ਲੁਧਿਆਣਾ ਨਗਰ ਨਿਗਮ ਦੇ ਰਿਕਾਰਡ ਗਾਇਬ ਹੋਣ ਦਾ ਮਾਮਲਾ ਮਨੁੱਖੀ ਅਧਿਕਾਰ ਕਮਿਸ਼ਨ ਕੋਲ ਪੁੱਜਿਆ
ਸਮਾਜਿਕ ਕਾਰਕੁਨ ਦੀ ਸ਼ਿਕਾਇਤ ’ਤੇ ਨੋਟਿਸ ਜਾਰੀ ਹੋਣ ਦਾ ਦਾਅਵਾ; 18 ਨਵੰਬਰ ਨੂੰ ਅਗਲੀ ਸੁਣਵਾਈ
ਸੁਖਮਿੰਦਰ ਭੰਗੂ
ਲੁਧਿਆਣਾ, 29 ਅਕਤੂਬਰ 2026
ਲੁਧਿਆਣਾ ਨਗਰ ਨਿਗਮ ਦੇ ਪੁਰਾਣੇ ਰਿਕਾਰਡ ਰੂਮ ਵਿੱਚੋਂ ਅਹਿਮ ਸਰਕਾਰੀ ਫਾਈਲਾਂ, ਦਸਤਾਵੇਜ਼ ਅਤੇ ਸੀਸੀਟੀਵੀ ਕੈਮਰਾ ਗਾਇਬ ਹੋਣ ਦਾ ਮਾਮਲਾ ਹੁਣ ਪੰਜਾਬ ਰਾਜ ਮਨੁੱਖੀ ਅਧਿਕਾਰ ਕਮਿਸ਼ਨ ਕੋਲ ਪਹੁੰਚ ਗਿਆ ਹੈ। ਸਮਾਜਿਕ ਕਾਰਕੁਨ ਅਰਵਿੰਦ ਸ਼ਰਮਾ ਦੀ ਸ਼ਿਕਾਇਤ ’ਤੇ ਕਮਿਸ਼ਨ ਵੱਲੋਂ ਨਗਰ ਨਿਗਮ ਕਮਿਸ਼ਨਰ ਨੂੰ ਨੋਟਿਸ ਜਾਰੀ ਕੀਤੇ ਜਾਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ। ਮਾਮਲੇ ਦੀ ਅਗਲੀ ਸੁਣਵਾਈ 18 ਨਵੰਬਰ 2026 ਨੂੰ ਚੰਡੀਗੜ੍ਹ ਵਿਖੇ ਹੋਣੀ ਹੈ।
ਜਾਣਕਾਰੀ ਅਨੁਸਾਰ, ਲੱਕੜ ਪੁਲ ਨੇੜੇ ਸਥਿਤ ਪੁਰਾਣੇ ਰਿਕਾਰਡ ਰੂਮ ਵਿੱਚੋਂ ਫਾਈਲਾਂ ਗਾਇਬ ਹੋਣ ਦਾ ਮਾਮਲਾ ਜੂਨ ਮਹੀਨੇ ਵਿੱਚ ਸਾਹਮਣੇ ਆਇਆ ਸੀ। ਦੱਸਿਆ ਜਾਂਦਾ ਹੈ ਕਿ ਰਿਕਾਰਡ ਕੀਪਰ ਵੱਲੋਂ 12 ਜੂਨ ਨੂੰ ਕਮਰੇ ਨੂੰ ਤਾਲਾ ਲਗਾਇਆ ਗਿਆ ਸੀ, ਪਰ 15 ਜੂਨ ਨੂੰ ਵਾਪਸ ਆਉਣ ’ਤੇ ਅਸਲ ਤਾਲੇ ਦੀ ਥਾਂ ਦੂਜਾ ਤਾਲਾ ਲੱਗਿਆ ਮਿਲਿਆ। ਕਮਰੇ ਦੀ ਜਾਂਚ ਦੌਰਾਨ ਕਈ ਦਸਤਾਵੇਜ਼ ਅਤੇ ਸੀਸੀਟੀਵੀ ਕੈਮਰਾ ਗਾਇਬ ਪਾਏ ਗਏ।
ਇਸ ਸਬੰਧੀ ਪੁਲਿਸ ਕੋਲ ਸ਼ਿਕਾਇਤ ਦਰਜ ਕਰਵਾਈ ਗਈ ਸੀ ਅਤੇ ਥਾਣਾ ਨੰਬਰ 1 ਵਿੱਚ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਚੋਰੀ ਦਾ ਕੇਸ ਦਰਜ ਕੀਤਾ ਸੀ । ਗਾਇਬ ਹੋਏ ਬਿੱਲਾਂ, ਵਾਊਚਰਾਂ ਅਤੇ ਹੋਰ ਸਰਕਾਰੀ ਰਿਕਾਰਡ ਦੀ ਪਛਾਣ ਕਰਨ ਦੇ ਨਾਲ-ਨਾਲ ਜਾਂਚ ਦੀ ਕਾਰਵਾਈ ਵੀ ਕੀਤੇ ਜਾਣ ਦੀ ਗੱਲ ਸਾਹਮਣੇ ਆਈ ਸੀ।
ਅਰਵਿੰਦ ਸ਼ਰਮਾ ਨੇ ਮੰਗ ਕੀਤੀ ਹੈ ਕਿ ਗਾਇਬ ਦਸਤਾਵੇਜ਼ਾਂ ਦੀ ਪੂਰੀ ਸੂਚੀ ਤਿਆਰ ਕਰਕੇ ਰਿਕਾਰਡ ਦੀ ਸੁਰੱਖਿਆ ਵਿੱਚ ਹੋਈ ਸੰਭਾਵਿਤ ਲਾਪਰਵਾਹੀ ਦੀ ਜਾਂਚ ਕੀਤੀ ਜਾਵੇ। ਉਨ੍ਹਾਂ ਖ਼ਦਸ਼ਾ ਪ੍ਰਗਟਾਇਆ ਕਿ ਇਸ ਮਾਮਲੇ ਪਿੱਛੇ ਵਿੱਤੀ ਰਿਕਾਰਡ ਲੁਕਾਉਣ ਦੀ ਕੋਸ਼ਿਸ਼ ਵੀ ਹੋ ਸਕਦੀ ਹੈ। ਹਾਲਾਂਕਿ, ਇਸ ਖ਼ਦਸ਼ੇ ਦੀ ਅਜੇ ਪੁਸ਼ਟੀ ਨਹੀਂ ਹੋਈ ਹੈ ਅਤੇ ਮਾਮਲੇ ਦੀ ਅਸਲ ਸਥਿਤੀ ਜਾਂਚ ਤੋਂ ਬਾਅਦ ਹੀ ਸਪੱਸ਼ਟ ਹੋਵੇਗੀ।
- Download Babushahi App
-
-
