਾਂ ਇਹ ਸਫ਼ਰ ਸੰਭਵ ਨਹੀਂ ਸੀ। ਦੂਜੇ ਪਾਸੇ ਅੰਜੂ ਬੌਬੀ ਜਾਰਜ ਨੇ ਵੀ ਨਵੇਂ ਰਿਕਾਰਡ ਦਾ ਦਿਲੋਂ ਸਵਾਗਤ ਕਰਦਿਆਂ ਕਿਹਾ ਕਿ ਹਰ ਰਿਕਾਰਡ ਇਸ ਲਈ ਬਣਦਾ ਹੈ ਕਿ ਇੱਕ ਦਿਨ ਕੋਈ ਹੋਰ ਉਸਨੂੰ ਤੋੜ ਕੇ ਦੇਸ਼ ਨੂੰ ਹੋਰ ਅੱਗੇ ਲੈ ਕੇ ਜਾਵੇ।
ਭਾਰਤੀ ਨੇਵੀ ਦੀ ਇਸ ਬਹਾਦਰ ਧੀ ਨੇ ਸਾਬਤ ਕਰ ਦਿੱਤਾ ਹੈ ਕਿ ਮਿਹਨਤ, ਅਨੁਸ਼ਾਸਨ, ਲਗਨ ਅਤੇ ਪਰਿਵਾਰ ਦਾ ਸਹਿਯੋਗ ਹੋਵੇ ਤਾਂ ਕੋਈ ਵੀ ਸੁਪਨਾ ਅਸੰਭਵ ਨਹੀਂ ਰਹਿੰਦਾ। ਐਂਸੀ ਸੋਜਨ ਐਡਾਪਿੱਲੀ ਦੀ ਇਹ ਇਤਿਹਾਸਕ ਛਾਲ ਸਿਰਫ਼ 6.88 ਮੀਟਰ ਦੀ ਦੂਰੀ ਨਹੀਂ, ਸਗੋਂ ਕਰੋੜਾਂ ਭਾਰਤੀਆਂ ਦੇ ਸੁਪਨਿਆਂ ਅਤੇ ਉਮੀਦਾਂ ਨੂੰ ਨਵੀਂ ਉਡਾਣ ਦੇਣ ਵਾਲਾ ਇੱਕ ਯਾਦਗਾਰ ਪਲ ਹੈ। ਸਲਾਮ ਭਾਰਤੀ ਨੇਵੀ ਦੀ ਇਸ ਸ਼ੇਰਨੀ ਨੂੰ... ਜਿਸ ਨੇ ਭਾਰਤ ਦੇ ਖੇਡ ਇਤਿਹਾਸ ਵਿੱਚ ਇੱਕ ਨਵਾਂ ਸੁਨਹਿਰਾ ਅਧਿਆਇ ਲਿਖ ਦਿੱਤਾ।
-
ਸੁਖਮਿੰਦਰ ਭੰਗੂ, ਲੇਖਕ
bhangoo1164@gmail.com
9815752449
Disclaimer : The opinions expressed within this article are the personal opinions of the writer/author. The facts and opinions appearing in the article do not reflect the views of Babushahi.com or Tirchhi Nazar Media. Babushahi.com or Tirchhi Nazar Media does not assume any responsibility or liability for the same.