IVF ਤਕਨੀਕ 'ਚ ਵੱਡੀ ਲਾਪਰਵਾਹੀ: ਬੱਚਾ ਬਦਲ ਜਾਣ ਦਾ ਖ਼ਦਸ਼ਾ- DNA ਟੈਸਟ ਫੇਲ੍ਹ ਹੋਣ ਮਗਰੋਂ ਹੋਇਆ ਖੁਲਾਸਾ, FIR ਦਰਜ
ਦਿੱਲੀ ਦੇ ਫਰਟੀਲਿਟੀ ਕਲੀਨਿਕ ਵਿੱਚ ਹੋਇਆ ਸੀ IVF ਟ੍ਰੀਟਮੈਂਟ; ਜਨਵਰੀ 2026 ਵਿੱਚ ਹੋਇਆ ਸੀ ਜੁੜਵਾ ਬੱਚਿਆਂ ਦਾ ਜਨਮ
DNA ਰਿਪੋਰਟ ਵਿੱਚ ਬੱਚੇ ਦਾ ਮਾਤਾ-ਪਿਤਾ ਦੋਵਾਂ ਨਾਲ ਨਹੀਂ ਮਿਲਿਆ ਮੇਲ; ਪੀੜਤ ਪਰਿਵਾਰ ਵੱਲੋਂ ਉੱਚ ਪੱਧਰੀ ਜਾਂਚ ਦੀ ਮੰਗ
ਪੁਲਿਸ ਵੱਲੋਂ ਮਾਮਲਾ ਦਰਜ ਨਾ ਕਰਨ 'ਤੇ ਅਦਾਲਤ ਨੇ ਪਾਇਆ ਹੱਥ; ਕੋਰਟ ਦੇ ਦਖ਼ਲ ਤੋਂ ਬਾਅਦ FIR ਹੋਈ ਦਰਜ
Babushahi Network
ਗੁਰੂਗ੍ਰਾਮ (ਹਰਿਆਣਾ), 16 ਜੂਨ 2026: ਗੁਰੂਗ੍ਰਾਮ ਦੇ ਇੱਕ ਜੋੜੇ ਵੱਲੋਂ ਆਈ.ਵੀ.ਐਫ. (IVF) ਪ੍ਰਕਿਰਿਆ ਦੌਰਾਨ ਭਰੂਣ (Embryo) ਦੇ ਬਦਲੇ ਜਾਣ ਜਾਂ ਬੱਚੇ ਦੀ ਅਦਲਾ-ਬਦਲੀ ਹੋਣ ਦਾ ਇੱਕ ਬੇਹੱਦ ਹੈਰਾਨੀਜਨਕ ਅਤੇ ਗੰਭੀਰ ਇਲਜ਼ਾਮ ਲਗਾਇਆ ਗਿਆ ਹੈ। ਜੋੜੇ ਮੁਤਾਬਕ, ਡੀ.ਐਨ.ਏ. (DNA) ਟੈਸਟ ਦੀ ਰਿਪੋਰਟ ਵਿੱਚ ਉਨ੍ਹਾਂ ਦੇ ਨਵਜੰਮੇ ਜੁੜਵਾ ਬੱਚਿਆਂ ਵਿੱਚੋਂ ਇੱਕ ਬੱਚੇ ਦਾ ਮਾਤਾ-ਪਿਤਾ ਦੋਵਾਂ ਨਾਲ ਕੋਈ ਜੈਨੇਟਿਕ ਮੇਲ (Maternity & Paternity) ਨਹੀਂ ਪਾਇਆ ਗਿਆ। ਪੀੜਤ ਜੋੜੇ ਨੇ ਇਨਸਾਫ਼ ਅਤੇ ਸੱਚਾਈ ਸਾਹਮਣੇ ਲਿਆਉਣ ਲਈ ਇਸ ਪੂਰੇ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਦੀ ਮੰਗ ਕੀਤੀ ਹੈ।
ਗੁਰੂਗ੍ਰਾਮ ਦੇ ਦਵਾਰਕਾ ਐਕਸਪ੍ਰੈਸਵੇਅ ਇਲਾਕੇ ਦੇ ਰਹਿਣ ਵਾਲੇ ਰਾਹੁਲ ਰਾਠੌਰ ਅਤੇ ਉਨ੍ਹਾਂ ਦੀ ਪਤਨੀ ਮੀਨੂ ਰਾਠੌਰ ਨੇ ਦੱਸਿਆ ਕਿ ਉਨ੍ਹਾਂ ਨੇ ਦਿੱਲੀ ਦੇ ਗ੍ਰੇਟਰ ਕੈਲਾਸ਼ ਸਥਿਤ ਇੱਕ ਫਰਟੀਲਿਟੀ ਕਲੀਨਿਕ ਤੋਂ ਆਈ.ਵੀ.ਐਫ. (IVF) ਟ੍ਰੀਟਮੈਂਟ ਕਰਵਾਇਆ ਸੀ। ਰਾਠੌਰ ਮੁਤਾਬਕ, ਫਰਵਰੀ 2025 ਵਿੱਚ ਐੱਗ ਰੀਟਰੀਵਲ ਅਤੇ ਸੀਮਨ ਕਲੈਕਸ਼ਨ ਦੀ ਪ੍ਰਕਿਰਿਆ ਹੋਈ ਸੀ, ਜਿਸ ਤੋਂ ਬਾਅਦ ਮਈ 2025 ਵਿੱਚ ਭਰੂਣ ਟ੍ਰਾਂਸਫਰ ਕੀਤਾ ਗਿਆ। ਇਸ ਤੋਂ ਬਾਅਦ 5 ਜਨਵਰੀ 2026 ਨੂੰ ਦਵਾਰਕਾ ਦੇ ਇੱਕ ਹਸਪਤਾਲ ਵਿੱਚ ਉਨ੍ਹਾਂ ਦੇ ਘਰ ਜੁੜਵਾ ਬੱਚਿਆਂ ਨੇ ਜਨਮ ਲਿਆ।
ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਰਾਹੁਲ ਰਾਠੌਰ ਨੇ ਦੱਸਿਆ ਕਿ ਬੱਚਿਆਂ ਦੇ ਜਨਮ ਤੋਂ ਤੁਰੰਤ ਬਾਅਦ ਹੀ ਉਨ੍ਹਾਂ ਨੂੰ ਸ਼ੱਕ ਹੋਇਆ ਕਿਉਂਕਿ ਇੱਕ ਬੱਚੇ ਦੀ ਸ਼ਕਲ ਪਰਿਵਾਰ ਨਾਲ ਬਿਲਕੁਲ ਨਹੀਂ ਮਿਲਦੀ ਸੀ। ਸ਼ੱਕ ਦੂਰ ਕਰਨ ਲਈ ਜਦੋਂ ਉਨ੍ਹਾਂ ਨੇ ਡੀ.ਐਨ.ਏ. (DNA) ਟੈਸਟ ਕਰਵਾਇਆ, ਤਾਂ ਰਿਪੋਰਟ ਦੇਖ ਕੇ ਉਨ੍ਹਾਂ ਦੇ ਹੋਸ਼ ਉੱਡ ਗਏ। ਰਿਪੋਰਟ ਵਿੱਚ ਬੱਚੇ ਦਾ ਮਾਤਾ ਜਾਂ ਪਿਤਾ ਕਿਸੇ ਨਾਲ ਵੀ ਕੋਈ ਸਬੰਧ ਸਾਬਤ ਨਹੀਂ ਹੋਇਆ। ਇਸ ਤੋਂ ਸਾਫ਼ ਜ਼ਾਹਰ ਹੁੰਦਾ ਹੈ ਕਿ ਆਈ.ਵੀ.ਐਫ. ਪ੍ਰਕਿਰਿਆ ਦੌਰਾਨ ਜਾਂ ਹਸਪਤਾਲ ਵਿੱਚ ਬੱਚਿਆਂ ਦੀ ਅਦਲਾ-ਬਦਲੀ ਹੋਈ ਹੈ।
ਕੋਰਟ ਦੇ ਦਖ਼ਲ ਤੋਂ ਬਾਅਦ ਦਰਜ ਹੋਈ FIR
ਪੀੜਤ ਜੋੜੇ ਨੇ ਦੱਸਿਆ ਕਿ ਉਹ ਪਿਛਲੇ ਪੰਜ ਮਹੀਨਿਆਂ ਤੋਂ ਹਸਪਤਾਲਾਂ, ਸਰਕਾਰੀ ਅਧਿਕਾਰੀਆਂ, ਪੁਲਿਸ ਅਤੇ ਅਦਾਲਤਾਂ ਦੇ ਚੱਕਰ ਕੱਟ ਰਹੇ ਹਨ। ਉਨ੍ਹਾਂ ਨੇ ਜਨਵਰੀ ਵਿੱਚ ਹਸਪਤਾਲ ਪ੍ਰਸ਼ਾਸਨ ਕੋਲ, ਫਰਵਰੀ ਵਿੱਚ ਕੇਂਦਰੀ ਸਿਹਤ ਮੰਤਰਾਲੇ ਅਤੇ ਮਾਰਚ ਵਿੱਚ ਸਟੇਟ ਅਸਿਸਟਡ ਰਿਪ੍ਰੋਡਕਟਿਵ ਟੈਕਨਾਲੋਜੀ (ART) ਵਿਭਾਗ ਨੂੰ ਸ਼ਿਕਾਇਤਾਂ ਦਿੱਤੀਆਂ, ਪਰ ਕੋਈ ਵੀ ਠੋਸ ਕਾਰਵਾਈ ਨਹੀਂ ਹੋਈ। ਰਾਠੌਰ ਨੇ ਕਿਹਾ, "ਅਸੀਂ ਐਫ.ਆਈ.ਆਰ. (FIR) ਦਰਜ ਕਰਵਾਉਣ ਲਈ ਤਿੰਨ ਮਹੀਨੇ ਪੁਲਿਸ ਦੇ ਚੱਕਰ ਕੱਟੇ, ਪਰ ਕੋਈ ਸੁਣਵਾਈ ਨਹੀਂ ਹੋਈ। ਅਖ਼ੀਰ ਸਾਨੂੰ ਅਦਾਲਤ ਦਾ ਦਰਵਾਜ਼ਾ ਖੜਕਾਉਣਾ ਪਿਆ, ਜਿਸ ਤੋਂ ਬਾਅਦ ਕੋਰਟ ਦੇ ਹੁਕਮਾਂ 'ਤੇ ਮਾਮਲਾ ਦਰਜ ਕੀਤਾ ਗਿਆ ਹੈ।"
ਇਹ ਮਾਮਲਾ ਉਸ ਸਮੇਂ ਹੋਰ ਸੁਰਖੀਆਂ ਵਿੱਚ ਆਇਆ ਜਦੋਂ ਇਸ ਜੋੜੇ ਨੇ ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਸਾਂਝੀ ਕਰਕੇ ਆਪਣਾ ਦਰਦ ਬਿਆਨ ਕੀਤਾ ਅਤੇ ਆਪਣੇ ਅਸਲੀ ਜੈਵਿਕ (Biological) ਬੱਚੇ ਨੂੰ ਲੱਭਣ ਲਈ ਮਦਦ ਦੀ ਅਪੀਲ ਕੀਤੀ। ਵੀਡੀਓ ਵਿੱਚ ਪਰਿਵਾਰ ਨੇ ਉਨ੍ਹਾਂ ਸਾਰੇ ਜੋੜਿਆਂ ਨੂੰ DNA ਟੈਸਟ ਕਰਵਾਉਣ ਦੀ ਸਲਾਹ ਦਿੱਤੀ ਹੈ, ਜਿਨ੍ਹਾਂ ਨੇ 2025 ਦੌਰਾਨ ਉਸੇ ਫਰਟੀਲਿਟੀ ਸੈਂਟਰ ਤੋਂ ਇਲਾਜ ਕਰਵਾਇਆ ਸੀ ਜਾਂ ਜਿਨ੍ਹਾਂ ਦੇ ਬੱਚਿਆਂ ਦਾ ਜਨਮ 5 ਜਨਵਰੀ 2026 ਦੇ ਆਸ-ਪਾਸ ਉਸ ਸਬੰਧਤ ਹਸਪਤਾਲ ਵਿੱਚ ਹੋਇਆ ਸੀ।
ਪੀੜਤ ਜੋੜੇ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਮਕਸਦ ਕਿਸੇ 'ਤੇ ਦੋਸ਼ ਲਗਾਉਣਾ ਨਹੀਂ, ਬਲਕਿ ਸਿਰਫ਼ ਇਹ ਪਤਾ ਕਰਨਾ ਹੈ ਕਿ ਕੀ ਕੋਈ ਗਲਤੀ ਹੋਈ ਹੈ ਅਤੇ ਜੇਕਰ ਅਜਿਹਾ ਹੋਇਆ ਹੈ, ਤਾਂ ਉਨ੍ਹਾਂ ਦਾ ਆਪਣਾ ਅਸਲੀ ਬੱਚਾ ਕਿੱਥੇ ਹੈ। ਦੂਜੇ ਪਾਸੇ, ਇਨ੍ਹਾਂ ਇਲਜ਼ਾਮਾਂ ਦੇ ਘੇਰੇ ਵਿੱਚ ਆਏ ਹਸਪਤਾਲਾਂ ਵੱਲੋਂ ਅਜੇ ਤੱਕ ਕੋਈ ਅਧਿਕਾਰਤ ਬਿਆਨ ਸਾਹਮਣੇ ਨਹੀਂ ਆਇਆ ਹੈ। ਫਿਲਹਾਲ ਮਾਮਲਾ ਅਦਾਲਤ ਅਤੇ ਪੁਲਿਸ ਜਾਂਚ ਦੇ ਅਧੀਨ ਹੈ।
- Download Babushahi App
-
-
