ਮੋਡਰਨਾ ਦੇ ਕੋਰੋਨਾ ਟੀਕੇ ਖਰਾਬ ਕਰਨ ਵਾਲੇ ਵਿਸਕਾਨਸਿਨ ਫਾਰਮਾਸਿਸਟ 'ਤੇ ਲੱਗੇ ਕੁਤਾਹੀ ਵਰਤਣ ਦੇ ਦੋਸ਼
ਗੁਰਿੰਦਰਜੀਤ ਨੀਟਾ ਮਾਛੀਕੇ
ਫਰਿਜ਼ਨੋ (ਕੈਲੀਫੋਰਨੀਆਂ), 21 ਜਨਵਰੀ 2021
ਵਿਸਕਾਨਸਿਨ ਦੇ ਇੱਕ ਹਸਪਤਾਲ ਵਿੱਚ ਪਿਛਲੇ ਦਿਨੀ ,ਹਸਪਤਾਲ ਦੇ ਹੀ ਕਰਮਚਾਰੀ ਦੁਆਰਾ ਮੋਡਰਨਾ ਕੋਰੋਨਾ ਟੀਕਿਆਂ ਦੀਆਂ ਤਕਰੀਬਨ 500 ਖੁਰਾਕਾਂ ਨੂੰ ਫਰਿੱਜ ਤੋਂ ਬਾਹਰ ਕੱਢ ਕੇ ਰੱਖਿਆ ਗਿਆ ਸੀ, ਦੇ ਉੱਪਰ ਟੀਕੇ ਦੀਆਂ 500 ਤੋਂ ਵੱਧ ਖੁਰਾਕਾਂ ਨੂੰ ਨਸ਼ਟ ਕਰਨ ਦੀ ਕੋਸ਼ਿਸ਼ ਅਤੇ ਕੁਤਾਹੀ ਕਰਨ ਦਾ ਦੋਸ਼ ਲਗਾਇਆ ਗਿਆ ਹੈ। ਇਸ ਮਾਮਲੇ ਦੀ ਓਜ਼ੌਕੀ ਕਾਉਂਟੀ ਕੋਰਟ ਵਿੱਚ ਸੁਣਵਾਈ ਦੌਰਾਨ ਦੱਸਿਆ ਗਿਆ ਕਿ ਸਟੀਫਨ ਬ੍ਰੈਂਡਨਬਰਗ ਨਾਮ ਦੇ ਇਸ ਕਰਮਚਾਰੀ ਤੇ ਲੱਗੇ ਦੋਸ਼ਾਂ ਵਿੱਚ ਮੋਡਰਨਾ ਟੀਕੇ ਦੀਆਂ 57 ਸ਼ੀਸ਼ੀਆਂ ਨੂੰ ਫਰਿੱਜ ਭੰਡਾਰਨ 'ਚੋਂ ਹਟਾਉਣਾ ਸ਼ਾਮਿਲ ਹੈ। 46 ਸਾਲਾ ਬ੍ਰੈਂਡਨਬਰਗ ਨੇ ਵੀ ਅਧਿਕਾਰੀਆਂ ਕੋਲ ਮੰਨਿਆ ਸੀ ਕਿ ਉਸਨੇ ਦੋ ਵੱਖ-ਵੱਖ ਮੌਕਿਆਂ ਤੇ ਟੀਕੇ ਦੀਆਂ ਸ਼ੀਸ਼ੀਆਂ "ਜਾਣ ਬੁੱਝ ਕੇ" ਹਟਾ ਦਿੱਤੀਆਂ ਸਨ ਤਾਂ ਜੋ ਇਹ ਪ੍ਰਭਾਵਸ਼ਾਲੀ ਨਾ ਹੋ ਸਕਣ।
ਸੁਣਵਾਈ ਦੌਰਾਨ ਬ੍ਰੈਂਡਨਬਰਗ ਦੇ ਅਟਾਰਨੀ ਨੇ ਉਸ ਵੱਲੋਂ ਹਸਪਤਾਲ ਦੀ ਜਾਇਦਾਦ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕਰਨ ਦੇ ਦੋਸ਼ਾਂ ਲਈ ਦੋਸ਼ੀ ਨਾ ਹੋਣ ਦੀ ਅਪੀਲ ਕੀਤੀ ਗਈ ਹੈ। ਬ੍ਰੈਂਡਨਬਰਗ, ਜਿਸਨੂੰ 4 ਜਨਵਰੀ ਨੂੰ ਬਾਂਡ 'ਤੇ ਰਿਹਾ ਕੀਤਾ ਗਿਆ ਸੀ, ਜੇਕਰ ਇਸ ਮਾਮਲੇ ਵਿੱਚ ਦੋਸ਼ੀ ਸਾਬਿਤ ਹੋ ਜਾਂਦਾ ਹੈ ਤਾਂ ਉਸ ਨੂੰ ਨੌਂ ਮਹੀਨੇ ਤੱਕ ਦੀ ਕੈਦ ਹੋ ਸਕਦੀ ਹੈ ਅਤੇ ਨਾਲ ਹੀ ਵੱਧ ਤੋਂ ਵੱਧ 10,000 ਡਾਲਰ ਦਾ ਜ਼ੁਰਮਾਨਾ ਵੀ ਹੋ ਸਕਦਾ ਹੈ। ਇਸ ਕੇਸ ਸੰਬੰਧੀ ਉਸ ਦੀ ਅਗਲੀ ਅਦਾਲਤ ਦੀ ਤਰੀਖ 18 ਮਾਰਚ ਨੂੰ ਹੈ ਅਤੇ ਅਦਾਲਤ ਦੁਆਰਾ ਉਸਨੂੰ ਬਿਨਾਂ ਪ੍ਰਵਾਨਗੀ ਦੇ ਸੂਬੇ ਨੂੰ ਨਾ ਛੱਡਣ ਦਾ ਆਦੇਸ਼ ਵੀ ਦਿੱਤਾ ਹੈ।