ਲੰਡਨ/ਨਵੀਂ ਦਿੱਲੀ, 27 ਅਪ੍ਰੈਲ, 2017 : ਇਕ ਬ੍ਰਿਟਿਸ਼ ਸਿੱਖ ਬੈਰਿਸਟਰ ਨੂੰ ਲੰਡਨ ਦੇ ਬਕਿੰਘਮ ਪੈਲੇਸ ‘ਚ ਰਾਜਕੁਮਾਰ ਵਿਲੀਅਮ ਵੱਲੋਂ ਮਾਣਮੱਤੇ ਆਰਡਰ ਆਫ ਬ੍ਰਿਟਿਸ਼ ਅੰਪਾਇਰ (ਓਬੀਈ) ਨਾਲ ਸਨਮਾਨਿਤ ਕੀਤਾ ਗਿਆ। ਇਹ ਪੁਰਸਕਾਰ ਕਮਿਊਨਿਟੀ ਸੇਵਾਵਾਂ ਲਈ ਪ੍ਰਦਾਨ ਕੀਤਾ ਗਿਆ ਹੈ।
ਸਿਟੀ ਸਿੱਖ ਸੰਸਥਾ ਦੇ ਸੰਸਥਾਪਕ ਜਸਵੀਰ ਸਿੰਘ ਨੂੰ ਓਬਈ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ। ਸਨਮਾਨ ਸਮਾਗਮ ਪਿੱਛੋਂ ਜਸਵੀਰ ਸਿੰਘ ਨੇ ਕਿਹਾ ਕਿ ਉਸ ਨੂੰ ਇਸ ਮੌਕੇ ਸਾਇੰਸਦਾਨਾਂ, ਕਲਾਕਾਰਾਂ, ਪੈਰਾਉਲੰਪਿਕ ਖਿਡਾਰੀਆਂ ਤੇ ਹਥਿਆਰਬੰਦ ਫ਼ੌਜਾਂ ਤੇ ਪੁਲਿਸ ਦੇ ਉੱਚ ਅਧਿਕਾਰੀਆਂ ਨੂੰ ਮਿਲਣ ਦਾ ਮੌਕਾ ਮਿਲਿਆ। ਜਸਵੀਰ ਸਿੰਘ ਨੇ ਦੱਸਿਆ ਕਿ ਮੈਂ ਰਾਜਕੁਮਾਰ ਵਿਲੀਅਮ ਨੂੰ ਮਿਲਿਆ ਤੇ ਉਨ੍ਹਾਂ ਤੇ ਉਨ੍ਹਾਂ ਦੇ ਭਰਾ ਰਾਜਕੁਮਾਰ ਹੈਰੀ ਵੱਲੋਂ ਕਮਿਊਨਿਟੀ ਲਈ ਕੀਤੇ ਜਾ ਰਹੇ ਕੰਮਾਂ ਦੀ ਸ਼ਲਾਘਾ ਕੀਤੀ।
ਸਿਟੀ ਸਿੱਖਸ ਬਿ੍ਰਟੇਨ ਦੀਆਂ ਕੁਝ ਉਨ੍ਹਾਂ ਸੰਸਥਾਵਾਂ ‘ਚ ਸ਼ਾਮਿਲ ਹੈ ਜਿਨ੍ਹਾਂ ਦੇ ਲਗਪਗ ਛੇ ਹਜ਼ਾਰ ਮੈਂਬਰ ਹਨ। ਇਹ ਸੰਸਥਾ ਕਈ ਪ੍ਰਾਜੈਕਟਾਂ ਨਾਲ ਜੁੜੀ ਹੈ ਜਿਨ੍ਹਾਂ ‘ਚ ‘ਗਰਾਂਡ ਟਰੰਕ ਪ੍ਰਾਜੈਕਟ’ ਵੀ ਸ਼ਾਮਿਲ ਹੈ। ਇਸ ਪ੍ਰਾਜੈਕਟ ਨੂੰ ਫੇਥਸ ਫੋਰਮ ਫਾਰ ਲੰਡਨ ਚਲਾ ਰਹੀ ਹੈ। ਇਹ ਸੰਸਥਾ ਬਿ੍ਰਟੇਨ ਦੇ ਵੱਖ-ਵੱਖ ਭਾਈਚਾਰਿਆਂ ‘ਚ ਆਪਸੀ ਪਿਆਰ ਵਧਾਉਣ ਲਈ ਯਤਨਸ਼ੀਲ ਹੈ।
ਇਸ ਮੌਕੇ ਜਿਨ੍ਹਾਂ ਹੋਰ ਸਿੱਖ ਸ਼ਖ਼ਸੀਅਤਾਂ ਨੂੰ ਸਨਮਾਨਿਤ ਕੀਤਾ ਗਿਆ ਉਨ੍ਹਾਂ ‘ਚ ਬਰਿੰਦਰ ਸਿੰਘ ਮਾਹੋਂ ਜਿਨ੍ਹਾਂ ਨੂੰ ਸਿੱਖਿਆ ਲਈ ਓਬੀਈ ਪੁਰਸਕਾਰ ਮਿਲਿਆ, ਡਿਟੈਕਟਿਵ ਸਰਜੈਂਟ ਸਰਬਜੀਤ ਕੌਰ ਜਿਸ ਨੂੰ ਸੇਵਾਵਾਂ ਲਈ ਐੱਮਬੀਈ ਪੁਰਸਕਾਰ ਦਿੱਤਾ ਗਿਆ। ਇਹ ਪੁਰਸਕਾਰ ਬਿ੍ਰਟੇਨ ਦੇ ਸਰਕਾਰੀ ਗਜ਼ਟ ‘ਚ ਸ਼ਾਮਿਲ ਹੁੰਦੇ ਹਨ ਤੇ ਹਰ ਸਾਲ ਦਿੱਤੇ ਜਾਂਦੇ ਹਨ।
abp ਸਾਂਝਾ ਤੋਂ ਧੰਨਵਾਦ ਸਹਿਤ