NRI ਪੱਤਰਕਾਰ ਹਰਜਿੰਦਰ ਸਿੰਘ ਬਸਿਆਲਾ ਨਿਊਜ਼ੀਲੈਂਡ ਦੇ ਕਿੰਗਜ਼ ਸਰਵਿਸ ਮੈਡਲ ਨਾਲ ਸਨਮਾਨਿਤ ਹੋਣਗੇ
ਬਸਿਆਲਾ ਲੰਮੇ ਸਮੇਂ ਤੋਂ ਨਿਊਜ਼ੀਲੈਂਡ ਤੋਂ ਬਾਬੂਸ਼ਾਹੀ ਨੈੱਟਵਰਕ ਨਾਲ ਜੁੜੇ ਹੋਏ ਹਨ
ਬਾਬੂਸ਼ਾਹੀ ਨਿਊਜ਼ ਨੈੱਟਵਰਕ ਬਿਊਰੋ
ਆਕਲੈਂਡ, 31 ਦਸੰਬਰ 2025:
ਦੁਨੀਆ ਭਰ ਦੀ ਪੰਜਾਬੀ ਮੀਡੀਆ ਲਈ ਮਾਣ ਦਾ ਪਲ ਹੈ ਕਿ Senior NRI ਪੱਤਰਕਾਰ ਹਰਜਿੰਦਰ ਸਿੰਘ ਬਸਿਆਲਾ ਨੂੰ ਨਿਊਜ਼ੀਲੈਂਡ ਦੀ ਪ੍ਰਤਿਸ਼ਠਿਤ ਕਿੰਗਜ਼ ਸਰਵਿਸ ਮੈਡਲ (KSM) ਨਾਲ 2026 ਦੀ ਨਵੀਂ ਸਾਲਾਨਾ ਸਨਮਾਨ ਸੂਚੀ ਵਿੱਚ ਸ਼ਾਮਲ ਕੀਤਾ ਗਿਆ ਹੈ। ਭਾਰਤੀ ਮੂਲ ਦੇ ਕਈ ਸਨਮਾਨਿਤ ਵਿਅਕਤੀਆਂ ਵਿੱਚ ਸ਼ਾਮਲ ਮਿਸਟਰ ਬਸਿਆਲਾ—ਨਿਊਜ਼ੀਲੈਂਡ ਦੇ ਪਹਿਲੇ ਆਨਲਾਈਨ ਪੰਜਾਬੀ ਨਿਊਜ਼ ਪਲੇਟਫ਼ਾਰਮ Punjabi Herald ਦੇ ਸੰਪਾਦਕ,ਬਾਬੂਸ਼ਾਹੀ ਨਿਊਜ਼ ਨੈੱਟਵਰਕ ਦੇ ਓਵਰਸੀਜ਼ ਟੀਮ ਮੈਂਬਰ, ਜਸਟਿਸ ਆਫ਼ ਦ ਪੀਸ (JP) ਅਤੇ ਮੈਰਿਜ ਸੈਲਿਬ੍ਰੈਂਟ—ਨੂੰ ਸਮਾਜ ਲਈ ਕੀਤੀਆਂ ਵਿਸ਼ੇਸ਼ ਸੇਵਾਵਾਂ ਲਈ ਮਾਨਤਾ ਮਿਲੀ ਹੈ। ਇਸ ਸਨਮਾਨ ਨੂੰ ਉਨ੍ਹਾਂ ਨੇ ਪੂਰੇ ਪੰਜਾਬੀ ਮੀਡੀਆ ਭਾਈਚਾਰੇ ਨੂੰ ਸਮਰਪਿਤ ਕਰਦੇ ਹੋਏ, ਉਨ੍ਹਾਂ ਸਭ ਸੰਸਥਾਵਾਂ ਅਤੇ ਵਿਅਕਤੀਆਂ ਦਾ ਦਿਲੋਂ ਧੰਨਵਾਦ ਕੀਤਾ ਜਿਨ੍ਹਾਂ ਨੇ ਉਨ੍ਹਾਂ ਦੀ ਨਾਮਜ਼ਦਗੀ ਅਤੇ ਸਿਫ਼ਾਰਸ਼ ਕੀਤੀ।
ਹਰ ਨਵੇਂ ਸਾਲ ਦੇ ਮੌਕੇ ਮਾਣਯੋਗ ਗਵਰਨਰ ਜਨਰਲ ਨਿਊਜ਼ੀਲੈਂਡ ਵੱਲੋਂ ਵੱਖ-ਵੱਖ ਸੇਵਾਵਾਂ ਲਈ ਸਨਮਾਨਾਂ ਦੀ ਘੋਸ਼ਣਾ ਕੀਤੀ ਜਾਂਦੀ ਹੈ। ਅੱਜ ਨਵੇਂ ਸਾਲ 2026 ਦੀ ਆਮਦ ਮੌਕੇ ‘ਨਿਊ ਯੀਅਰ ਆਨਰਜ਼ ਲਿਸਟ’ ਜਾਂ ਕਹਿ ਲਈਏ ‘ਕਿੰਗ’ਜ਼ ਸਰਵਿਸ ਮੈਡਲ-KSM’ ਦੇ ਲਈ ਸਨਮਾਨ ਸੂਚੀ ਜਾਰੀ ਕੀਤੀ ਗਈ ਹੈ। ਇਹ ਉਨ੍ਹਾਂ ਵਿਅਕਤੀਆਂ ਨੂੰ ਸਨਮਾਨਿਤ ਕਰਨ ਦਾ ਇੱਕ ਮਹੱਤਵਪੂਰਨ ਮੌਕਾ ਹੈ ਜਿਨ੍ਹਾਂ ਨੇ ਆਪਣੇ ਭਾਈਚਾਰਿਆਂ, ਦੇਸ਼ ਜਾਂ ਵਿਸ਼ਵ ਪੱਧਰ ’ਤੇ ਅਸਧਾਰਨ ਸੇਵਾਵਾਂ, ਪ੍ਰਾਪਤੀਆਂ ਅਤੇ ਯੋਗਦਾਨ ਪਾਏ ਹਨ। ਇਹ ਸੂਚੀ ਸਿਰਫ਼ ਪ੍ਰਸਿੱਧ ਸ਼ਖ਼ਸੀਅਤਾਂ ਲਈ ਨਹੀਂ, ਸਗੋਂ ਉਹਨਾਂ ਅਣਥੱਕ ਕਾਮਿਆਂ ਲਈ ਵੀ ਹੈ ਜੋ ਚੁੱਪ-ਚਾਪ ਸਮਾਜ ਦੀ ਬਿਹਤਰੀ ਲਈ ਕੰਮ ਕਰਦੇ ਹਨ। ਇਸ ਨਵੇਂ ਸਾਲ ਦੀ ਸੂਚੀ ਅੱਜ ਤੜਕੇ 5 ਵਜੇ ਜਾਰੀ ਕੀਤੀ ਗਈ।
Babushahi News Network Editor ਬਲਜੀਤ ਬੱਲੀ ਨੇ ਹਰਜਿੰਦਰ ਬਸਿਆਲ ਨੂੰ ਇਸ ਅਵਾਰਡ ਤੇ ਹਾਰਦਿਕ ਵਧਾਈ ਦਿੱਤੀ ਹੈ.
Read in English
ਇਸ ਸੂਚੀ ਦੇ ਵਿਚ ਕੁਝ ਭਾਰਤੀਆਂ ਦੀ ਵੀ ‘ਕਿੰਗ’ਜ਼ ਸਰਵਿਸ ਮੈਡਲ’ ਦੀ ਚੋਣ ਕੀਤੀ ਗਈ। ਪੰਜਾਬੀ ਭਾਈਚਾਰੇ ਨੂੰ ਇਸ ਗੱਲ ਦੀ ਖ਼ੁਸ਼ੀ ਹੋਏਗੀ ਕਿ ਇਸ ਵਾਰ ਪੰਜਾਬੀ ਮੀਡੀਆ ਕਰਮੀਂ ਸ. ਹਰਜਿੰਦਰ ਸਿੰਘ ਬਸਿਆਲਾ ਜੋ ਕਿ ਨਿਊਜ਼ੀਲੈਂਡ ਦੀ ਪਹਿਲੀ ਆਨ ਲਾਈਨ ਪੰਜਾਬੀ ਸਮਾਚਾਰ ਵੈਬਸਾਈਟ ‘ਪੰਜਾਬੀ ਹੈਰਲਡ’ ਦੇ ਸੰਪਾਦਕ ਹਨ, ਜਸਟਿਸ ਆਫ ਦਾ ਪੀਸ ਅਤੇ ਮੈਰਿਜ ਸੈਲੀਬ੍ਰਾਂਟ ਵੀ ਹਨ, ਨੂੰ ਇਸ ਸਨਮਾਨ ਸੂਚੀ ਦੇ ਵਿਚ ਸ਼ਾਮਿਲ ਕੀਤਾ ਗਿਆ ਹੈ। ਸ. ਹਰਜਿੰਦਰ ਸਿੰਘ ਬਸਿਆਲਾ ਨੇ ਇਸ ਐਵਾਰਡ ਨੂੰ ਸਮੁੱਚੇ ਪੰਜਾਬੀ ਮੀਡੀਆ ਕਰਮੀਆਂ ਨੂੰ ਸਮਰਪਿਤ ਕੀਤਾ ਹੈ। ਉਨ੍ਹਾਂ ਆਪਣਾ ਨਾਂਅ ਨਾਮਜ਼ਦ ਕਰਨ ਵਾਲੀਆਂ ਸੰਸਥਾਵਾਂ ਅਤੇ ਵਿਅਕਤੀਆਂ ਦਾ ਵੀ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਇਸ ਐਵਾਰਡ/ਮੈਡਲ ਦੀ ਸਿਫ਼ਾਰਸ਼ ਕੀਤੀ।
ਪ੍ਰਧਾਨ ਮੰਤਰੀ ਵੱਲੋਂ ਵਧਾਈ ਪੱਤਰ: ਨਿਊਜ਼ੀਲੈਂਡ ਦੇ ਪ੍ਰਧਾਨ ਮੰਤਰੀ ਮਾਣਯੋਗ ਸ੍ਰੀ ਕ੍ਰਿਸ ਲਕਸਨ ਨੇ ਵੀ ਸ. ਹਰਜਿੰਦਰ ਸਿੰਘ ਬਸਿਆਲਾ ਨੂੰ ‘ਕਿੰਗ’ਜ਼ ਸਰਵਿਸ ਮੈਡਲ’ ਦੇ ਲਈ ਚੁਣੇ ਜਾਣ ਉੱਤੇ ਵਧਾਈ ਪੱਤਰ ਭੇਜਿਆ ਹੈ।
ਕੀ ਹੈ ਆਨਰਜ਼ ਸੂਚੀ?
ਨਿਊਜ਼ੀਲੈਂਡ ਦੀ ਨਿਊ ਈਅਰ ਆਨਰਜ਼ ਸੂਚੀ ਮੁੱਖ ਤੌਰ ’ਤੇ ਨਿਊਜ਼ੀਲੈਂਡ ਦੇ ਸ਼ਾਹੀ ਸਨਮਾਨ ਪ੍ਰਣਾਲੀ (New Zealand Royal Honours system) ਵਿੱਚੋਂ ਚੁਣੇ ਗਏ ਸਨਮਾਨਾਂ ’ਤੇ ਆਧਾਰਿਤ ਹੁੰਦੀ ਹੈ।
ਇਹ ਮੁੱਖ ਤੌਰ ’ਤੇ ਤਿੰਨ ਵੱਡੇ ਆਰਡਰਾਂ (Orders) ਵਿੱਚ ਵੰਡੀ ਜਾਂਦੀ ਹੈ, ਜਿਨ੍ਹਾਂ ਵਿੱਚੋਂ ਨਿਊਜ਼ੀਲੈਂਡ ਆਰਡਰ ਆਫ਼ ਮੈਰਿਟ, ਆਰਡਰ ਆਫ਼ ਨਿਊਜ਼ੀਲੈਂਡ, ਨਿਊਜ਼ੀਲੈਂਡ ਆਰਡਰ ਆਫ਼ ਮੈਰਿਟ, ਕਿੰਗਜ਼ ਸਰਵਿਸ ਆਰਡਰ ਅਤੇ ਕਿੰਗਜ਼ ਸਰਵਿਸ ਮੈਡਲ।
ਨਿਊਜ਼ੀਲੈਂਡ ਕਿੰਗ’ਜ਼ ਸਰਵਿਸ ਮੈਡਲ: ਇੱਕ ਸਨਮਾਨ ਹੈ ਜੋ ਭਾਈਚਾਰਕ ਸੇਵਾਵਾਂ ਨੂੰ ਮਾਨਤਾ ਦਿੰਦਾ ਹੈ
ਨਿਊਜ਼ੀਲੈਂਡ ਕਿੰਗਜ਼ ਸਰਵਿਸ ਮੈਡਲ (King’s Service Medal - KSM) ਨਿਊਜ਼ੀਲੈਂਡ ਵਿੱਚ ਇੱਕ ਬਹੁਤ ਹੀ ਸਤਿਕਾਰਯੋਗ ਸਨਮਾਨ ਹੈ, ਜੋ ਉਹਨਾਂ ਲੋਕਾਂ ਨੂੰ ਦਿੱਤਾ ਜਾਂਦਾ ਹੈ ਜਿਨ੍ਹਾਂ ਨੇ ਭਾਈਚਾਰੇ ਲਈ ਸਵੈ-ਇੱਛਤ ਸੇਵਾਵਾਂ ਜਾਂ ਜਨਤਕ ਖੇਤਰ ਵਿੱਚ ਵਡਮੁੱਲੀਆਂ ਸੇਵਾਵਾਂ ਨਿਭਾਈਆਂ ਹਨ। ਇਹ ਮੈਡਲ ਨਿਊਜ਼ੀਲੈਂਡ ਦੇ ਸਨਮਾਨ ਪ੍ਰਣਾਲੀ ਦਾ ਇੱਕ ਅਹਿਮ ਹਿੱਸਾ ਹੈ ਅਤੇ ਨਿਊਜ਼ੀਲੈਂਡ ਵਾਸੀਆਂ ਦੇ ਅਣਥੱਕ ਯਤਨਾਂ ਅਤੇ ਸਮਰਪਣ ਨੂੰ ਮਾਨਤਾ ਦਿੰਦਾ ਹੈ।
ਕਦੋਂ ਸ਼ੁਰੂ ਹੋਇਆ?
ਨਿਊਜ਼ੀਲੈਂਡ ਕਿੰਗਜ਼ ਸਰਵਿਸ ਮੈਡਲ, ਜਿਸਨੂੰ ਪਹਿਲਾਂ ਕੁਈਨਜ਼ ਸਰਵਿਸ ਮੈਡਲ (Queen’s Service Medal - QSM) ਕਿਹਾ ਜਾਂਦਾ ਸੀ, ਦੀ ਸਥਾਪਨਾ 13 ਮਾਰਚ 1975 ਨੂੰ ਮਹਾਰਾਣੀ ਐਲਿਜ਼ਾਬੈਥ-2 ਦੁਆਰਾ ਕੀਤੀ ਗਈ ਸੀ। ਇਹ ਬ੍ਰਿਟਿਸ਼ ਸਨਮਾਨ ਪ੍ਰਣਾਲੀ ਦੇ ਇੱਕ ਮੁੜ ਮੁਲਾਂਕਣ ਤੋਂ ਬਾਅਦ ਹੋਂਦ ਵਿੱਚ ਆਇਆ, ਜਿਸ ਵਿੱਚ ਨਿਊਜ਼ੀਲੈਂਡ ਲਈ ਆਪਣੇ ਵਿਲੱਖਣ ਸਨਮਾਨਾਂ ਦੀ ਲੋੜ ਮਹਿਸੂਸ ਕੀਤੀ ਗਈ। 3 ਮਈ 2024 ਨੂੰ, ਕਿੰਗ ਚਾਰਲਸ-3 ਦੇ ਸਿੰਘਾਸਣ ’ਤੇ ਬੈਠਣ ਤੋਂ ਬਾਅਦ, ਇਸਦਾ ਨਾਮ ਬਦਲ ਕੇ ‘ਕਿੰਗਜ਼ ਸਰਵਿਸ ਮੈਡਲ’ ਕਰ ਦਿੱਤਾ ਗਿਆ। ਹਾਲਾਂਕਿ, ਜਿਨ੍ਹਾਂ ਨੂੰ ਪਹਿਲਾਂ ਕੁਈਨਜ਼ ਸਰਵਿਸ ਮੈਡਲ ਨਾਲ ਸਨਮਾਨਿਤ ਕੀਤਾ ਗਿਆ ਸੀ, ਉਹ ਕਿਊਨ’ਜ਼ ਸਰਵਿਸ ਮੈਡਲ (QSM) ਸ਼ਬਦ ਦੀ ਵਰਤੋਂ ਕਰਨਾ ਜਾਰੀ ਰੱਖਣਗੇ, ਜਦੋਂ ਕਿ ਜੂਨ 2024 ਤੋਂ ਬਾਅਦ ਪ੍ਰਾਪਤ ਕਰਨ ਵਾਲੇ ਕਿੰਗ’ਜ਼ ਸਰਵਿਸ ਮੈਡਲ (KSM) ਦੀ ਵਰਤੋਂ ਕਰਨਗੇ।
ਕਿਉਂ ਦਿੱਤਾ ਜਾਂਦਾ ਹੈ?
ਇਹ ਮੈਡਲ ਮੁੱਖ ਤੌਰ ’ਤੇ ਦੋ ਖੇਤਰਾਂ ਵਿੱਚ ਕੀਤੇ ਗਏ ਵਡਮੁੱਲੇ ਯੋਗਦਾਨ ਲਈ ਦਿੱਤਾ ਜਾਂਦਾ ਹੈ:
ਨਿਰਸਵਾਰਥ ਭਾਈਚਾਰਕ ਸੇਵਾ (Voluntary Service to the Community): ਇਹ ਉਹਨਾਂ ਵਿਅਕਤੀਆਂ ਨੂੰ ਦਿੱਤਾ ਜਾਂਦਾ ਹੈ ਜਿਨ੍ਹਾਂ ਨੇ ਆਪਣੇ ਭਾਈਚਾਰੇ ਦੀ ਭਲਾਈ ਲਈ ਨਿਰਸਵਾਰਥ ਭਾਵਨਾ ਨਾਲ ਸਵੈ-ਇੱਛਤ ਕੰਮ ਕੀਤਾ ਹੈ। ਇਸ ਵਿੱਚ ਸਮਾਜਿਕ ਕੰਮ, ਚੈਰਿਟੀ ਸੰਸਥਾਵਾਂ ਵਿੱਚ ਯੋਗਦਾਨ, ਸਥਾਨਕ ਕਲੱਬਾਂ ਜਾਂ ਸਮੂਹਾਂ ਦੀ ਅਗਵਾਈ, ਜਾਂ ਹੋਰ ਕਿਸੇ ਵੀ ਰੂਪ ਵਿੱਚ ਭਾਈਚਾਰੇ ਦੀ ਸਹਾਇਤਾ ਸ਼ਾਮਲ ਹੋ ਸਕਦੀ ਹੈ।
ਸੰਖੇਪ ਜੀਵਨ ਵੇਰਵਾ: ਹਰਜਿੰਦਰ ਸਿੰਘ ਬਸਿਆਲਾ
ਹਰਜਿੰਦਰ ਸਿੰਘ, ਜਿਨ੍ਹਾਂ ਨੂੰ ਹਰਜਿੰਦਰ ਸਿੰਘ ਬਸਿਆਲਾ ਵਜੋਂ ਵੀ ਜਾਣਿਆ ਜਾਂਦਾ ਹੈ, ਉਹ ਪਿਛਲੇ 32 ਸਾਲਾਂ ਤੋਂ ਇੱਕ ਲੇਖਕ, ਕਾਲਮਨਵੀਸ ਅਤੇ ਅਖ਼ਬਾਰੀ ਪੱਤਰਕਾਰੀ ਨਾਲ ਜੁੜੇ ਹੋਏ ਹਨ। ਨਿਊਜ਼ੀਲੈਂਡ ਦੇ ਪੰਜਾਬੀ ਭਾਈਚਾਰੇ ਲਈ ਉਨ੍ਹਾਂ ਦਾ ਯੋਗਦਾਨ ਬੇਮਿਸਾਲ ਹੈ, ਅਤੇ ਪੰਜਾਬੀ ਭਾਸ਼ਾ ਅਤੇ ਸੱਭਿਆਚਾਰ ਨੂੰ ਉਤਸ਼ਾਹਿਤ ਕਰਨ ਲਈ ਉਨ੍ਹਾਂ ਦਾ ਸਮਰਪਣ ਸੱਚਮੁੱਚ ਸ਼ਲਾਘਾਯੋਗ ਹੈ। ਉਹ ਸਾਰੀਆਂ ਮਹੱਤਵਪੂਰਨ ਖ਼ਬਰਾਂ ਦਾ ਪੰਜਾਬੀ ਵਿੱਚ ਅਨੁਵਾਦ ਕਰਦੇ ਹਨ, ਉਹਨਾਂ ਦੀ ਰਚਨਾ ਕਰਦੇ ਹਨ ਅਤੇ ਉਹਨਾਂ ਨੂੰ ਆਪਣੇ ਆਨ ਲਾਈਨ ਅਖ਼ਬਾਰ ਵਿੱਚ ਪ੍ਰਕਾਸ਼ਿਤ ਕਰਦੇ ਹਨ, ਇਹ ਯਕੀਨੀ ਬਣਾਉਂਦੇ ਹਨ ਕਿ ਪੰਜਾਬੀ ਬੋਲਣ ਵਾਲੇ ਭਾਈਚਾਰੇ ਨੂੰ ਨਵੇਂ ਕਾਨੂੰਨਾਂ, ਇਮੀਗ੍ਰੇਸ਼ਨ ਤਬਦੀਲੀਆਂ ਅਤੇ ਵੱਖ-ਵੱਖ ਸਰਕਾਰੀ ਘੋਸ਼ਣਾਵਾਂ ਬਾਰੇ ਜਾਣਕਾਰੀ ਦਿੱਤੀ ਜਾਵੇ। ਉਹ ਜਸਟਿਸ ਆਫ਼ ਦਾ ਪੀਸ, ਮੈਰਿਜ ਸੈਲੀਬ੍ਰਾਂਟ ਅਤੇ ਯੂਨੀਟੈਕ ਇੰਸਟੀਚਿਊਟ ਆਫ਼ ਟੈਕਨਾਲੋਜੀ ਤੋਂ ਇੱਕ ਯੋਗ ਦੁਭਾਸ਼ੀਏ ਵੀ ਹਨ।
2009 ਵਿੱਚ, ਉਨ੍ਹਾਂ ਨੇ ਇਥੇ ਪਹਿਲੀ ਰੋਜ਼ਾਨਾ ਅੱਪਡੇਟ ਕੀਤੀ ਜਾਣ ਵਾਲੀ ਔਨਲਾਈਨ ਪੰਜਾਬੀ ਭਾਸ਼ਾ ਦੀ ਨਿਊਜ਼ ਵੈੱਬਸਾਈਟ, ‘ਪੰਜਾਬੀ ਹੈਰਲਡ’ ਦੀ ਸ਼ੁਰੂਆਤ ਕੀਤੀ, ਜੋ ਹੁਣ 16ਵੇਂ ਸਾਲ ਵਿਚ ਹੈ। ਇਹ ਪਲੇਟਫਾਰਮ ਨਿਊਜ਼ੀਲੈਂਡ ਵਿੱਚ ਪੰਜਾਬੀ ਭਾਈਚਾਰੇ ਲਈ ਖ਼ਬਰਾਂ ਅਤੇ ਜਾਣਕਾਰੀ ਦਾ ਇੱਕ ਵਧੀਆ ਸਰੋਤ ਬਣ ਚੁੱਕਾ ਹੈ, ਜੋ ਉਨ੍ਹਾਂ ਦੇ ਦ੍ਰਿਸ਼ਟੀਕੋਣ ਅਤੇ ਵਚਨਬੱਧਤਾ ਦਾ ਪ੍ਰਮਾਣ ਹੈ। ਅਪ੍ਰੈਲ 2021 ਵਿੱਚ ਅਕਾਲ ਫਾਊਂਡੇਸ਼ਨ ਨਿਊਜ਼ੀਲੈਂਡ ਵੱਲੋਂ ਉਨ੍ਹਾਂ ਨੂੰ ‘ਸਰਵਿਸ ਟੂ ਪੰਜਾਬੀ ਮੀਡੀਆ ਅਵਾਰਡ’ ਨਾਲ ਵੀ ਸਨਮਾਨਿਤ ਕੀਤਾ ਗਿਆ ਸੀ। ਉਨ੍ਹਾਂ ਦਾ ਅਖ਼ਬਾਰੀ ਤਜਰਬਾ 32 ਸਾਲਾਂ ਤੋਂ ਵੱਧ ਦਾ ਹੈ, ਉਹ ਪਹਿਲਾਂ ਜਲੰਧਰ ਵਿੱਚ ਦੁਨੀਆ ਦੇ ਸਭ ਤੋਂ ਵੱਡੇ ਪੰਜਾਬੀ ਅਖ਼ਬਾਰ ‘ਅਜੀਤ’ ਲਈ ਕੰਮ ਕਰ ਚੁੱਕੇ ਹਨ। ਬਸਿਆਲਾ ਲੰਮੇ ਸਮੇਂ ਤੋਂ ਨਿਊਜ਼ੀਲੈਂਡ ਤੋਂ ਬਾਬੂਸ਼ਾਹੀ ਨੈੱਟਵਰਕ ਨਾਲ ਜੁੜੇ ਹੋਏ ਹਨ ਉਨ੍ਹਾਂ ਨੂੰ 2011 ਵਿੱਚ ਲੰਡਨ (ਯੂ.ਕੇ)ਵਿਖੇ ‘ਸਿੱਖਜ਼ ਇਨ ਮੀਡੀਆ’ ਐਵਾਰਡ (ਸਿੱਖ ਪੁਰਸਕਾਰ) ਲਈ ਨਾਮਜ਼ਦ ਕੀਤਾ ਗਿਆ ਸੀ। ਉਨ੍ਹਾਂ ਨੇ ਪਾਪਾਕੁਰਾ ਪੁਲਿਸ ਸਲਾਹਕਾਰ ਟੀਮ ਦੇ ਮੈਂਬਰ ਵਜੋਂ ਵੀ ਸੇਵਾ ਨਿਭਾਈ ਹੈ। ਪਹਿਲੀਆਂ ਨਿਊਜ਼ੀਲੈਂਡ ਸਿੱਖ ਖੇਡਾਂ ਦੌਰਾਨ, ਉਨ੍ਹਾਂ ਨੇ ਦੁਨੀਆ ਭਰ ਵਿੱਚ ਇਸ ਸਮਾਗਮ ਨੂੰ ਉਤਸ਼ਾਹਿਤ ਕਰਨ ਲਈ ਅਣਥੱਕ ਮਿਹਨਤ ਕੀਤੀ। ਪੰਜਵੀਆਂ ਨਿਊਜ਼ੀਲੈਂਡ ਸਿੱਖ ਖੇਡਾਂ ਵਿੱਚ, ਉਨ੍ਹਾਂ ਨੇ ਇੱਕ ਯਾਦਗਾਰੀ ਡਾਕ ਟਿਕਟ ਜਾਰੀ ਕੀਤੀ ਅਤੇ ਖੇਡ ਪ੍ਰਬੰਧਕਾਂ ਦੇ ਨਾਲ ਨਿਸ਼ਕਾਮ ਜੁੜੇ ਹੋਏ ਹਨ।
.ਹਰਜਿੰਦਰ ਸਿੰਘ ਬਸਿਆਲਾ ਦੇ ਪੰਜਾਬੀ ਭਾਸ਼ਾ ਪ੍ਰਤੀ ਸਮਰਪਣ ਨੇ ਇਕ ਹੋਰ ਮਾਅਰਕਾ ਮਾਰਿਆ। 2020 ਵਿੱਚ ਸਿੱਖਿਆ ਮੰਤਰਾਲੇ ਦੇ ਸਹਿਯੋਗ ਨਾਲ ਨਿਊਜ਼ੀਲੈਂਡ ਵਿੱਚ ਪਹਿਲੀ ਵਾਰ ‘ਪੰਜਾਬੀ ਭਾਸ਼ਾ ਹਫ਼ਤਾ’ ਸ਼ੁਰੂ ਕਰਨ ਦੀ ਪਿਰਤ ਸ਼ੁਰੂ ਕੀਤੀ। ਉਨ੍ਹਾਂ ਦੀ ਇਸ ਪਹਿਲਕਦਮੀ ਨੇ ਨੌਜਵਾਨ ਪੀੜ੍ਹੀ ਵਿੱਚ ਪੰਜਾਬੀ ਭਾਸ਼ਾ ਨੂੰ ਸੁਰੱਖਿਅਤ ਰੱਖਣ ਅਤੇ ਉਤਸ਼ਾਹਿਤ ਕਰਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਨਿਊਜ਼ੀਲੈਂਡ ਸਿੱਖ ਖੇਡਾਂ ਦੌਰਾਨ ਇੱਕ ਪੰਜਾਬੀ ਦਾ ਇਤਿਹਾਸ ਵਿਖਾਉਂਦਾ ਮੈਗਜ਼ੀਨ ਵੀ ਤਿਆਰ ਕਰਕੇ ਵੰਡਿਆ ਅਤੇ ਬੱਚਿਆਂ ਨੂੰ ਆਪਣੀ ਮਾਂ-ਬੋਲੀ ਨਾਲ ਜੁੜਨ ਵਿੱਚ ਮਦਦ ਕਰਨ ਲਈ ਪੰਜਾਬੀ ਵਰਨਮਾਲਾ ਸਮਗਰੀ ਵੱਖ-ਵੱਖ ਰੂਪਾਂ ਵਿਚ ਪ੍ਰਦਾਨ ਕੀਤੀ। 2021 ਵਿੱਚ, ਉਨ੍ਹਾਂ ਨੇ ਭਾਰਤੀ ਅਤੇ ਪਾਕਿਸਤਾਨੀ ਪੰਜਾਬੀ ਭਾਈਚਾਰੇ ਅਤੇ ਉਨ੍ਹਾਂ ਦੀ ਮਾਤ ਭਾਸ਼ਾ ਨੂੰ ਦਰਸਾਉਂਦੀ ਇੱਕ ‘ਪੰਜਾਬੀ ਭਾਸ਼ਾ’ ਡਾਕ ਟਿਕਟ ਜਾਰੀ ਕੀਤੀ।
2017 ਤੋਂ ਉਹ ਜਸਟਿਸ ਆਫ਼ ਦ ਪੀਸ ਵਜੋਂ ਭਾਈਚਾਰੇ ਨੂੰ ਸੇਵਾਵਾਂ ਪ੍ਰਦਾਨ ਕਰ ਰਹੇ ਹਨ। ਲੋੜ ਪੈਣ ’ਤੇ ਉਹ ਘਰ ਜਾ ਕੇ, ਗੁਰਦੁਆਰਾ ਸਾਹਿਬਾਨਾਂ ਅੰਦਰ ਅਤੇ ਕਈ ਵਾਰ ਹੋਰ ਕੰਮ ਵਾਲੇ ਸਥਾਨਾਂ ਉੱਤੇ ਵੀ ਆਪਣੀਆਂ ਜੇਪੀ ਸੇਵਾਵਾਂ ਪ੍ਰਦਾਨ ਕਰਦੇ ਹਨ। ਉਹ ਆਕਲੈਂਡ ਅੰਤਰਰਾਸ਼ਟਰੀ ਅਤੇ ਘਰੇਲੂ ਹਵਾਈ ਅੱਡੇ ਉੱਤੇ ਹੈਲਪ ਡੈਸਕ ਉੱਤੇ ਵੀ ‘ਕਸਟਮਰ ਸਰਵਿਸ ਅੰਬੈਸਡਰ’ ਵਜੋਂ ਵੀ ਸੇਵਾਵਾਂ ਪ੍ਰਦਾਨ ਕਰਦੇ ਹਨ।